Jehova Ngaihtuah Angin I Ngaihtuah Em?

1, 2. Hma kan sâwn chhoh zêl hian, eng nge kan zir? Entîrna pe rawh.

TUEMAW chuan naupang pakhat hnênah thilpêk pakhat a pe angah han mitthla teh. A nu leh pa chuan, “Ka lâwm e,” ti rawh tiin an hrilh a. A nu leh pain sawi tûra an tih avâng maiin lâwm thu a sawi a. Mahse, a rawn ṭhan len chuan miin kan chunga ṭhatna an lantîr chuan lâwm thu sawi a pawimawh tih a nu leh pate ngaih dân chu a hre thiam ṭan ta a. A tâwpah, lâwmna châng a rawn hriat chuan a hriatnain mite chungah lâwm thu a sawitîr ta a ni.

² Chutiang bawk chu kan chungah a thleng a. Thutak kan zir ṭan chuan Jehova thupêk bulpuite zawm a pawimawh dân kan hria a. Mahse, hma kan sâwn chhoh zêl chuan, a ngaihtuahna—a duh zâwng leh duh loh zâwngte, a thil thlîr dânte—chu kan hre thiam chho telh telh a ni. Kan mi mal duh thlanna leh thiltihah Jehova ngaihtuahna kan inthununtîr chuan a ngaihtuah angin kan ngaihtuah tihna a ni.

3. Jehova ngaihtuah anga ngaihtuah chu engvângin nge thil harsa a nih theih?

³ Jehova ngaihtuah dân hriat chu nuam ti mah ila, kan ṭhat famkim loh avângin a ngaihtuah dân anga ngaiihtuah chu harsa tih châng kan nei a. Entîr nân, Jehova’n nungchâng thianghlimna te, sum leh pai ngainatna te, thu hrilh rawngbâwlna te, dik lo taka thisen hmanna te, leh thil dangte chungchânga a thlîr dân chu kan hria a ni. Mahse, chûng thilte chutianga a thlîr chhan hriatthiam chu a harsa thei a. Chuvângin, engtin nge Jehova ngaihtuah anga ngaihtuah lehzual tûra kan zir theih? Chu chuan tûnah leh nakinah thil dik ti tûrin engtin nge min ṭanpui ang?

PATHIAN NGAIHTUAH ANGA KAN NGAIHTUAH THEIH DAN

4. Kan rilru a thara awmtîr tih awmzia chu eng nge ni?

⁴ Rom 12:2-ah chhiar rawh. He Bible chângah hian tirhkoh Paula’n Jehova ngaihtuah anga ngaihtuah tûra kan tih ngaite a târ lang a. “He khawvêl dân ang hian awm suh ula,” tiin min hrilh a ni. Thuziak hmasaa kan hriat tawh angin, khawvêl ngaih dân leh rilru put hmang chu kan hnâwl a ngai tihna a ni a. Chu bâkah, Paula chuan kan rilru a thara awmtîr a ngai tih pawh a sawi bawk. A awmzia chu Pathian Thu zir te, a ngaihtuah dân hriatthiamna te, a ngaihtuahna chhût ngunna te, leh a ngaihtuah dân anga ngaihtuah tumnate kan neih a ngai tihna a ni.

5. Chhiar leh inzirna danglamna chu hrilhfiah rawh?

⁵ Inzirnaah chuan thuziak chhiar satliah mai, a nih loh leh zir tûr zawhnate atâna chhânnate rîn mai aia tam a tel a. Zirna kan neih hian kan thu zir laiin Jehova nihna te, a thiltih te, a ngaihtuah dânte min zirtîr chu ngun takin kan chhût a. Jehova’n thil pakhat tih tûra min hrilh rualin, thil dang pumpelh tûra min hrilh chhante chu hriat kan tum a ni. Kan nunah leh kan ngaihtuah dâna inthlâk danglam ngaite chu kan ngaihtuah bawk a. Ni e, zirna kan neih apiangin chûng thil zawng zawng ngaihtuah vek chu a theih loh pawh a ni mai thei. Mahse, zirna atâna kan hun hman a chanve chu kan thu chhiarte chhût ngunna atâna hman a ṭha a ni.—Sâm 119:97; 1 Timothea 4:15.

6. Pathian Thu kan chhût ngun hian eng thil nge thleng?

⁶ Pathian Thu kan chhût ngun ziah chuan thil mak tak a thleng thei a. Jehova ngaihtuahna chu a ṭha famkim tih kan ‘hre fiah,’ a nih loh leh kan chiang a ni. A thil thlîr dânte kan hre thiam ṭan a, a tâwpah, a thil thlîr dân chu kan pawm ta a. Chutiang chuan, kan rilru chu a tharin kan awmtîr a, ngaihtuah dân thar kan nei ṭan a ni. Zawi zawiin, Jehova ngaihtuah dân angin kan ngaihtuah ve ta a ni.

