Khawvêl Pumah Thil Man A Kai Chak Hle—Bible-in Eng Nge A Sawi?

World Bank Group-a president chuan kum 2022, June thla report-ah “Khawvêl pum sum leh pai dinhmun chu a derthâwng leh ta. Tûn ṭumah hi chuan thil mante a kai chak hle rualin mite chuan sum leh pai hman tûr an nei mang meuh lo,” tiin a sawi.

International Monetary Fund chuan: “Petrol leh ei leh bâr mante a kai chak hle a, chu chuan ram rethei zâwka mite chu nasa takin a nghawng a ni,” tiin a sawi.

Bible chuan chutianga sum leh pai lama harsatna kan hmachhawn chhan te, kan paltlang theih dân te, leh chingfel hlen theitu tûr beiseina kan neih theih dânte hre tûrin min ṭanpui a ni.

‘Ni hnuhnûng’ chhûnga thil man kai chho zêl

• Bible chuan “ni hnuhnûngahte” kan nung tawh tih min hrilh.—2 Timothea 3:1.

• Isuan “thil hlauhawmte,” a nih loh leh thilthleng hlauhawmte chu ni hnuhnûnga kan awm tawhzia chhinchhiahna a ni ang tih a sawi a. (Luka 21:11) Thil mante a kai chhoh zêl avângin mite chuan hlauhna an nei a. An chhûngte an châwm theih dâwn leh dâwn loh an hriat loh avângin an nakin hun tûr ngaihtuahin an hlauthâwng hle a ni.

• Thu Puan bu chuan he ni hnuhnûngah hian ei leh bâr mante a kai chho dâwn tih a sawi lâwk a. Heti hian a sawi: “Aw ka hria a. . . ., ‘Ni khat hlawhin buhpui kg. khat, ni khat hlawhin barli kg. thum,’” tiin.—Thu Puan 6:6, C.L. Re-edited.

“Ni hnuhnûng” chungchâng leh Thu Puan bu-a hrilh lâwkna chungchâng hriat belh nân, Kum 1914 Aṭangin Khawvêl A Inthlâk Danglam, tih video chu en la, “Sakawr Chungchuang Palite Tute Nge An Nih?” tih thuziak chu chhiar rawh.

Ei leh bâr harsatna zawng zawng chinfelna

• “Tin, inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang. Mi dang awmna tûrin in an sa tawh lo vang a, mi dang eiah grêp huan an siam tawh lo vang.”—Isaia 65:21, 22.

• “Leiah, tlâng chungahte hian buh tam tak a awm ang.”—Sâm 72:16.

• “LALPA chuan, ‘retheite an hnehchhiah avâng leh, pachhiate rûm avângin, ka tho nghâl mai ang,’” tiin a sawi.—Sâm 12:5.a

Pathian chuan ei leh bâr harsatna zawng zawng chu ram pakhatah chauh ni lovin, khawvêl pum huapah a tibo thuai tawh ang. Chumi chungchâng hre tûrin, “Hausa-Rethei Intluktlânna A Awm Thei Ang Em?” tih thuziak chu chhiar rawh.

Mahse, Bible chuan thil man kai chho zêl chu hmachhawn thei tûrin tûnah ngei pawh min ṭanpui thei a ni. Eng kawngin nge? Fing taka sum leh pai hman dân chungchânga thurâwn ṭangkai takte min pêkna hmangin. (Thufingte 23:4, 5; Thuhriltu 7:12) Hriat belh nân, “I Nî Tin Khawsak Dân Chu Vêng Ṭha Rawh,” tih leh “Sum Tlêm Zâwk Neia Nun Dân,” tih thuziak chu chhiar rawh.