Krista Famkimna Lenzia Tluk Tûrin Hma I La Em?

1, 2. Kristian zawng zawngte thiltum tûr chu eng nge? Entîrna pe rawh.

CHHUNGKAW nu ber chuan bazara thei thar lâmte chu engtin nge a thlan ang? A lian ber emaw, a tlâwm ber emaw chu a thlang lo ngei ang. A rim dik, a thar lâm leh ei nghâl mai theih tûr chu a zawng zâwk ang a. Chu chu a hun taka lawh, hmin ṭha tak a duh tihna a ni.

² Miin Jehova chanchin a zir a, baptisma chang tûra thu tlûkna a siam hnu chuan, Pathian nêna an inlaichînna chu a ṭhang chho zêl a. Kristian puitling nih chu a thiltum ber a ni. Chu puitlinna chuan kum lama upatna a kâwk lo va. Thlarau lama ṭhanna, Jehova nêna inlaichînna hnai tak neihna a kâwk zâwk a ni. Tirhkoh Paula chuan Ephesi khuaa Kristiante chu puitling tûrin a duh a. Anni chu rinnaa inpumkhat tûr leh ‘Krista famkimna lenzia tluka an zaa an lo awm hma loh zawng’ puitlin lam pana Isua chanchin zir zêl tûrin a fuih a ni.—Ephesi 4:11-13.

3. Engtin nge Ephesi kohhrana mite leh tûn laia Jehova mite chu khaikhin an nih?

³ Paula’n an hnêna lehkha a thawn lai chuan, Ephesi kohhran chu kum engemaw zât a lo ding tawh a. Chu kohhrana mi tam tak chu thiltawn ngah leh Kristian puitlingte an ni tawh a ni. Mahse, mi ṭhenkhatte chuan Jehova nêna an inlaichînna chu an tihngheh lehzual a ngai a. Chutiang bawkin, tûn laia unau tam takte chu kum tam tak Jehova rawngbâwlin, Kristian puitling an ni a. Mahse, kohhrana mi ṭhenkhat chu chutiang an la ni lo. Entîr nân, kum tin mi sâng tam takte’n baptisma an chan avângin, ṭhenkhat chu an puitlin chhoh zêl a la ngai a. Nang eng nge i dinhmun?—Kolossa 2:6, 7.

ENGTIN NGE KRISTIAN CHU A ṬHAN CHHOH THEIH?

4, 5. Engtin nge Kristian puitlingte chu an danglam ṭheuh va, eng inanna nge an neih thung? (A thupui chunga milem en rawh.)

⁴ Bazara thei hmin i han thlan chuan a len dân a inang vek lo tih i hmu a. A hmin tih hriat theihna erawh a awm ṭheuh a ni. Kristian puitlingte pawh chutiang tho chu an ni a. An inang vek kher lo. An awmna ramte leh an pian leh mûrnate a hrang hlawm a. An kum upat dân a inang lovin, an duh zâwng leh duh loh zâwngte a inang lo a ni. Mahse, Kristian puitling zawng zawngte chuan an puitling tih hriat theihna mize inang engemaw takte an nei a. Chûng mize ṭhenkhatte chu eng nge ni?

⁵ Kristian puitling chuan Isua entawnin, ‘a hniak’ hnung a zui tlat a. (1 Petera 2:21) Isua chuan miin Jehova chu a thinlung zawng zawng, a thlarau zawng zawng, leh a rilru zawng zawnga a hmangaih leh mahni a inhmangaih anga a vêngte a hmangaih chu thil pawimawh tak a nih thu a sawi a ni. (Matthaia 22:37-39) Kristian puitling chuan chu fuihna chu zawm a tum tlat a. A nun dân chuan Jehova nêna an inlaichînna leh mi dangte a hmangaihna thûk tak chu a tâna thil pawimawh ber a ni tih a târ lang a ni.

6, 7. (a) Kristian puitling nihna târ langtu mize dangte chu eng nge ni? (b) Eng nge kan inzawh ang?