KAN NGAIHTUAHNAIN KAN THILTIHTE A NGHAWNG

7, 8. (a) Engtin nge Jehova’n khawvêl lam thilte chu a thlîr? (A thupui chunga milemte en rawh.) (b) Khawvêl lam thilte chu Jehova thlîr dân anga kan thlîr a nih chuan, kan tâna thil pawimawh ber chu eng nge ni ang?

⁷ Kan ngaihtuahnate chuan kan thiltihah nghawng a nei a. (Marka 7:21-23; Jakoba 2:17) Chu chu a chian lehzual nân entîrna ṭhenkhat i lo ngaihtuah ang u. Isua pianna chungchâng thua kan hmuh, entîrna pakhat chuan khawvêl lam thila Jehova ngaihtuah dân chiang takin a târ lang a. Pathian chuan Josefa leh Mari’n sum tam tak nei lo mah se, a Fapa enkawl seilian tûrin a thlang a. (Leviticus 12:8; Luka 2:24) Isua a pian khân, Mari’n “khualbûka an len ve tâk loh avângin ran chaw pêkna thlêngah a muttîr a.” (Luka 2:7) Jehova’n duh se chuan Isua chu hmun ṭha taka piang tûrin a ti thei a ni. Mahse, Isua chu Pathian biakna dah pawimawhtu chhûngkuaa piang tûrin a duh a. Chu chu Jehova tâna thil pawimawh ber a ni.

⁸ Isua pianna chungchânga Bible-a chhinchhiah thu hian khawvêl lam thila Jehova thlîr dân min zirtîr a. Nu leh pa ṭhenkhat chuan an fate chu khawvêla thil ṭha ber berin Jehova nêna an inlaichînna a tichhia a nih pawhin, chûng thilte chu nei tûrin an duh a. Mahse, Jehova chuan amah nêna kan inlaichînna chu thil pawimawh berah a ngai tih a chiang hle. Chu mi chungchânga Jehova thlîr dân chu i pawm em? I thiltihin eng nge a târ lan?—Hebrai 13:5 chhiar rawh.

9, 10. Mi dangte tihtlûkna chungchângah Jehova thlîr dân angin kan thlîr tih engtin nge kan lantîr theih?

⁹ Entîrna dang leh chu, mi dangte suala tlûktîrtu, a nih loh leh Jehova rawngbâwlna bânsantîrtu tia sawi theih mi dangte titlutu chunga Jehova thlîr dân hi a ni. Isua chuan: “Tupawh hêng mi ringtu mi tête zînga pakhat pawh titlu apiang chu, an nghâwngah buh râwt sawmna lung lianpui awrhtîrin tuifinriatah thlâk sela, an tân a ṭha zâwk tûr a ni,” tiin a sawi a. (Marka 9:42) Hêng thute hi thu khauh tak a va ni êm! Isua chu a Pa ang chiah a ni tih kan hria a. Chuvângin, miin Isua hnungzui zînga pakhat a tihtlûk chuan Jehova chu a lâwm lo tak zet tih kan chiang a ni.—Johana 14:9.

¹⁰ Mi dangte tihtlûkna chungchângah Jehova leh Isua thlîr dân ang kan nei ve em? Kan thiltihte chuan eng nge a târ lan? Entîr nân, thawmhnaw hâk dân leh inchei dânah duh dân bîk kan nei thei a. Mahse, kan duh dân chuan kohhrana tuemaw a tilung ni lo emaw, mi dangte chu ngaihtuahna bawlhhlawh a neihtîr thei emaw a nih chuan eng nge kan tih ang? Unaute kan hmangaihna chuan kan duh zâwngte chân tûrin min chêttîr ang em?—1 Timothea 2:9, 10.

11, 12. Jehova huat zâwngte hua a, insûmtheihna neih kan tum chuan engtin nge mahni kan invên theih ang?

¹¹ Entîrna pathumna chu hei hi a ni: Jehova chuan dik lohna a hua a ni. (Isaia 61:8) Ni e, ani chuan ṭha famkim lo kan nih avângin thil dik tih chu harsa tih châng kan nei tih a hria a. Sual a huat ang bawkin, keini pawh haw ve tûrin min duh a ni. (Sâm 97:10 chhiar rawh.) Jehova’n sual a huat chhante kan chhût ngun chuan, chu chuan a thil thlîr dân anga thlîr ve tûrin min ṭanpui ang a, thil sualte do thei tûrin chakna min pe ang.

