Hmeichhiate Himna—Bible Thlîr Dân

“Ka naupan laiin, ka u hian tisa lam leh ṭawngkamin nî tin mi sawisa ṭhîn a. Pasal ka neih hnuah pawh, ka pasal nu hian min sawisa reng ṭhîn a. Ka pasal nu leh pa hian chhiahhlawh ang maiin min cheibâwl a. Intihhlum hial ka tum ta a ni.”—Madhu-i,a India.

World Health Organization chuan “hmeichhiate chunga tharum thawhna hi khawvêlah a hluar êm êm a ni,” tiin a sawi a. Hmeichhe pathum zêlah pakhat vêl hian an nunah kutthlâk emaw, pâwngsual emaw an tâwk nia chhût a ni.

I chungah chutiang a thleng tawh a nih chuan, i kalna apiangah ânkhumna te, kutthlâkna te leh, mipat hmeichhiatna lama khawih chhiatna tâwk leh thei ni hian him lo riau nia inhriatna i nei ngei ang. Hmeichhia nih vâng maia chutianga dik lo taka cheibâwl an nih ṭhin avângin, hmeichhe tam zâwkte ngaihdân ang ‘Hmeichhiate chu kan pawimawh lo,’ tiin i ngai mai thei a ni. Mahse, hmeichhiate hi Pathian tân an pawimawh tak zêt em?

Engtin nge Pathianin hmeichhiate a thlîr?

Bible châng: “Pathianin . . . mipaah leh hmeichhiaah a siam a ni.”—Genesis 1:27.

A awmzia: Pathianin mipa leh hmeichhia a siam a. Ani chuan zah taka cheibâwl an phû ve ve niin a ngai a ni. Chu bâkah, pasal chuan a nupui chu ṭawngkam na tak tak leh tharum thawhna hmanga thunun lo va, “mahni a inhmangaih angin mahni nupui hmangaih” tûrin Pathianin a beisei a ni. (Ephesi 5:33; Kolossa 3:19) Ni e, hmeichhiate himna hi Pathian tân a pawimawh tak zet a ni.

“Ka naupan laiin, chhûngkhat lainâte’n min pâwngsual a. Kum 17 mi ka nihin, ka hnathawhna puin mipat hmeichhiatna ka hmanpui loh chuan meia hâl min vau bawk. Ka lo puitlin chuan ka pasal, nu leh pa te leh, ṭhenawmte chuan zah takin min cheibâwl tawh lo va. Mahse, a tâwpah chuan, Siamtu Jehovab chungchâng ka zir a. Ani chuan hmeichhiate chu zah taka cheibâwl phû niin a ngai a. Chu chuan Jehova’n min hmangaihin a tân ka hlu hle tih min hriatchiantîr a ni.”—Maria-i, Argentina.

I rilru lam dam ṭha leh tûrin engin nge ṭanpui thei che?

Bible châng: “Unau aia nghet zâwk ṭhian an awm ṭhîn.”—Thufingte 18:24.

A awmzia: Ṭhian dik tak chuan a ṭanpui ang che. A theih phawt chuan, i rilru awm dânte chu i mi rin tak tuemaw hnênah hrilh ang che.

“Mipat hmeichhiatna lama khawih chhiat ka ni chu kum 20 chhûngin tuma hnênah mah ka hrilh lo va. Chuvângin, ka hlim lo va, lungkhamna leh rilru hahna kan nei reng a. Mahse, a tâwpah chuan, chûng ka thiltawnte chu thinlung taka min ngaihthlâksak theitu hnênah ka hrilh a, chumi hnu chuan, a hahdam huai ta a ni.” —Elif-i, Türkiye.

Bible châng: “[Pathianin] a ngaihsak ṭhin che u avângin, in manganna zawng zawng ama chungah nghat vek rawh u.”—1 Petera 5:7.

A awmzia: Pathian hnêna i ṭawngṭai hian a ngaihthla tak zet a. (Sâm 55:22; 65:2) Ani chuan a ngaihsak che avângin, a tâna i hlutzia hre thiam tûrin a ṭanpui thei che a ni.

“Jehova chanchin zirna chuan ka rilru hliam na tak dam leh tûrin min ṭanpui a. Tûnah chuan, Pathian hnênah engkim ka hrilh thei tawh. Ani chu ka rilru awm dânte min hriatthiampui thei ṭhian ṭha tak ang a ni.”—Ana-i, Belize.

Hmeichhiate dik lo taka cheibâwlna chu Pathianin a titâwp ang em?

Bible châng: “LALPA, leia mi chu hlauhawm taka a awm leh tawh lohna tûrin, pa nei lo leh hnehchhiahna tuarte rorêlsak nân, thuhnuairawlhte duh zâwng chu i ngaithla tawh a.”—Sâm 10:17, 18.

A awmzia: Pathian chuan nakin lawkah hmeichhiate chunga râwng taka thiltihna leh tharum thawhna zawng zawng pawh tiamin, rorêl dik lohna zawng zawng chu a nuai bo vang.

“Jehova’n hmeichhiate chunga dik lo taka cheibâwlna a titâwp thuai dâwn tih hriat chu ka tân chuan dam sawng sawngna a ni. Chu chuan rilru lam thlamuanna min neihtîr a ni.”—Roberta-i, Mexico.

Bible-in beiseina min pêk dân te, chûng thutiam kan rinchhan theih dân te leh, Jehova Thuhretute’n tûn laiah Bible aṭanga thlamuanna an pêk dânte i hriat belh theih nân, hnênah a thlâwnna tlawh tûr chein dîlna theh lût ang che.

Awlsam taka print theih he thuziak hi download ang che.