⁶ Hmangaihna chu Kristian puitlingin a târ lan mize tam tak zînga pakhat chauh a ni a. (Galatia 5:22, 23) Ani chuan thuhnuairawlhna, insûmtheihna leh dawhtheihna pawh a lantîr a ni. Chûng miziate chuan dinhmun harsa takah pawh thinur lova chhel taka tuar chhuak tûr leh beiseina hloh chuang si lova, lunghnualna tuar chhuak tûrin a ṭanpui thei a. Kristian puitling chuan mi mala Bible a zirnaah thil dik leh dik lo hre tûra ṭanpuitu Bible thu bulte a zawng zêl a ni. Tichuan, Bible zirtîr chhia leh ṭha hriatna a hman hunah, thu tlûkna fing tak a siam thei ang. A inngaihtlâwm avângin Jehova kaihhruaina leh tehnate chu a ṭha ber tih a ring a ni.a (Footnote en rawh.) Ṭhahnemngai takin chanchin ṭha a hril a, kohhrana inpumkhatna a awm theih nân a tih theih apiang a ti bawk.

⁷ Kum rei tak Jehova rawng lo bâwl tawh mah ila: ‘Isua entawn tlat tûrin inthlâkthleng ngaihna lai ka nei em? Hmasawn theih dân kawng ka nei em?’ tiin kan inzâwt ṭheuh thei a ni.

‘CHAW RUM CHU PUITLINGTE TAN A NI’

8. Eng angin nge Isua’n Bible a hriat chian?

⁸ Isua Krista chuan Pathian Lehkha Thu a hre chiang hle a. Kum 12 lek a nih laia biak ina zirtîrtute a biak khân, Pathian Lehkha Thu a hmang a ni. “A thu hria apiang chuan a hriatzia leh a chhânzia chu mak an ti hle a.” (Luka 2:46, 47) A hnua thu a hril khân, a hmêlmate ngawihtîr nân Pathian Thu thiam takin a hmang a ni.—Matthaia 22:41-46.

9. (a) Kristian puitling chuan eng inzirna hun duan nge a neih ang? (b) Engvângin nge Bible kan zir?

⁹ Kristian puitling nih duh chuan Isua entawn tûr siam a zui a, Bible chu a tam thei ang ber hriat a duh a ni. ‘Chaw rum chu puitlingte tân a ni’ tih a hriat avângin Bible thurilte chu a zawng ṭhîn a. (Hebrai 5:14) Kristian puitling chuan Pathian Lehkha Thu “hriatna” dik tak neih a duh a. (Ephesi 4:11-13) Chuvângin, heti hian inzâwt rawh: ‘Nî tin Bible ka chhiar ṭhîn em? Mi mala Bible zirna hun duan ka nei em? Chawlhkâr tin chhûngkuaa Pathian biakna kan nei em?’ tiin. Bible i chhiar hunah, Jehova ngaihtuahna leh veizâwngte i hriat theih nâna ṭanpui thei tûr thu bulte zawng rawh. Tichuan, thu tlûkna i siam hunah chûng thu bulte chu hmang la. Chu chuan Jehova hnaih lehzual tûrin a ṭanpui ang che.

10. Engtin nge Kristian puitling chuan Pathian zilhna leh thu bulte chu a thlîr?

¹⁰ Kristian puitling chuan Bible thu hriat mai aia tam thil a tih a ngai a. Pathian zilhna leh thu bulte a hmangaih tûr a ni. Chu hmangaihna chu mahni duhzâwng aia Jehova duhzâwng tih duhna hmangin a târ lang a. A nun dân te, a ngaihtuahna te, leh a thiltihte pawh a thlâk danglam phah hial bawk. Entîr nân, Isua entawnin, “thutak felna leh thianghlimnaa Pathian anga siam” mize thar chuan a inthuam chho a ni. (Ephesi 4:22-24 chhiar rawh.) Pathianin Bible ziaktute kaihruai tûrin a thlarau thianghlim a hmang tih hriat reng chu a pawimawh a. Chuvângin, Kristianin Bible a zir hunah, Pathian thlarau thianghlim chuan hriatna te, hmangaihna te, leh Jehova nêna an inlaichînnate ṭhang chho tûrin a ṭanpui a ni.