¹² Sual huat dân kan zir chuan, Bible-in thil ṭhenkhat chu a dik lo tih sawi fak lo mah se, a dik loh chhan hre thiam tûrin min ṭanpui ang. Entîr nân, lap dancing an tih nungchang bawlhhlawhna chi khat hi tûn lai khawvêlah a hluar êm êm a. Mi ṭhenkhat chuan, chu chu tuemaw nêna mipat hmeichhiatna hmanna a nih loh avângin thil sualah an ngai lo a ni.a (Footnote en rawh.) Mahse, chu chu Jehova thlîr dân dik tak a ni em? Jehova chuan thil ṭha lo rêng rêng chu a hua tih hre reng ang che. Chuvângin, insûmtheihna lantîrin, Jehova huat zâwngte huain, thil ṭha lo rêng rêng chu i hnaih lo ang u.—Rom 12:9.

NAKINA I TIH TUR CHU TUNAH NGAIHTUAH RAWH

13. Nakina thu tlûkna fing kan siam theih nân engvângin nge Jehova thil thlîr dân chu tûnah kan ngaihtuah ang?

¹³ Zirna kan neih hunah, Jehova thil thlîr dânin thu tlûkna fing siam tûra min ṭanpui theih avângin, chu chu kan ngaihtuah tûr a ni. Tichuan, thu tlûkna siam nghâl ngai dinhmunah kan awm a nih pawhin, kan hlauthâwng lutuk lo vang. (Thufingte 22:3) Bible-a entîrna ṭhenkhat i lo ngaihtuah ang u.

14. Josefa’n Potiphara nupui a chhân lêtna aṭangin eng nge kan zir?

¹⁴ Potiphara nupuiin Josefa thlêm a tum khân, ani chuan a hnâwl nghâl vat a. Josefa chuan inneihna chungchânga Jehova thlîr dân chu a chhût ngun tih a chiang hle. (Genesis 39:8, 9 chhiar rawh.) Ani chuan Potiphara nupui chu: “Engtin nge he sual lian tak hi tiin Pathian chunga thil ka tihsual theih ang?” tiin a hrilh a. Hei hian Pathian thlîr dân angin thil a thlîr tih a târ lang a ni. Kan chungchâng eng nge ni ve? I hnathawhpuiin rawn chhai a tum che a nih chuan engtin nge i tih ang? A nih loh leh, tuemawin phone aṭangin mipat hmeichhiatna lam hawi thu emaw, milem emaw a rawn thawn che chuan eng nge i tih ang?b (Footnote en rawh.) Chûngtiang thila Jehova thlîr dânte kan lo hriat tawh a, kan pawm a, kan tih tûr kan hriat lâwk chuan a laka rinawm chu a awlsam lehzual ang.

15. Hebrai mi pathumte angin, engtin nge Jehova chungah kan rinawm reng theih?

¹⁵ Hebrai mi pathum Sadraka te, Mesaka te, leh Abednegoa te entawn tûr siam hi han ngaihtuah teh. Lal Nebukadnezzara’n a rangkachak milim siam chibai bûk tûra thu a pêk khân, huaisen takin an hnâwl a. Lal an chhân lêtna chuan Jehova chunga an rinawm tlat avânga an chunga thil lo thleng tûrte chu an ngaihtuah lâwk tih a târ lang chiang hle. (Exodus 20:4, 5; Daniela 3:4-6, 12, 16-18) Tûn laiah eng nge ni ve? I hnathawhna pu chuan sakhaw dik lo nêna inkungkaih kût atân pawisa thawh tûrin a phût che a nih chuan eng nge i tih ang? Chutiang thil a thlen hun nghah aiin, Jehova’n chutiang thilte a thlîr dân chu tûn aṭanga kan lo chhût ngun a ṭha ang. Tichuan, chutiang dinhmun a lo thlen hunah, Hebrai mi pathumte angin, thil dik sawi tûr leh ti tûrin a awlsam lehzual ang.

16. Jehova ngaihtuah dân hriat chianna chuan damdawi inenkawlna lama rîkrum thilte kan hmachhawn hunah engtin nge min ṭanpui theih?

¹⁶ Jehova ngaihtuah dân chhût ngunna chuan damdawi inenkawlna lama rîkrum thilte kan hmachhawn hunah rinawm tlat tûrin min ṭanpui ang. Ni e, thisen hlang emaw, thisen pêng bulpui pali emaw chu thun lo tûrin thu tlûkna kan siam tawh ngei mai. (Tirhkohte 15:28, 29) Mahse, Kristian tinin Bible thu bulte ṭanchhana mahnia thu tlûkna siam ngai thisen tela inenkawl dân ṭhenkhatte pawh a awm a ni. Thu tlûkna siam nân eng hun nge ṭha ber? Nâ kan tawrh lai leh thu tlûkna siam vat tûra neksâwrna kan tawh lai ni thei damdawi ina kan thlen hunah a ni em? A ni lo chiang hle. Tûn hi zir bingna neih hun, kan tih duhte leh doctor hnêna kan hriattîr duhte chiang taka sawifiahtu inenkawl dân lehkhate kan neih hun a ni.c (Footnote en rawh.)

