Insûmtheihna Nei Rawh

1, 2. (a) Insûmtheihna tlâkchhamnain eng nge a thlen theih? (b) Engvângin nge insûmtheihna chungchâng kan sawiho a ngaih?

INSUMTHEIHNA hi Pathian Jehova ṭanpuinaa neih theih mizia pakhat a ni a. (Galatia 5:22, 23) Jehova chuan insûmtheihna ṭha famkim a nei a. Keini mi ṭha famkim lote erawh chuan kan nei lo. Dik tak chuan, tûn laia buaina tam tak a awm chhan chu mite’n insûmtheihna an tlâkchham vâng a ni. Chu chuan mi chu thil pawimawhte tlai khawhnua ti tûrin emaw, school-ah leh hnathawhnaah inthlahdah taka thil ti tûrin emaw a chettîr mai thei. Insûmtheihna tlâkchhamna chuan ṭawngkam ṭha lo hman te, zu ruihna te, nunrâwnna te, nupa inṭhenna te, ṭûl lo taka leibâ neihna te, ngawlveina te, lung in tânna te, rilru natna te, mitpat hmeichhiatna hman avânga inkai chhâwn theih natna te, leh sâwn painate a thlen thei a ni.—Sâm 34:11-14.

² Insûmtheihna nei lote chuan mahni leh midangte chungah buaina an thlen fo ṭhîn a. Hunte a liam zêl rual hian, mite chuan insûmtheihna an tlachham tawlh tawlh tih a chiang hle a. Chu chu mak kan ti tûr a ni lo, Pathian Thuin insûmtheihna tlâkchhamna hi “ni hnuhnûngahte” kan awm tih finfiahtu nia a hrilh lâwk vâng a ni.—2 Timothea 3:1-3.

3. Engvângin nge insûmtheihna kan neih a ngaih?

³ Engvângin nge insûmtheihna kan neih a ngaih? Chhan ṭha tak pahnih a awm a. A hmasain, rilru veizâwng thunun theitute chuan a tlângpui thuin buaina an nei tlêm ṭhîn a. An tân chuan inlaichînna ṭha neih leh thinurna te, lungngaihna te, mangannate pumpelh pawh a awlsam a ni. Pahnihnaah, Pathian ṭhian ni rêng tûr chuan thlêmnate kan do va, châkna ṭha lote kan thunun a ngai a. Chu tak chu Adama leh Evi te tih loh chu a ni. (Genesis 3:6) Anmahni ang bawkin tûn laia mi tam tak chuan insûmtheihna an neih loh avângin buaina khirh tak tak an tâwk a ni.

4. Châkna ṭha lo thunun harsa titute tân eng thlamuanna nge awm?

⁴ Jehova chuan ṭha famkim kan nih loh avângin kan tân insûmtheihna neih a harsa tih a hria a. Chuvângin, kan châkna ṭha lote thunun thei tûrin min ṭanpui a duh a ni. (1 Lalte 8:46-50) Ani chuan hmangaihna nei tak ṭhian angin, rilru veizâwng leh châkna thunun harsa titute chu ngilnei takin a fuih a. He thuziakah hian insûmtheihna chungchânga Jehova entawn tûr siam chu kan zir ang a. Chu bâkah, Bible-a târ lan entawn tûr ṭha leh ṭha lote chungchâng kan sawiho ang a, min ṭanpui theitu thurâwn ṭha tak takte kan enho bawk ang.

JEHOVA’N ENTAWN TUR A SIAM

5, 6. Insûmtheihna chungchângah Jehova’n kan tân eng entawn tûr nge a siam?

⁵ Jehova chu kawng tin rênga a ṭhat famkim avângin insûmtheihna ṭha famkim a nei a. (Deuteronomy 32:4) Mahse, keini erawh chu ṭha famkim kan ni lo. Ṭha lehzuala amah kan entawn theih nân a entawn tûr siamte chu kan bih chian a ngai a. Chu chuan min tilunghnual thei thil a thlen hunah ṭha taka chhân lêt dân hre tûrin min ṭanpui ang. Insûmtheihna chungchânga Jehova entawn tûr siam ṭhenkhat chu eng nge ni?

⁶ Eden huana Setana a hel laia Jehova chhân lêt dân kha han ngaihtuah teh. Diabola puhna chuan vâna Pathian chhiahhlawh rinawm zawng zawngte chu a tiṭhawngin, a tithinrimin, leh zah lohna a neihtîr mai thei a. Setana vânga lo awm hrehawmna zawng zawng i ngaihtuah hian nang pawh chutiang chuan i awm ve mai thei. Mahse, Jehova chuan a lutukin a chhâng lêt lo va. Dik takin a chhâng lêt mai a ni. Setana a hel khân, Jehova chu a thinur nghâl mai lova, fel takin a chingfel zâwk a ni. (Exodus 34:6; Joba 2:2-6) Engvângin nge? Jehova chuan tumah an boral a duh lova, ‘mi zawng zawng lo sim a duh’ avângin hun engemaw chen a pe zâwk a ni.—2 Petera 3:9.

