“Jehova Kan Pathian Chu Jehova Pakhat Chauh A Ni”

1, 2. (a) Engvângin nge Deuteronomy 6:4-a thu hi hriat hlawh tak a nih? (b) Engvângin nge Mosia’n chûng thu chu a sawi?

KUM za tam tak chhûng chu, Juda mite chuan Deuteronomy 6:4-a thute hi a bîk taka ṭawngṭainaah an chham ṭhîn a. He ṭawngṭaina hi Shema tia koh a ni a, chu Bible chânga Hebrai thu mal hmasa ber a ni. Juda mi tam tak chuan, Pathian hnêna an inpêkna pumhlûmzia târ lan nân, chu ṭawngṭaina chu zîngah leh tlaiah nî tin an chham ṭhîn a ni.

² Chûng thute chu Israelte tâna Mosia thusawi hnuhnûng berte zînga mi a ni a. Krista hun hma kum 1473 khân, Israelte chu Moab rama awmin, Jordan Lui kâna Ram Tiam la tûrin a inpeih a ni. (Deuteronomy 6:1) Mosia chuan anni chu kum 40 chhûng a hruai tawh a, harsatna an tawh tûrte hmachhawn ngam tûrin a duh a ni. An Pathian Jehova chu rinchhanin, a laka an rinawm a ngai a. Mosia thusawi hnuhnûng ber chuan chutianga ti tûrin anni chu a tichak a ni. Mosia chuan Jehova hnên aṭanga a dawn Thu Sâwm Pêkte leh thupêk dangte a sawi hnuah, Deuteronomy 6:4-a kan hmuh hriat nawntîrna thiltithei tak chu a hrilh a ni. (Chhiar rawh.)

3. He thuziakah hian eng zawhnate nge kan ngaihtuah ang?

³ Israel mite chuan Jehova an Pathian chu, “Jehova pakhat chauh” a ni tih an hria a. Israel mi rinawmte chuan an thlahtute Pathian, Pathian pakhat chauh chu an bia a ni. Chuti chu, engvângin nge Mosia’n an hnênah an Pathian Jehova chu, “Jehova pakhat chauh” a ni tih a hriat nawntîr? Chu thutak leh kan Pathian chu thinlung zawng zawng, thlarau zawng zawng, leh chakna zawng zawnga hmangaihna chuan eng inzawmna nge a neih? Deuteronomy 6:4, 5-a thute hi engtin nge kan tân pawh a nih?

KAN PATHIAN CHU, “JEHOVA PAKHAT CHAUH” A NI

4, 5. (a) “Jehova pakhat chauh” tih ṭawngkam awmze pakhat chu eng nge ni? (b) Engtin nge Jehova chu hnamte pathian laka a danglam?

⁴ A danglam bîk. “Jehova pakhat chauh” tih ṭawngkam hi Jehova chu a danglam bîk a, tuma tluk loh leh amah ang tumah dang an awm lo tihna a ni. Engvângin nge Mosia’n chu ṭawngkam chu a hman? Trinity rinna a dik lo tih finfiah nân a hmang niin a lang lo. Jehova chu vân te, lei te Siamtu leh lei leh vâna Rorêltu a ni a. Pathian dik awmchhun a ni a, amah ang pathian dang rêng an awm lo. (2 Samuela 7:22) Chuvângin, Mosia thusawite chuan Israel mite chu Jehova chauh an be tûr a ni tih a hriat nawntîr ngei ang. An chhehvêla awm pathian dik lo betute chu an entawn tûr a ni lo. Chûng mite chuan an pathiante’n leilung dân ṭhenkhat an thunun theih an ring a ni.

⁵ Entîr nân, Aigupta mite chuan ramsa tam tak bâkah, ni pathian Ra te, vân pathiannu Nut te, lei pathian Geb te, leh Nile Lui pathian Hapi te chu an bia a. Jehova chuan Hri Sâwm thlentîrin, chûng pathiante aia a ropui zâwkzia a târ lang a ni. Kanaan mite biak ber pathian chu pathian dik lo, Kanaan mite’n an mahni siamtua an ngaih Baala a ni a. Ani chu vân pathian, ruah pathian, leh thlipui pathian ni bawka ngaih a ni. Hmun tam takah, mite chuan Baala vênhimna chu an rinchhan a ni. (Number 25:3) Israelte chuan an Pathian chu “Pathian tak” danglam bîk a ni tih an hre tûr a ni a. Ani chu “Jehova pakhat chauh” a ni.—Deuteronomy 4:35, 39.

6, 7. “Pakhat chauh” tih ṭawngkam awmze dang leh chu eng nge ni a, Jehova chuan “pakhat chauh” a nihzia engtin nge a târ lan?