INPUMKHATNA AWMTIR RAWH

11. Leia a awm lai khân Isua’n eng thil nge a tawn?

¹¹ Isua chu mi ṭha famkim a ni a. Mahse, leia a awm lai khân, mi ṭha famkim lote hual vêlin a awm a. A nu leh pa te, a unaute, leh a farnute chu mi ṭha famkim lo vek an ni. Isua hnungzuitu hnai berte pawhin chapona leh mahni hmasialna ang chi miziate an târ lang a. Entîr nân, a thih hma zân khân, a zirtîrte chu “an zîngah tu ber nge ropui bera a ruat” tih thuah an inhnial a. (Luka 22:24) Isua chuan a zirtîrte chu an ngaihtuahna ṭha famkim lo mah se, Kristian puitling tak an ni thuai ang a, kohhran inlungrual tak an din dâwn tih a hria a ni. Chu mi zân vêk chuan, ani chuan an inpumkhat theih nân a ṭawngṭai a. Ani chuan a Pa vâna mi hnênah: “Ka Pa, nang keimaha i awm leh, kei nangmaha ka awm ang bawk hian,” tiin an inpumkhatna tûrin a dîl a. “Anni chu pumkhat an nihna tûrin,” tiin a sawi belh a ni.—Johana 17:21, 22.

12, 13. (a) Kristiante kan nih anga kan thiltum chu eng nge? (b) Engtin nge unaupa chuan inpumkhatna awmtîr dân a zir?

¹² Kristian puitling chuan kohhranah inpumkhatna a awmtîr a. (Ephesi 4:1-6, 15, 16 chhiar rawh.) Kristiante kan nih anga kan tum ber chu ‘rem taka inchuktuah leh inzawm khâwm’ a ni a, chu chu inpumkhata thawhho a ni. Chutiang inpumkhatna nei tûr chuan Kristian chu a inngaihtlâwm a ngai a. Mi dangte ṭhat famkim lohna tuartu a nih pawhin, Kristian puitling chuan kohhran inpumkhatna a ngheh theih nân ṭan a la a ni. Chuvângin: ‘Unau tuemawin thil a tihsual hunah engtin nge ka chhân lêt? Mi dangin ka rilru a tihnat hunah engtin nge ka ngaih? Biak loh phah nân ka hmang em? Nge kan inlaichînna chu siam ṭhat ka tum zâwk?’ tiin inzâwt rawh. Kristian puitling chuan mi dangte chunga harsatna thlen aiin chinfel a duh zâwk a ni.

¹³ Uwe-a thiltawn hi lo ngaihtuah ta ila. Tûn hma chuan, unaute ṭhat famkim lohna chuan a tilung ni lo ṭhîn a. Tichuan, Davida nun kawng zir nân Bible leh Insight on the Scriptures bu chu hman a tum ta a ni. Engvângin nge Davida chanchin kher zir a tum? Davida pawhin Pathian chhiahhlawh ṭhenkhatte laka harsatna a tawh ve vâng a ni. Entîr nân, Lal Saula chuan thah a tum a, mi ṭhenkhat chuan lunga den hlum an duh a, a nupui ngei pawhin a nuihzat bawk. (1 Samuela 19:9-11; 30:1-6; 2 Samuela 6:14-22) Mahse, mi dangin a chungah eng thil pawh ti se, Jehova chu a hmangaihin, a rinchhan tlat a. Davida chuan zahngaihna pawh a lantîr a ni. Uwe-a chuan chutiang chiah chu a tih ve a ngai tih a pawm a. Bible a zirna aṭangin, a unaute ṭhat famkim lohna chungchângah a ngaih dân thlâk a ngai tih a hre chhuak ta a. An thiltih sualte hre reng lo va, kohhrana inpumkhatna a awmtîr a ngai a ni. Chutianga tih chu i tum ve em?