7. Jehova entawn tûr siam aṭangin eng nge kan zir theih?

⁷ Jehova entawn tûr siam chuan thu kan sawi hmaa ngun taka kan ngaihtuah a ngai tih leh chhâng lêt nghâl mai lo tûrin min zirtîr a. Thu tlûkna pawimawh tak siam a ngaih hunah hun engemaw chen kan pêk a ngai a ni. Chuvângin, thu dik sawi a, thil ṭha ti tûrin finna dîl ang che. (Sâm 141:3) Kan thinrim emaw, kan lunghnual emaw hian a lutuka chhân lêt a awl hle a. Chuvângin, mi tam tak chu ngaihtuah hmasa lova thu an sawi avâng leh thil an tih avângin an inchhîr leh ṭhîn a ni!—Thufingte 14:29; 15:28; 19:2.

PATHIAN CHHIAHHLAWHTE ZINGA ENTAWN TUR ṬHATE LEH ṬHA LOTE

8. (a) Insûmtheihna chungchânga entawn tûr ṭha chu khawiah nge kan hmuh theih? (b) Potiphara nupui thlêmna do thei tûrin Josefa chu engin nge ṭanpui? (A thupui chunga milem en rawh.)

⁸ Bible-a tute entawn tûr siamin nge insûmtheihna hlutzia târ lang? I ngaihtuah theih pakhat chu Jakoba fapa Josefa a ni. Pharaoa vêngtu zînga hotu ber, Potiphara ina hna a thawh laiin thlêmna a do a ngai a. Ani chu ‘mi tlâwntlai ṭha tak leh hmêl ṭha tak a nih’ avângin Potiphara nupui chuan a ît a, tichuan vawi tam tak a thlêm a ni. Thlêmna do tûrin Josefa chu engin nge ṭanpui? Chutiang thlêmnate a tawh huna thil thleng thei tûrte chu ngun takin a lo ngaihtuah lâwk a ni ngei ang. A hnuah, a silhfêna man a nih chuan a tlânsan ta a. Ani chuan: “Engtin nge he sual lian tak hi tiin Pathian chunga thil ka tihsual theih ang?” a ti a ni.—Genesis 39:6, 9; Thufingte 1:10 chhiar rawh.

9. Thlêmnate do thei tûrin engtin nge i inbuatsaih theih?

⁹ Josefa entawn tûr siam aṭangin eng nge kan zir theih? Pathian dân bawhchhe tûra thlêm kan nih chuan, chu chu kan do a ngai a. Jehova Thuhretu an nih hmain mi ṭhenkhat chuan a lutuka ei leh in te, zial zûk te, ruihhlo hman te, nungchang bawlhhlawhna te, leh thil dang chîn dân ṭha lote hneh tumin an bei nasa hle a. Baptisma an chan hnuah pawh chûng thil tih châkna neih châng an la nei mai thei a ni. Chutiang thil i chunga a thlen huna, thlêmna i do hneh loh chuan, Jehova nêna in inlaichînna a chhiat dân tûr chu ngun takin ngaihtuah ang che. I tâna thlêmna ni thei dinhmunte chu hriat tum la, chûng dinhmunte i pumpelh theih dân tûr chu ngaihtuah rawh. (Sâm 26:4, 5; Thufingte 22:3) Chutiang fiahnate i hmachhawn a nih chuan, do thei tûra finna leh insûmtheihna pe tûr chein Jehova hnênah ṭawngṭaiin dîl ang che.

10, 11. (a) School-a ṭhalaite chungah eng thilte nge thleng ṭhîn? (b) Pathian dân bawhchhe tûra thlêmna do thei tûrin Kristian ṭhalaite chu engin nge ṭanpui thei?

¹⁰ Josefa chunga thil thleng ang chu tûn laia Kristian ṭhalai tam takte chungah a thleng a. Entîrna pakhat chu Kim-i hi a ni. A school kalpuite chuan chawlhkâr tâwpa mipat hmeichhiatna an hman thute chu inchhuang takin an sawi ṭhîn a. Kim-i chuan chutiang sawi tûr engmah a nei ve lo. A danglam bîkna avângin mite “hnâwl leh mal tak” nia inngaih châng a nei a, mipa a kawp ve loh avângin mi ang lo anga an ngaih châng pawh a awm tiin a sawi a ni. Mahse, Kim-i chu mi fing tak a ni zâwk. Ani chuan tleirâwl laiin mitpat hmeichhiatna hmang tûra thlêmna chu a nasa hle tih a hria a. (2 Timothea 2:22) A school kalpuite chuan Kim-i chu a la virgin reng leh reng lohte an zâwt ṭhîn a. Chu chuan mipat hmeichhiatna a hman loh chhan hrilhfiahna hun remchâng a pe a ni. Nungchang bawlhhlawhna hmang tûra nêksâwrnate do tlattu kan Kristian ṭha laite chu kan chhuang tak meuh va, Jehova pawhin a chhuang hle che u a ni!

