Nun Tihsamkhainain Hlimna A Thlen

DANIEL-A LEH MIRIAM-I te chu kum 2000, September thla khân an innei a, Spain ram, Barcelona khawpuiah nuam takin an awm a ni. Daniel-a chuan: “Kan hnathawh a ṭhat avângin restaurant changkâng tak takah chaw kan ei thei a, ram dangahte kan zin theiin, thawmhnaw manto tak takte kan ha thei a. Thlawhhma rawngbâwlnaahte pawh kan tel ziah bawk,” tiin a sawi a. Mahse, chumi hnu chuan thil danglam tak a thleng a ni.

Kum 2006, inkhâwmpuia thusawi pakhatah Daniel-a chuan: “Thah mai tûrte chu” chatuan nunna kawnga hruai tûrin theih tâwp kan chhuah em?” tih zawhna chu a hria a. (Thufingte 24:11) Mite nunna chu Bible thuchaha a innghah avângin chu thuchah puang tûrin mawhphurhna kan nei tih, chu thusawi chuan a târ lang a ni. (Tirhkohte 20:26, 27) Chutih lai chuan, “Jehova’n mi rawn bia angin ka inhria,” tiin a sawi. Thusawi chuan Jehova rawngbâwlnaa kan tel tam poh leh kan hlim lehzual dâwn tih pawh a târ lang bawk a. Miriam-i chu pioneer a thawh ṭan tawh avângin a hlim hle tih Daniel-a’n a hmuh chuan inkhâwmpuia thusawi chu a dik tih a hre ta a ni.

Chu thusawi chuan Daniel-a thinlung chu a khawih êm avângin a nunah inthlâk danglamna lian tak siam a tum ta a. Dârkâr tlêmtê hna thawkin, pioneer a thawk ṭan a, tichuan Lalram thupuangtute mamawh lehzualna hmunah nupaa rawng an bâwl theih chuan an hlim dân tûrte a ngaihtuah bawk a ni.

A HMASAIN HARSATNA—AHNUAH CHANCHIN LAWMAWM

Kum 2007, May thla khân, Daniel-a leh Miriam-i te chuan an hnathawh chu bânsanin, tûn hmaa an lo zin tawhna Panama ramah an insawn ta a. An thu hrilhna bial chu Caribbean Tuipuia awm Bocas del Toro Archipelago thliarkâr hrang hrangahte a ni. Chuta chêng a tam zâwkte chu Guaymi hnamte an ni a. An nupa chuan an pawisa khâwlsa nên Panama ramah thla riat vêl awm theih an inring a ni.

Thliarkârahte chuan lawnglêng leh thîrsakawrte hmangin an zin kual a. Khawlum lai taka, thîrsakawr khalha kilometer 30 (mêl 20) vêl tlâng kawnga an kal hmasak ber ṭum chu an la hre reng a. Chumi ṭum chuan Daniel-a chu a hahin a chau hle a. Guaymi hnamte chu khualchhâwn thiam tak an ni a, a bîk takin, an nupaa tualchhûng ṭawng tlêm azâwng an thiam hnuah a ni lehzual. Rei vak lovah, Bible zirpui 23 lai an nei a ni.

An pawisa neih zawng zawng a zawh tâkah chuan eng nge thleng ta? Daniel-a chuan: “Kan mittuite pawh a tla hial a, Spain rama kîr leh kan ngaihtuah ṭan a. Kan Bible zirpuite hnutchhiah chu nuam kan ti lo hle,” tiin a sawi. A hnu thla khat vêlah, chanchin lâwm awm tak an dawng ta a. Miriam-i chuan: “Special pioneer thawk tûra sâwm kan ni a. Rawng kan bâwl chhunzawm thei chu a va hlim awm tak em!” tiin a sawi.

AN HLIMNA BER

Inawpna pâwl inthlâk danglamna avângin, Daniel-a leh Miriam-i te chu kum 2015-ah special pioneer aṭangin an châwl a. Tûnah eng nge an tih tâk? Sâm 37:5-a “I awm dân tûr chu LALPA chungah nghat la; amah chu ring la, aman a ti vek ang,” tih thutiam chu an ring tlat a. Hna an hmuh tâk avângin mahni inchâwmin regular pioneer an thawk a, tûnah chuan Panama ram, Veraguas kohhranah rawng an bâwl a ni.

Daniel-a chuan: “Spain ram kan chhuahsan hmain samkhai taka kan nun theih dâwn leh dâwn loh kan hre chiang lo. Mahse, tûnah chuan samkhai takin kan nung a, kan mamawhte chu kan tlachham bîk lo,” tiin a sawi. An hlimna chhan ber chu eng nge ni? Heti hian an sawi: “Jehova chanchin hre tûra mi inngaitlâwmte ṭanpuina chuan tehkhin rual loh hlimna a thlen a ni!” tiin.