17-19. Jehova thil thlîr dânte tûna hriat chu engvângin nge a pawimawh? Entîrna pe rawh.

¹⁷ A tâwp berah, âtthlâk taka Petera fuihna: “Lalpa, Pathianin khawngaih che rawh se,” tih thu Isua’n a chhân lêt nghâlna hi han ngaihtuah teh. Isua chuan Pathianin ti tûra a duhte leh leia a thih dân tûr chungchânga hrilh lâwknate chu ngûn takin a ngaihtuah tih a chiang a. Chu a hriatna chuan Jehova chunga rinawm tlat tûr leh kan vai atâna inthawi nâna a nun pe tûrin chakna a neihtîr a ni.—Matthaia 16:21-23 chhiar rawh.

¹⁸ Tûnah, Pathianin a ṭhian ni tûr leh theih tâwp chhuaha chanchin ṭha hril tûrin min duh a. (Matthaia 6:33; 28:19, 20; Jakoba 4:8) Mahse, Petera’n Isua chunga a tih angin, mi ṭhenkhatin thiltum ṭha tak neiin min tilunghnual mai thei a ni. Entîr nân, i hnathawhna pu chuan sum tam zâwk hmuh theihna hna ṭha tak a pe che a; mahse, dar kâr tam tak hna i thawh a ngaih bâkah, inkhâwm tûr leh kohhran ruala thu hril tûrin hun i pe thei dâwn lo tih i hria a. A nih loh leh, school kal lai i ni a, i zirtîrtu chuan zirna sâng zâwk i hmuh theih nân in aṭanga hmun hla taka insawnna hun remchâng i nei tih a hrilh che a. Chûng thil chu thleng ta se, thu tlûkna i siam hmain ṭawngṭai leh zir bingna neih te, chhûngkaw zînga mi pakhat emaw, kohhran upate emaw biak a ngai ang em? Jehova’n chhûng thilte a thlîr dân tûna i hriat a, a ngaihtuah anga i ngaihtuah chu a ṭha a ni. Tichuan, chûng thilte i hmachhawn hunah, i tân thlêmna a tling tham lo tih i hmu ang. Jehova rawngbâwlna ngaihven tlat i tum tawh avângin i tih tûr dik tak chu i hria a ni.

¹⁹ Jehova chunga i rinawmna fiah thut thei dinhmun dangte pawh i ngaihtuah chhuak mai thei a. Ni e, dinhmun tin atân kan inbuatsaih thei lo ngei mai. Mahse, mi mal inzirna kan neih laiin Jehova ngaihtuahnate kan chhût ngun chuan kan thu zirte chu kan hre chhuak leh theiin, dinhmun hrang hranga kan nunpui theih dân kan hria ang. Chuvângin, inzirna i neih hunah, Jehova thil thlîr dânte chu hmuh chhuah tumin, a ngaihtuah angin ngaihtuah tum la, tichuan tûnah leh nakin huna thu tlûkna fing siam tûra min ṭanpui theih dânte ngaihtuah ang che.

JEHOVA NGAIHTUAHNA LEH I NAKIN HUN

20, 21. (a) Engvângin nge khawvêl tharah kan zalênna kan chên ang? (b) Tûnah pawh engtin nge nun kan chên theih?

²⁰ Kan vai hian khawvêl thar chu kan nghâkhlel tak zet a. Lei Paradis-a chatuana nun chu kan beisei ṭheuh a ni. Pathian Ramah chuan he khawvêla kan tawrh natna leh hrehawmna zawng zawng lak ata kan zalên tawh ang. Ni e, kan duh zâwng leh kan ngainat zâwng ang zêla duh thlanna siam tûrin zalênna kan la nei tho ang.

²¹ Mahse, kan zalênna chu chin tâwk nei lo tihna erawh a ni lo. Mi thuhnuairawlh chuan Jehova dânte leh ngaihtuahnate ṭanchhanin thu tlûkna a la siam tho ang a. Chu chuan hlimna leh thlamuanna nasa tak a thlen ang. (Sâm 37:11) Chu hun a la thlen hma pawhin, Jehova ngaihtuah anga kan ngaihtuah chuan tûnah ngei pawh kan hlim thei a ni.