¹¹ Nungchang bawlhhlawh tûra thlêmnate do lo mi ṭhenkhat chungchâng pawh Bible in a sawi a. Chu chuan insûmtheihna neih lohnain rah ṭha lo a chhuah tih a târ lang a ni. Kim-i dinhmun ang i tawng ve a nih chuan, Thufingte bung 7-a tlangvâl hriatna nei lo chungchâng hi ngaihtuah la, Amnona leh a thiltih rah ṭha lo tak pawh ngaihtuah bawk ang che. (2 Samuela 13:1, 2, 10-15, 28-32) Nu leh pate chuan chhûngkaw Pathian biaknaah chûng chanchinte chu an fate sawihopuiin, insûmtheihna leh finna nei tûrin an ṭanpui thei a ni.

12. (a) Engtin nge Josefa’n a unaute hmaah a insûm tlat? (b) Eng dinhmunahte nge kan rilru kan thunun a ngaih?

¹² Ṭum dangah pawh, Josefa chuan insûmtheihna chungchângah entawn tûr ṭha a siam a. Chu chu Aigupta rama a unaute’n buh lei tûra an rawn kal ṭum khân a ni a. Josefa chuan an rilru dik tak a hriat duh avângin, an unaupa a nih thu a hrilh duh lo va. A insûm zawh tâk lohvah chuan a unaute chu chhuahsanin pindanah a va ṭap ta a ni. (Genesis 43:30, 31; 45:1) Unaupa emaw, unaunu emawin a tithinrim che a nih chuan, insûmtheihnna kawnga Josefa entawn tûr siam entawnna chuan a hnua i inchhîr lehna tûr thu sawi lo tûr leh thil ti lo tûrin a ṭanpui ang che. (Thufingte 16:32; 17:27) A nih loh leh, hnawhchhuaha awm chhûngkhatte i nei mai thei a. Chutiang a nih chuan, ṭûl lo taka inbiak pawhna nei lo tûrin i rilru i thunun a ngai ngei ang. Chutianga tih chu a harsa pawh a ni thei a. Mahse, Jehova entawn tûr siamte i entawn a, a thupêkte i zâwm tih i inhriat chuan chutianga tih chu a awlsam lehzual ang.

13. Lal Davida nuna thilthlengte aṭangin eng nge kan zir theih?

¹³ Lal Davida entawn tûr siam chu kan hlâwkpui thei a. Saula leh Simeiate’n tihthinrim an tum khân Davida chu a thinrim duh lova, a nih loh leh an chûngah a thuneihna a hmang lo. (1 Samuela 26:9-11; 2 Samuela 16:5-10) Mahse, Davida chu eng lai pawha insûmtheihna nei mi a ni bîk lo. Chu chu Bath-sebi chunga a thilsual tih leh mi duhâm Nabala a chhân lêt dânah kan hmu thei a ni. (1 Samuela 25:10-13; 2 Samuela 11:2-4) Davida hnên aṭangin thil pawimawh takte kan zir thei a. Pakhatnaah chuan, Pathian mite zînga hruaitute chuan an thuneihna an hman sual loh nân a bîk takin insûmtheihna an neih a ngai a. A pahnihnaah, tumahin thlêmna laka tlâwm ngai lo tûra inngaiin an inring tâwk lutuk tûr a ni lo.—1 Korinth 10:12.

THIL ṬHA I TIH TEIHTE

14. Unaupa pakhatin eng thiltawn nge a neih a, engvângin nge chutiang dinhmuna kan chhân lêt dân chu a pawimawh?

¹⁴ Insûmtheihna i neih lehzual nân eng nge i tih theih? Luigi-a thiltawn hi han ngaihtuah teh. Motor pakhat chuan Luigi-a motor hnunglam chu a rawn su a. A sutu thiam loh ni mah se, Luigi-a chu a ânkhum ta chiam a, kutthlâk hial pawh a tum a ni. Luigi-a chuan rilru dam taka awm thei tûrin Jehova hnênah a ṭawngṭai a, amah sutu chu zaidam takin a chhâng a. Mahse, chu pa chuan a la ânkhum zêl a. Luigi-a chuan company aṭanga zângna dawmna hmu thei tûrin a ziahsak a, ânkhum a nih lai chuan a kalsan ta a ni. Chawlhkâr khat hnuah, Luigi-a chuan nu pakhat hnênah tlawhkîrna a nei a. Chu nu pasal chu a motor sutu kha a lo ni reng a! Ani chu a zak hle a, a chêt dân mawi lo tak avângin ngaihdam a dîl a ni. Ani chuan Luigi-a chu a motor siam ṭhat nân company aṭanga zângna dawmna a dîlsak a. A nupui Bible zirnaah têl vein nuam a ti hle a. Luigi-a chuan motor insut hnua rilru dam taka awm a pawimawhzia leh lo thinrim ta se, a hnua thil awm dân tûr chu zahthlâk tak a ni ang tih a thiltawn aṭangin a hria a ni.—2 Korinth 6:3, 4 chhiar rawh.

