Politics-ah Sakhua A Inrawlh Tûr A Ni Em?

Khawvêl pumah Isua Krista hnungzuitu nia inchhâl mi tam takte chu politics-ah an inrawlh thûk hle a. Mi ṭhenkhat chuan party, a nih loh leh candidate tuemaw hmangin an sakhaw thurin leh nungchang lama an tehnate chu chawi lâr an tum a. Kawng leh lamah politician-te chuan nungchang lama ngaih dân lâr takte leh khawtlâng dinhmunte chu sakhaw mite thlâwp hlawh nân an hmang fo bawk. Sakhaw hruaitute’n politics-ah nihna an chelh ṭhîn pawh hi thil pângngai tak a ni. Ram ṭhenkhatah “Kristian” sakhaw pâwl ṭhenkhat chu state, a nih loh leh ram pum huap sakhua anga ngaih an ni hial bawk.

Engtin nge i ngaih? Isua Krista hnungzuitute chu politics-ah an inrawlh tûr a ni em? Isua entawn tur siam aṭangin chumi chhânna chu i hmu thei ang. Ani chuan: “In chunga ka tih ang hian nangni pawhin in tih vena tûrin ka tihhmuh che u a ni,” tiin a sawi. (Johana 13:15) Politics nêna inkûngkaihin Isua’n eng entawn tûr nge a siam?

Isua politics-ah a inrawlh em?

Inrawlh lo. Isua chu khawvêl politics-ah a inrawlh lo.

Isua’n politics-ah thuneihna a zawng lo. Diabol-Setana’n “khawvêl ram zawng zawng” pêk a tum khân, ani chuan mihring sawrkâr rorêltu nih chu a hnâwl a ni. (Matthaia 4:8-10)a Ṭum dangah, Isua chu hruaitu ṭha tak a ni tih hretute’n politics-a inrawlhtîr tumin an nawr a. Bible chuan: “Amah chu lala siam tûra man luih tumin an lo kal dâwn tih Isuan a hria a, tlângah amah chauhvin a kal hrang leh ta a,” tiin a sawi. (Johana 6:15) Isua chuan mite duh dânin thil a ti lo. Chu aiin, politics-a inrawlhtîr an tumna chu a hnâwl a ni.

Isua’n politics thilah ṭan lam a nei lo. Entîr nân, Isua hun laia Judate chu Rom sawrkâr laka chhiah an chawi a ngaih avâng leh chu chu dik lo taka an chunga phurrit nghah anga an ngaih avângin an thinur hle a. Chu thila Isua ṭan lam neihtîr an tum khân, ani chu chhiah chawi a dik leh dik loh chungchânga inhnialnaah a inrawlh lo. Anni chu: “Kaisara thilte chu Kaisara hnênah pe ula, Pathian thilte chu Pathian hnênah pe ta che u,” tiin a hrilh zâwk a ni. (Marka 12:13-17) Politics lam thilah a tualdâwih a, mahse Kaisara aiawhtu Rom khuaa thuneitute khawn ṭhin chhiah chu pêk tûr a ni tih a târ lang a ni. Chutih rualin, khawvêl thuneitute chunga thuâwihna chuan chin tâwk a nei tih a târ lang bawk. Mi chuan biakna pawh tiamin, Pathian hnên chauhva pêk tûr thil chu sawrkâr hnênah a pe tûr a ni lo.—Matthaia 4:10; 22:37, 38.

Isua’n vân sawrkâr Pathian Ram chu thlâwpin, chumi chungchâng chu a hril bawk. (Luka 4:43) Ani chuan lei atâna Pathian duh zâwng tihlawhtlingtu tûr chu mihring sawrkârte ni lovin, Pathian Ram a ni tih a hriat avangin politics-ah a inrawlh lo. (Matthaia 6:10) Pathian Ram chuan mihring sawrkârte hmang lovin, a thlâk zâwk dâwn tih a hria a ni.—Daniela 2:44.

Kum zabi khatnaa Kristiante kha politics-ah an inrawlh em?

Inrawlh lo. Isua hnungzuitute chuan ‘khawvêl mi ni lo’ tûra a thupêk chu an zâwm a. (Johana 15:19) A entawn tûr siam chu zuiin khawvêl politics lakah an inla hrang reng a ni. (Johana 17:16; 18:36) Politics thila inrawlh aiin, Isua thupêk—Pathian Ram chanchin hrilh leh zirtîr hna—chu an thawk zâwk a ni.—Matthaia 28:18-20; Tirhkohte 10:42.

Kum zabi khatnaa Kristiante chuan an nunah Pathian thuâwih an dah hmasa a, chutih rualin thuneitute an zah a ngai tih an hre bawk. (Tirhkohte 5:29; 1 Petera 2:13, 17) Anni chuan dânte an zâwmin, chhiahte an chawi a. (Rom 13:1, 7) Politics-ah inrawlh lo mah se, sawrkârin a pêk dân lama invênhimna leh hamṭhatnate chu an hmang ṭangkai a ni.—Tirhkohte 25:10, 11; Philippi 1:7.

Tûn laia Kristian tualdâwihna

Bible-in Isua leh a hnungzuitu hmasate politics-a an inrawlh loh thu chiang takin a târ lang a. Hemi avâng hian khawvêl puma Jehova Thuhretute chu Kristian an nih angin an tualdâwih pumhlûm a. Kum zabi khatnaa Kristiante ang bawkin, anni chuan Isua thupêk zâwmin, “Ram chanchin ṭha” an hril a ni.—Matthaia 24:14.