Olympics Hian Mite A Inpumkhattîr Thei Tak Tak Ang Em?—Bible-in Eng Nge A Sawi?

Kum 2024 Summer Olympics chhûngin, mi tlûklehdingâwn nga vêl chuan infiamnaa tel tûra ram 206 aṭanga lo kal infiam mite chu an en nia chhût a ni a. International Olympic Committee-a president Thomas Bach-a chuan, “Khawvêl inpumkhattîrtu thiltihnaah kan tel a. Kan inan lohnate inpumkhattîrtu mihring awmchhun ang maiin, he Olympic boruak muanawm tak hi i lâwm ang u,” tiin a sawi a ni.

Chu Olympics chuan a thiltum duhawm takte chu a hlen thei ang em? Inpumkhatna leh remna dik tak hi kan beisei thei ang em?

Inpumkhatna leh remnna an thlen thei ang em?

Mite chuan kumin Olympic-ah hian infiamna mai aia tam a tel niin an ngai a. Chu infiamna chuan mite ṭhen darhtu khawtlâng leh politics lama buainate a târ lang a. Chûng buainaahte chuan mihring dikna te, hnam inthliarna te, thlei bîk neihna te leh, intluk tlân lohnate a tel a ni.

Olympics ang chi khawvêl pum huapa neih infiamnaa thiltihte chuan mite chu a tihlim thei hle a. Mahse, chutiang thiltihte chuan mite chu inpumkhatna leh inremna tluangtling neihtîr ahnêkin, rilru lam leh thiltihahte inṭhen hranna a awmtîr zâwk a ni.

Bible chuan mite’n inpumkhatna neih tiharsatu rilru put hmang an lantîr dâwn tih a sawi lâwk a. (2 Timothea 3:1-5) Chu Bible hrilh lâwkna chungchâng hriat belh nân, “Bible-in Tûn Laia Mite Ngaihtuah Dân leh Thiltih Dân A Sawi Lâwk Em?” tih thuziak chu chhiar ang che

Khawvêl inpumkhatna leh remna atâna beiseina dik tak

Bible-ah hian khawvêl pum huap inpumkhatna leh remna atâna beiseina dik tak a chuang a. Bible chuan leia mi zawng zawngte chu “Pathian Ram,” tia koh vân sawrkâr hnuaiah an inpumkhat ang tih a tiam a ni.—Luka 4:43; Matthaia 6:10.

Chu Rama Lalber Isua Krista chuan khawvêl pumah remna a rawn thlen ang. Bible chuan heti hian a sawi a ni:

•  “Mi felte chu an duah hluah hluah ang a, thlamuanna nasa tak chu a duah hlauh hluah bawk ang.”—Sâm 72:7.

•  “Pachhiain a auhvin ani chuan a chhanhim ang a . . . An nunna chu hnehchhiahna leh nunrâwnna lak ata a tlan ang.”—Sâm 72:12, 14.

Tûn laiah pawh, Isua zirtîrnate chuan ram 239-a mi maktaduai tam takte chu a inpumkhattîr tawh a. Kristian an nih angin, khawvêl puma Jehova Thuhretute chuan inrem taka awm dân chu an zir tawh a ni. An tih dân i hriat theih nân, “Inhuatna Thleng Leh Ṭhîn Chu Titâwp Rawh,” tih thupui nei Vênnainsâng magazine chhuak chu chhiar ang che