⁶ Inthlâk Ngai Lo leh Rinawm. “Jehova pakhat chauh” tih ṭawngkama “pakhat chauh” tih thumal chu a thiltum leh a thiltihah a rin tlâk reng tihna a ni bawk a. Pathian Jehova chu ṭhen hran theih emaw, sawi lâwk theih loh emaw a ni lo. Ani chu englai pawha rin tlâk, inthlâk ngai lo, rinawm, leh dik tak a ni. Entîr nân, Abrahama hnênah a thlahte chuan Ram Tiam an luah ang tih a tiam a. Chu a thutiam vawng tûrin Jehova chuan thilmak tam tak a ti a ni. Chu thu a tiam aṭanga kum zali leh sawm thum a liam hnuah pawh Jehova chuan a thiltum chu a thlâk danglam chuang lo.—Genesis 12:1, 2, 7; Exodus 12:40, 41.

⁷ Kum za tam tak a liam hnuah, Jehova chuan Israel mite chu a thuhretute tiin a ko va, an hnênah: “Amah chu ka ni. . . . Ka awm hmâ chuan Pathian rêng rêng din an awm lo va, ka awm hnuah pawh an awm hek lo vang,” tiin a hrilh a. Jehova chuan: “Ni awm achinah khân kei hi amah chu ka ni,” tia sawi belhin, a thiltum a thlâk danglam ngai lo tih a tichiang bawk. (Isaia 43:10, 13; 44:6; 48:12) Inthlâk ngai lo leh rinawm reng Pathian rawng an bâwl thei chu Israelte tân chanvo ropui a va ni tak êm! Tûn laiah pawh chu chanvo chu kan nei a ni.—Malakia 3:6; Jakoba 1:17.

8, 9. (a) Jehova chuan amah betute lakah eng nge a phût? (b) Engtin nge Isua’n Mosia thusawite awmzia chu a sawi uar?

⁸ Ni e, Mosia chuan Jehova’n anmahni a hmangaihna leh a ngaihsakna chu a inthlâk danglam ngai lo tih Israel mite a hriat nawntîr a. Chutah, Jehova’n anni chu a hnêna inpe pumhlûm tûr leh thinlung zawng zawng, thlarau zawng zawng, leh chakna zawng zawnga amah hmangaih lêt tûrin a beisei a ni. Naupangte pawhin Jehova chauh an biak theih nân, nu leh pate chuan hun remchâng an neih apiang chu an fate Jehova chungchâng zirtîr nân an hmang tûr a ni.—Deuteronomy 6:6-9.

⁹ Jehova chuan a thiltum a thlâk danglam ngai loh avângin, betu dikte laka a thil phût bulpuite chu a thlâk danglam ngai lo vang. Kan biakna Jehova’n a lawm kan duh chuan, a hnênah kan inpe pumhlûmin, thinlung zawng zawng, rilru zawng zawng, leh chakna zawng zawngin amah kan hmangaih tûr a ni. Isua’n chu chu thupêk ropui ber a ni tih a sawi. (Marka 12:28-31 chhiar rawh.) “Jehova kan Pathian chu Jehova pakhat chauh a ni,” tih kan rinzia thiltiha kan lantîr theih dân i lo zir ang u.

JEHOVA HNENAH INPE PUMHLUM RAWH

10, 11. (a) Eng kawngin nge Jehova kan biakna chu a pumhlûm? (b) Engtin nge Hebrai râwlthar pathumte chuan Babulon-a an awm laiin, Jehova hnêna an inpêkna a pumhlûmzia an târ lan?

¹⁰ Jehova chu kan Pathian neih chhun a ni a. Amah chauh kan biak hian a hnênah kan inpe pumhlûm tihna a ni. Pathian dang rêng rêng kan be thei lo va, Jehova kan biaknaah ngaih dân dik lo leh thiltih dik lo kan telh thei hek lo. Ani chu pathian dangte chunga awm a, an aia thiltithei zâwk mai a ni lo. Pathian dik a ni a. Amah chauh kan be tûr a ni.—Thu Puan 4:10, 11 chhiar rawh.

¹¹ Daniela buah, Hebrai râwlthar Daniela te, Hanania te, Misaela te, leh Azaria te chungchâng kan chhiar a. Anni chuan Jehova betute tâna thianghlim lo lal chaw chu ei lovin, Jehova hnêna an inpêk pumhlûmzia an târ lang a ni. Chu bâkah, Daniela ṭhian pathumte chuan Nebukadnezza rangkachak milim chu chibai an bûk duh lo bawk. An nunah Jehova an dah hmasa ber a. A chungah an rinawm nghet tlat a ni.—Daniela 2:1-3:30.