PATHIAN DUHZAWNG TITUTE CHU ṬHIANAH THLANG RAWH

14. Engtin nge Isua chuan ṭhiante a thlan?

¹⁴ Isua Krista chu nêlawm tak a ni a. Ahmei apa, apui apangte pawhin a bula awm chu nuam an ti a ni. Mahse, a ṭhian ṭha tûrte chu fîmkhur takin a thlang thung. A zirtîrte hnênah: “Thu ka pêk apiang che u in tih chuan ka ṭhiante in ni ang,” tiin a hrilh a. (Johana 15:14) Isua chuan rinawm taka a hnungzuitute, leh Jehova hmangaiha a rawngbâwltute chu ṭhian ṭhaah a thlang a ni. An thinlung zawng zawnga Jehova hmangaihtute chu ṭhian atân i thlang em? Engvângin nge chu chu a pawimawh?

15. Engtin nge ṭhalaite chuan Kristian puitlingte nêna inṭhianna chu an hlâwkpui theih?

¹⁵ Thei tam zâwk chu ni êng hmu ṭha apiang an hmin ṭha ṭhîn a. Chutiang bawkin kan unaute hmangaihna chuan Kristian puitling ni tûrin a ṭanpui thei che a. Thu tlûkna siam tum ṭhalai i ni em? I nih chuan, hun engemaw chen Jehova rawng lo bâwl tawh leh kohhrana inpumkhatna awmtîrtute ṭhiana thlan chu a finthlâk a ni. Anni chuan Jehova rawng an bâwl laiin, chhel takin harsatnate an lo tuar chhuak tawh pawh a ni thei. Nun kawng ṭha ber thlang tûrin an ṭanpui thei che a. An bula hun i hman chuan thu tlûkna fing siam tûr leh Kristian puitling tak ni chho tûrin an ṭanpui thei che a ni.—Hebrai 5:14 chhiar rawh.

16. Engtin nge kohhrana kum upate chuan unaunu chu a tleirâwl laia an ṭanpui?

¹⁶ Helga-i chuan a school zawh kum a, a kalpui tam takin an thiltumte an sawi chu a la hre reng a. An zînga tam tak chuan eizawnna hlawhtling an neih theih nân university kal an duh a. Mahse, Helga-i chuan a awmna kohhrana ṭhian puitling takte chu a bia a. Heti hian a sawi a ni: “An zînga a tam zâwk chu kei aiin an upa a, min ṭanpui nasa hle a ni. Hunbi kima rawngbâwl tûrin min fuih a. Tichuan, kum nga lai pioneer ka thawh theih phah a. Kumte a han ral hnu chuan ka ṭhat lai hun Jehova rawngbâwl nâna ka hman avângin ka hlim hle a ni. Chutianga thu tlûkna ka siam avâng chuan inchhîrna chhan tûr ka nei lo,” tiin.

17, 18. Engtin nge Jehova rawng kan bâwl ṭhat theih ber ang?

¹⁷ Isua kan entawn chuan Kristian puitling ni tûrin kan ṭhang chho vang a. Jehova chu kan hnaih lehzualin, a rawngbâwl duhna kan nei lehzual ang. Mi chuan thlarau lama a puitling hunah Pathian Jehova rawng a bâwl ṭha thei ber a. Isua chuan a zirtîrte hnênah: “In êng chu mi mit hmuhin êng rawh se, chutichuan in thil tih ṭhatte an hmu ang a, in Pa vâna mi an chawimawi thei ang,” tiin a fuih a ni.—Matthaia 5:16.

¹⁸ Kristian puitling chu kohhrana ṭanpuitu ṭha tak a nih dân kan zir tawh a. A puitlinna chu a chhia leh ṭha hriatna a hman dânah a târ lang bawk. Engtin nge kan chhia leh ṭha hriatna chuan thu tlûkna fingte siam tûra min ṭanpui theih? Engtin nge mi dangte chhia leh ṭha hriatna chu kan zahsak theih? A dawta thuziakah chûng zawhnate chu chhân a ni ang. (ws15-E 09/15)