15, 16. Bible zirnain nang leh i chhûngte chu insûmtheihnna nei chho tûrin engtin nge a ṭanpui theih?

¹⁵ Hunbi dik tak leh awmze nei taka Bible zirna chuan Kristiante chu insûmtheihna nei chho zêl tûrin a ṭanpui thei a. Pathianin Josua hnêna a sawi hi hre reng rawh: “He dân bu hian i kâ chu chhuahsan hlek suh se; chu mi thu ziak zawng zawng chu i zawm tlat theih nân chhûn leh zân i ngaihtuah zâwk tûr a ni: tichuan i kawngte chu i lo titluang zel ang a, i lo hmuingîl zêl dâwn nia,” tih hi. (Josua 1:8) A nih leh, engtin nge Bible zirna chuan insûmtheihna nei chho tûra a ṭanpui theih che?

¹⁶ Insûmtheihna neih kan hlâwkpui dân leh kan neih loh avânga harsatna kan tawrh dân târ langtu Bible-a entîrnate chu kan hre tawh a. Jehova’n hêng entîrnate hi chhan ṭha tak avângin a ziak a ni. (Rom 15:4) Chûngte chu kan chhiar a, kan zir a, ngun taka kan ngaihtuah chuan kan tân a finthlâk ang. Chu bâkah, chhûngkuaa in nunpui theih dânte hriat tum bawk rawh. Bible-a Jehova thurâwn pêkte nunpui thei tûrin a hnênah ṭanpuina dîl ang che. Dinhmun ṭhenkhatah insûmtheihna i tlachham tih i inhriat chuan, zêp suh ang che. Chu mi chungchângah ṭawngṭai la, hmasâwn thei tûrin theih tâwp chhuah bawk rawh. (Jakoba 1:5) Ṭanpui theitu tûr thurâwn ṭangkai tak i hmuh theih nân kan thu leh hla chhuahahte zawng ang che.

17. Eng kawngtein nge nu leh pate’n an fate chu insûmtheihna nei tûra an ṭanpui theih?

¹⁷ Insûmtheihna nei tûrin i fate chu engtin nge i ṭanpui theih? Nu leh pate chuan he mizia hi an fate’n an pianpui lo tih an hria a. Chuvângin, entawn tûr ṭhate siamin an fate chu mize ṭha an zirtîr a ngai a ni. (Ephesi 6:4) I fate’n insûmtheihna an nei lo tih i hriat chuan, entawn tûr ṭha i siam nge siam lo tih inzâwt ang che. Rawngbâwlnaah leh inkhâwmnaahte tel ziahna leh chhûngkuaa Pathian biakna kaihruaiin entawn tûr ṭha i siam thei a. A ṭul chuan i fate hnênah ‘a theih loh’ tih sawi hreh suh ang che! Jehova chuan Adama leh Evi te tân phal chin a nei a. Chutianga chin tâwk neihna chuan Jehova thuneihna zahthiam tûrin a ṭanpui thei a ni. Chutiang bawkin, nu leh pate’n an fate an thunun a, entawn tûr ṭha an siam chuan, an fate chu insûmtheihna nei tûrin a ṭanpui ang. I fate chu Pathian thuneihna ngaina tûr leh a tehnate zah tûra i zirtîr chuan, chu chu an neih theih azawnga thil hlu ber a ni ang.—Thufingte 1:5, 7, 8 chhiar rawh.

18. Engvângin nge fing taka ṭhian kan thlan a ngaih?

¹⁸ Nu leh pa kan ni emaw, ni lo emaw pawh ni se, kan vai hian fing takin ṭhiante kan thlang tûr a ni a. I ṭhiante’n Jehova an hmangaih chuan, thiltum ṭha tak nei tûr leh buainate pumpelh tûrin an tichak ang che. (Thufingte 13:20) An entawn tûr ṭha siam chuan anmahni anga insûmtheihna nei tûrin a ṭanpui bawk ang che. I nungchang ṭhain anni pawh chutiang ni ve tûrin a ṭanpui ang tih a chiang a ni. Insûmtheihna kan neih chhoh chuan Pathian pawm kan hlawh ang a, kan nun a hlimin, kan hmangaihte nên thil ṭha kan chên thei ang.