12. Jehova hnêna kan inpêk pumhlûmna kawngah, eng lakah nge kan fîmkhur ngai?

¹² Jehova chu kan nunah kan dah hmasa ber tûr a ni a. A hnêna kan inpe pumhlûm duh a nih chuan, thil dangin a hmun luahlân lo tûrin kan fîmkhur tûr a ni. Chu thil dang chu engte nge ni thei ang? Thu Sâwm Pêkah khân, Jehova chuan a mite’n pathian dang an be tûr a ni lo tih a sawi a. Milem biakna thiltih engah mah an tel tûr a ni lo. (Deuteronomy 5:6-10) Tûn lai hian, milem biakna chi hrang hrang a awm a, chûng zînga ṭhenkhat chu hriat a har mai thei. Mahse, Jehova chuan a thil phûtte chu a thlâk danglam lo. Ani chu, “Jehova pakhat chauh” a la ni reng a ni. Tûn laiah milem biakna kan pumpelh theih dân i lo en ang u.

13. Jehova aiin eng nge kan hmangaih zâwk ṭan theih?

¹³ Kolossa 3:5-ah Jehova nêna kan inṭhianna ṭha tak tichhe thei thilte chungchâng kan chhiar a. (Chhiar rawh.) Duhâmna chu milem biakna nên a inkûngkaih tih kan hmu a ni. Engtin nge a inkûngkaih? Sum tam tak, a nih loh leh nawm chenna ang chi thilte châkna nasa tak kan neih hian, chu chuan pathian chak tak angin kan nun a thunun thei a. Kolossa 3:5-a târ lan thil sual zawng zawng hi milem biakna chi khat, duhâmna nên a inkûngkaih vek a ni. Chuvângin, chûng thilte châkna nasa tak kan neih chuan, Pathian aiin kan hmangaih zâwk thei a. Chutiang a nih chuan, Jehova chu kan tân, “Jehova pakhat chauh” a ni tawh lo vang. Chutiang kan chunga a thlen chu kan duh ngai hauh lo vang.

14. Tirhkoh Johana chuan Pathian kan hmangaihna chungchângah eng vaukhânna nge min pêk?

¹⁴ Tirhkoh Johana chuan chutiang bawk thil chu a sawi uar hle a. Miin khawvêla thil awm, “tisa châkna te, mit châkna te, dam chhûng ropuina lem te” hi a hmangaih chuan, “Pa a hmangaihna amahah a awm lo,” tiin a vaukhân a ni. (1 Johana 2:15, 16) Chuvângin, khawvêl kan hmangaih em tiin kan inenfiah ziah tûr a ni. He khawvêla intihhlimna te, a mite, leh silhfên leh inchei dânte chuan min hîp ṭan tawhin kan inhmu chhuak mai thei a. A nih loh leh, lehkha zir sânga mahni tâna “thil ropui” zawn chu kan duh pawh a ni thei bawk. (Jeremia 45:4, 5) Khawvêl thar a hnai tawh hle a. Chuvângin, Mosia sawi thiltihtheihnaa khat thute chu kan hre reng tûr a va ni êm! “Jehova kan Pathian chu Jehova pakhat chauh a ni,” tih kan hriatthiama kan rin tak zet chuan, a hnênah kan inpe pumhlûmin, a duh angin a rawng kan bâwl ang.—Hebrai 12:28, 29.

KRISTIAN INPUMKHATNA VAWNG RENG RAWH

15. Engvângin nge Paula chuan Kristiante hnênah, Pathian chu “Jehova pakhat chauh” a ni tih a hriat nawntîr?

¹⁵ “Jehova pakhat chauh” tih ṭawngkam hian Jehova chuan a chhiahhlawhte chu inpumkhat tûr leh an nunah thiltum inang nei tûrin a duh tih hre thiam tûrin min ṭanpui a. Kristian kohhran hmasaah chuan, Juda mite, Grik mite, Rom mite, leh hnam dang mite an awm a ni. An ṭobul te, an chîn dân te, leh an duhzâwngte chu a inang lo ṭheuh va. Chuvâng chuan, an zînga ṭhenkhat tân Pathian biak dân thar pawm emaw, tûn hmâa an thiltihte bânsan emaw chu a harsa hle a ni. Chuvângin, Paula’n Kristiante’n Pathian pakhat, Jehova chauh an nei tih a hriat nawntîr a ngai a ni.—1 Korinth 8:5, 6 chhiar rawh.

