Governing Body Hnên Aṭanga Lehkha Thawn
Unau Duh Tak Jehova Thuhretute U:
Tûna maktaduai sarih chuang ta, unau duh tak nangni Jehova chhiahhlawh rinawmte hnêna lehkha thawn kan ziah theih avângin kan lâwm hle a. Khawvêl hmun danga awm unau tuemawte nêna in inhmuh hian in inzawmin, in inngaina nghâl zêl a ni. (Joh. 13:34, 35) Kumin Yearbook leh kan thu leh hla chhuah danga chuang ram hrang hranga awm in unaute rinna leh rinawm nghehna chanchinte chhiarna chuan chu in inzawmna chu a hriat chhuahtîr leh ang che u.
Khawvêl hmun hrang hrang aṭanga chanchin kan dawnte aṭangin in zînga mi tam tak chuan Chhûngkuaa Pathian Biakna neih chu in la urhsûn hle tih kan hria a. In zînga fa la naupang deuh neite chuan an rilru lâk nân leh an ngaihsak reng nân tihdân chi hrang hrang in chher chhuak a ni. (Eph. 6:4) He thlarau lama intihchak tawn theihna hun duan avângin nupate chu an inhnaih lehzual a. (Eph. 5:28-33) Pathian Thu ngun taka zirna he ruahmanna hi mi mal emaw, chhûngkua emawte chuan an hlâwkpui hle.—Jos. 1:8, 9.
Tûn hnaia leilung chhiatna tuartu zawng zawngte chu kan lainat hle che u a. Hetianga chhiat tawh laia hreh miah lova ṭanpuina petu in zînga mi tam takte hnênah lâwmthu kan hrilh che u a ni. (Tirh. 11:28-30; Gal. 6:9, 10) Chu bâkah, kohhran tinah unaute mamawh hre thiam a, ṭanpuitute in awm bawk a. Bible-a Dorki ang bawkin “thil tih ṭhat leh thilpêk” in ngah a ni. (Tirh. 9:36) Hêng in thiltihte hi Jehova’n a hmu vek a, a ṭûl angin a rûl lêt ṭheuh dâwn che u tih ring tlat ang che u.—Mt. 6:3, 4.
Ram ṭhenkhatah chuan, “dâna thil tihsualna siam” tute chuan in dikna neih chu an rah behsak che u a. (Sâm 94:20-22) Isua’n chutiang tihduhdahna a awm tûr thu a sawi lâwk tih hriain, huaisen takin in tuar a, Jehova chu inhumhim nân in hmang a ni. (Joh. 15:19, 20) Duh takte u, ‘in beisei chhan zâwt apiang che u in chhân zêlna’ kawngah kan ṭawngṭaipui reng ṭhîn che u tih in hre reng dâwn nia.—1 Pet. 3:13-15.
Setana’n min tihkhaw loh tuma kawng suaksual tinrênga min beihna hnuaia nungchang thianghlimna a kum a kuma vawngtu maktaduai têlte chu tih tak zetin kan fak che u a ni. Khawvêl nungchang tehna chu a tlâk hniam hle laiin, “Lalpaah leh a chakna thahruiah chuan thiltihtheihna” in nei a. (Eph. 6:10) “Diabola ngamthlêmnate” laka in din ngheh theih nân “Pathian râlthuam famkimin” in inthuam tawh a ni. (Eph. 6:11, 12) Jehova chuan sawichhetu, Setana chona chiang taka chhân lêt nân in entîrna siam hi a hmang a ni tih hria ang che u!—Thuf. 27:11.
Kum 2011-a neih kan Lalpa thih Hriatrengna inkhâwmah mi 19,374,737 lai an tel tih hriat chuan min tihlim hle a. Mi tam tak an rawn inkhâwm chhan chu, ni kum April thlaa auxiliary pioneer thawk tûra sâwmna in chhân lêt vâng a ni tel a ni. Leia mi maktaduai têlte chuan Thuhretu rinawmte’n inlungrual taka Jehova an chawimawina thâwm chu an hre thei a ni. (Rom 10:18) Chu mi thlaa auxiliary pioneer anga rawngbâwltu mi 2,657,377-te zîngah in tel emaw, kawng engemaw takin rawngbâwlnaah in inhmang tam lehzual emaw pawh ni se, in inhuamna leh in ṭhahnemngaihna avângin in zavaia chungah kan lâwm tak meuh meuh a ni.—Sâm 110:3; Kol. 3:23.
Ni kum khân mi thar 2,63,131-te chu Jehova hnênah an inpumpêk a. He mi avâng hian Jehova hnênah lâwmthu kan sawi a; mi dangte hnêna he sâwmna tihchhuahna kawnga min ṭawiâwmtu zawng zawngte hnênah pawh lâwmthu kan sawi bawk a ni: “‘Lo kal rawh,’ . . . A hria apiangin ‘Lo kal rawh,’ ti rawh se. Tuihâl apiang lo kal rawh se; a duh apiangin nunna tui hi athlâwnin la rawh se,” tih sâwmna pêk chhuahnaah hian. (Thup. 22:17) A bîk takin, kum 2011 district inkhâwmpuia thusawi, din tawh Pathian Ram hmêlhmangte kan ngaihtuah hnu phei chuan “I Ram Lo Thleng Rawh Se!” tiin rilru veina nên kan ṭawngṭai lehzual a. “Ka lo kal thuai dâwn e,” tih Isua thutiamin min chawhphûr avângin, “Amen. Lo kal ta che, Lalpa Isu,” tia tirhkoh Johana chhân lêtna chu tih tak zeta thlâwpin aw kan chhuah ve a ni.—Thup. 22:20.
Chu thil phûrawm tak a lo thlen hun tûr kan thlîr reng lai hian, ‘thiltih leh tih tak zeta’ Pathian Jehova in hmangaihzia lantîrtu nangni unau duh tak a hmei a pate u, in zavaiin kan hmangaih tak zet che u tih hre reng ang che u.—1 Joh. 3:18.
In unaute,
Jehova Thuhretute Governing Body