Nany/stock.adobe.com
Tûn Laia Ṭâm Tlâkna Chungchângah Bible-in Eng Nge A Sawi?
“Ṭâm awm lohna.” He thu hian mihringte buaina lian ber berte zînga pakhat chungchânga khawvêl hruaitute thiltum chu a târ lang a, chu chu leia mi tinte tâna ei leh in pêk hi a ni.a Mahse, he khawvêlah hian ṭâm hi a bo ngai ang em? Bible-in eng nge a sawi?
Bible-in tûn laia ṭâm tlâkna hi a sawi lâwk
Bible chuan “ni hnuhnûngahte” tia a koh, tûn kan hunah hian ṭâmte a tla ang tih a sawi lâwk a. (2 Timothea 3:1) Pathian chu hêng ṭâm tlâknaahte hian mawhphurtu ni lo mah se, chûngte chu min vaukhân lâwk a ni. (Jakoba 1:13) Bible hrilh lâwkna pahnih hi lo chhinchhiah ang che.
“Hmun hrang hrangah ṭâmte a tla ang.” (Matthaia 24:7) Bible chuan hmun hrang hrangah ṭâm a tla ang tih a sawi lâwk a. Chhinchhiah tlâk takin, ei leh in lam tihchhuahna leh semdarhna lama mi thiamte report pakhat chuan: “Ṭâm tlâkna leh ei leh in hrisêl tlâk chhamna kawngah kan khawvêl dinhmun hi a chhe zual zêl a ni,”b tiin a sawi a ni. Ram tam taka mi maktaduai tam takin ei tûr kham khawp an nei thei lo va. Chuvângin, mi tam takin an thih phah chu a lungchhiatthlâk hle.
“Ngai teh, sakawr dum ka hmu a; a chunga chuang chuanin bûkna a keng a.” (Thu Puan 6:5) He hrilh lâwknaa entîr nei sakawr leh a chunga chuang hian hun hnuhnûnga ṭâm tlâkna hi a entîr a.c Sakawr chunga chuangtu ken bûkna hi ei leh inte bûk nâna hman a ni a. He sakawr chung chuangin a chuan laiin, aw pakhat hian ei leh bâr mante chu a to hle ang tih a sawi bâkah, ei tûr atâna mamawh zualpuite chu ren hle tûrin a vaukhân bawk a. (Thu Puan 6:6) Hei hian tûn laia ei leh bâr harsatna chu chiang takin a târ lang a, mi maktaduai tam takte chu ei tûr nei lo emaw, ei tûr hrisêl ṭha nei thei lovin emaw an awm mêk a ni.
Ṭâm a tâwp dân tûr
Mi thiamte chuan he kan leilung hian a chhûnga chêngte ei tûr mamawh aia tam a pe chhuak thei tih an sawi a. Chutiang a nih si chuan, ṭâmte a tlâk chhan chu eng nge ni ta ang? Min Siamtu Pathian Jehova’nd chûng harsatnate a chinfel dân tûr chungchângah Bible-in eng nge a sawi?
Harsatna: Sawrkârte chuan ṭâm thlentîrtu retheihna leh rorêl dik lohnate chu an chingfel thei lo.
Chinfelna: Ṭha famkim lo mihring sawrkârte chu Pathian Ram, sawrkâr ṭha famkima thlâk a ni tawh ang. (Daniela 2:44; Matthaia 6:10) Tûn laia mi rethei tam tak chuan ei tûr tak ngial pawh an nei thei mang lo va; mahse, Pathian Ram awpna hnuaiah chuan thlâk danglam a ni tawh ang. Bible chuan Pathian Ram Lal, Isua Krista chungchângah: “Pachhiain a auhvin ani chuan a chhanhim ang a, mi rethei, ṭanpuitu nei lo pawh chu, a chhan him ang. . . . Leiah, tlâng chungahte hian buh tam tak a awm ang a; a vui chu . . . a nghîng suau suau ang,” tiin a sawi.—Sâm 72:12, 16.
Harsatna: Indona chuan chhiatna leh sumdâwnna lamah tlâk chhiatna a thlen a, chu chuan ei leh bâr lamah harsatna nasa tak a awmtîr a ni.