16, 17. (a) Kan hunah eng hrilh lâwkna nge thleng famkim a, chu chuan eng nge a rah chhuah? (b) Kan inpumkhatna chu engin nge tichhe thei?

¹⁶ Tûn laia Kristian kohhran chungchâng hi eng nge ni? Zâwlnei Isaia chuan, “ni hnuhnûngahte chuan” hnam tinrênga mite chu Jehova be tûra an kal khâwm tûr thu a sawi a. Anni chuan: “Ani’n a kawng chanchinte chu min zirtîr ang a, a kalkawngahte chuan kan kal ang,” tiin an sawi ang. (Isaia 2:2, 3) Tûn laiah, chu hrilh lâwkna a thleng famkim kan hmu chu kan va lâwm tak êm! Kan unaute chu hmun hrang hrang aṭang lo kalte, ṭawng chi hrang hrang hmangte, leh hnam ze hrang hrang neite an ni a. Mahse, Jehova biaknaah kan inpumkhat a ni. Amaherawhchu, kan inan loh hlawm êm avângin harsatna a chhuah châng a awm thei.

¹⁷ Entîr nân, hnam ze hrang nei kan unaute chu engtin nge i ngaih? An ṭawng te, an thawmhnaw hâkte, an khawsa ziate, leh an chaw eite chu a danglam hle pawh a ni thei. Anni chu kâwm lovin, i chipuite chauh i kâwm em? In tualchhûnga nang aia naupang zâwk kohhran upate leh hnam dangte chu engtin nge i ngaih? Kan fîmkhur loh chuan, hêng inan lohnate hian min nghawngin, kan inpumkhatna a tichhe thei a ni.

18, 19. (a) Ephesi 4:1-3-ah eng thu nge kan hmuh? (b) Kohhrana inpumkhatna vawng tûrin eng nge kan tih theih?

¹⁸ Chutiang harsatnate chu engtin nge kan pumpelh theih? Paula chuan, ṭobul hrang hrang nei khawpui hausa tak Ephesi khuaa chêng Kristiante hnênah thurâwn ṭangkai tak a pe a. (Ephesi 4:1-3 chhiar rawh.) Ani chuan, inngaihtlâwmna te, thuhnuairawlhna te, dawhtheihna te, leh hmangaihna miziate hi a sawi a ni. Chûng miziate chu, in ding lai dotu ban nghet tak ang a ni a. Mahse, in pakhat ṭha taka enkawl tûr chuan thawhrim a ngai bawk. Paula chuan, Ephesi khuaa Kristiante chu “thlarau inpumkhatna chu vawng” tûra thawkrim tûrin a duh a ni.

¹⁹ Kan vai hian kohhrana inpumkhatna vawng tûrin theih tâwp kan chhuah tûr a ni a. Chu chu engtin nge kan tih theih? A hmasa berin, Paula sawi hêng mizia: inngaihtlâwmna te, thuhnuairawlhna te, dawhtheihna te, leh hmangaihna te hi neiin, kan lantîr tûr a ni. A pahnihnaah chuan, ‘remna phuarna’ awmtîr tûrin kan thawkrim tûr a ni a. Inhriatsualna chu kan inpumkhatna tiderthâwngtu a ni a; chuvângin, kan inremna leh inpumkhatna kan vawn theih nân chûng inhriatsualnate chingfel tûra kan thawhrim a ngai a ni.

20. “Jehova kan Pathian chu Jehova pakhat chauh a ni,” tih kan hriatthiamzia engtin nge kan târ lan theih?

²⁰ “Jehova kan Pathian chu Jehova pakhat chauh a ni.” Thusawi thiltithei tak a va ni êm! Chu hriattîrna chuan Israel mite chu Ram Tiam an luh a, an lâk khân harsatnate chhel taka tuar chhuak tûrin a tichak a. Chûng thute chuan, hrehawm nasa tak pal tlang a, Paradis-a lût thei tûrin keini pawh min tichak thei a ni. Jehova hnênah i inpe pumhlûm zêl ang u. Ani chu kan thinlung zawng zawng, rilru zawng zawng, leh chakna zawng zawnga hmangaihin a rawng kan bâwl tûr a ni a, kan unaute nêna inremna leh inpumkhatna vawng tûrin theih tâwp kan chhuah tûr a ni bawk. Chûng chu kan tihzawm zêl chuan, Isua’n berâm angin kan chungthu a rêl ang a, a thusawi: “Ka pa voh bîkte u, lo kal ula khawvêl siam ṭantirh ata in tâna ram buatsaih chu chang rawh u,” tih thlen famkimna chu kan hmu ang.—Matthaia 25:34. (ws16.06-E)