Chinfelna: “[Jehova] chuan indonate chu kâwlkil thlengin a tireh ṭhîn a; thal ngul chu a titliak a, fei chu a sât bung ṭhîn a; tawlailîrte chu meiah a rawh ral ṭhîn.” (Sâm 46:9) Pathianin râlthuamte leh indona awmtîrtute chu a nuai bo vek ang a. Mi zawng zawngin ei leh bâr chu him tak leh awlsam takin an nei thei tawh ang. Bible chuan: “Mi felte chu an duah hluah hluah ang a, thlamuanna nasa tak chu a duah hlauh hluah bawk ang,” tiin min tiam a ni.—Sâm 72:7.
Harsatna: Sik leh sa nasa taka inthlâk danglamnate leh leilung chhiatnate chuan thlaite a tichhiain, rante a tipûl ṭhîn.
Chinfelna: Pathianin leilung pianken chaknate chu thununin ei tûrte leh thlaite tâna boruak ṭha tak a siam ang. Bible chuan: “[Jehova’n] thlipui chu a tibâng ṭhuap a; chutichuan, a tuifâwnte a reh ṭhup ṭhîn. . . . Thlalêr chu dîlah a chantîr ṭhîn a, ram ro chu tuihnaahte a chantîr bawk ṭhîn. Chutah chuan rilṭâmte chu a awmtîr ṭhîn . . . Lote an neih a, grêp huante an siam a, a rah lo pungte chu an hmuh theihna tûrin,” tiin a sawi a ni.—Sâm 107:29, 35-37.
Harsatna: Mite chuan duhâm tak leh dik lo taka thil an tih avângin hrisêlna atâna pawi tûr ei tûrte an tihchhuah bâkah, ei tûr chu a mamawhtute hnênah a thlen loh phah a ni.
Chinfelna: Pathian Ram chuan dik lo taka thil titu zawng zawng chu a nuai bo vek ang. (Sâm 37:10, 11; Isaia 61:8) Bible-in Pathian Jehova chuan “hnehchhiahna tuarte tân ro a rêl ṭhîn a; ani chuan rilṭâmte hnênah chaw a pe ṭhîn,” tiin a sawi a ni.—Sâm 146:7.
Harsatna: Khawvêla ei leh bâr thar chhuah hmun thuma ṭhena hmuh khat chu kum tina tihriral mai mai emaw, hloh emawin a awm.
Chinfelna: Pathian Ram hnuaiah chuan ei leh bârte chu ṭha taka sem a ni ang a. Isua chuan leia a awm lai khân, ei tûrte chu tiriral mai mai lo tûrin a fîmkhur hle. Entîr nân, ṭum khat chu, thilmak tihna hmangin mipui 5,000 aia tam a hrai a. A hnuah, a zirtîrte chu: “Eng mah bo lo tûrin a bâng nawite chhar rawh u,” tiin a hrilh a ni.—Johana 6:5-13.
Pathian Ramin ṭâmna thlentu bul berte a nuai bo dâwn avângin, mi zawng zawngin ei tûr hnianghnâr leh hrisêl tak tak an nei ṭheuh tawh ang. (Isaia 25:6) Pathian Ramin chutianga a tih hun tûr hriat belh nân, “Eng Tikah Nge Pathian Ramin Leiah Ro A Rêl Ang?” tih thuziak chu en rawh.
a Kum 2015-a United Nations Member States zawng zawngin an pawm tlân kum 2030 atâna Agenda for Sustainable Development.
b The Food and Agriculture Organization of the United Nations, the International Fund for Agricultural Development, the United Nations Children’s Fund, the United Nations World Food Programme, leh the World Health Organization te thuchhuah siam.
c Thu Puan bua sakawr chung chuang palite chungchâng hriat belh nân, “Sakawr Chungchuang Palite—Tute Nge An Nih?” tih thuziak chu en rawh.
d Jehova tih chu Pathian hming bil a ni. (Sâm 83:18) “Jehova Chu Tu Nge Ni?” tih thuziak chu en rawh.