Governing Body Hnên Aṭanga Lehkha Thawn

Unau Duh Takte U:

“Kan Pathian leh Pa hmaah chuan rin avânga in thiltihzia te, hmangaih avânga in thawh rimzia te, kan Lalpa Isua Krista beisei avânga in chhelzia te kha theihnghilh lova hre rengin, ka ṭawngṭainaahte chuan in hming lamin, nangmahni zawng zawng avângin Pathian hnênah lâwmthu kan hril fo ṭhîn a ni.” (1 Thes. 1:2, 3) Hêng thu chheh mawi takte hian in chunga kan rilru awm dân chu a va hril tak êm! Nangmahni vâng leh in hnathawh ṭha takte avângin Jehova chungah kan lâwm tak meuh a ni. Engvângin nge in hnathawh ṭhatte avânga Jehova chunga kan lâwm?

Kum kal ta chhûng khân, Lalram rawngbâwlnaah ‘rin avâng leh hmangaihna avânga thawk rimin’ in buai hle a. In zînga tam tak chuan rawngbâwlna zauh theih dân kawngte in dap a. Ṭhenkhat chu Lalram chanchin ṭha hriltu mamawh zualna hmun dangah te, ram dangahte pawh rawngbâwl tûrin in insawn a ni. Mi dangte chuan vântlâng hmaa thu hrilhnaah telin an rawngbâwlna in zauh bawk. Mi tam tak chuan Hriatrengna hun lai leh bial kan thlaah te, a nih loh leh August 2014-a special campaign thlaah te chuan auxiliary pioneer in thawk a ni. In dinhmunte chu inang lo hle mah se, Jehova tân in thinlung zawng zawngin in thawk tih kan hmu a, kan fak hle a che u. (Kol. 3:23, 24) In ‘rin avânga thiltih’ chu Jehova chunga kan lâwm chhan tûr a va tling tak êm!

Khawvêl pum huapa theocratic in sakna lama ‘in hmangaihna avânga in thawh rimnate’ chu kan hlut tak zet a. Jehova mite an pun chhoh zêl avângin chutiang inte chu a rang lamin kan mamawh a ni. (Is. 60:22) Han ngaihtuah teh, kum kal ta chhûng khân, thuchhuahtu kan tam lai ber chuan mi 8,201,545 kan nih laiin, thla tina Bible zirpui chu chawhrualin 9,499,933 lai a ni a. Chutiang punna avângin, branch office tam tak chu zauh emaw, siam ṭhat emaw a ngai ta a ni. Hei hian, Kingdom Hall-te pawh kan mamawh belh tih a ti chiang hle! Chutih rual chuan, kan ṭawng lettute pawhin an ṭawng hmanna hmuna awm a, hna an thawh theih nân khawvêl hmun tam takah remote translation office-te chu mamawh belh a ni bawk.

Chuvângin, heti hian kan inzâwt thei a ni, ‘He in sak rawngbâwlna ṭanpui tûrin eng nge ka tih theih?’ tiin. Kan zînga mi ṭhenkhat chu in sakna lamah tlâwmngaiin an inpe thei pawh a ni ang a. In sak thiam kan ni emaw, ni lo emaw pawh ni se, kan vai hian he hna pawimawh tak atân kan thil neihte thawh ve theihna chanvo hlu kan nei thei a ni. (Thuf. 3:9, 10) Israel mite’n biak bûk an sak lai khân, thil an pêk nasat êm avângin pêk belh tawh lo tûra puan a ngai hial a. (Ex. 36:5-7) Hêng Bible-a entawn tûr siamte hian kan thinlung a khawihin, min chêttîr ang tih chu rinhlelh rual a ni lo. Jehova chunga kan lâwm chhan dang leh chu he rawngbâwlna thianghlim pawimawh taka in “hmangaih avânga in thawh rimzia te” hi a ni tih a chiang hle!

Kan unaute chhelzia kan hmuh hian hlim chhan tûr kan nei lehzual a. Entîr nân, South Korea rama kan unau duk takte chungchâng hi ngaihtuah ta ila. Kum 1950 aṭang tawh khân, chu rama ṭhalai kan unaupate chu Kristian tualdâwihna avângin tân hun inang lo tak takin tântîr an ni a. Tûn thleng hian, kan unaupate chuan rinawm taka awmin, he dinhmun hi chhel takin an la hmachhawn zêl a ni. Chhelna kawnga an entawn tûr siam chuan kan rinna a va ti chak tak êm!

Eritrea rama kan unau pathumte chu kum 20 chuang tân ina khung an ni tawh a. Unaunute leh an fate pawh tiamin mi dangte chu hun rei lo zâwk chhûng khung an ni bawk. An chhuah theih nân kawng chi hrang hrangin theih tâwp chhuah ni mah se, tûn thlengin hlawhtlinna a la awm thei hrih lo. Mahse, kan unaute chuan an rinna chu an phatsan chuang lo. Dinhmun khirh tak hnuaiah pawh an rinawmna chu an vawng tlat a. Kan ṭawngṭainaah hêng mi rinawmte hi kan theihnghilh lo a ni.—Rom 1:8, 9.

In zînga mi tam zâwkte chu rinna avânga tân ina khung in ni lo va. Mahse, in zînga tam tak chuan kum upatna te, natna benvawn te, ring lotu kawppui emaw, chhûngte emaw laka dodâlna te, leh mahni chauhva i hriat mi mal harsatna dangte chu in hmachhawn a ni. Chuti chung pawh chuan, Jehova rawng chu rinawm taka in la bâwl zawm zêl avângin kan fak a che u! (Jak. 1:12) Rinawm taka in tuar chhuahna chu Jehova chunga kan lâwm chhan dang pakhat chu a ni.

Ni e, rinawm taka in rawngbâwlna te, hmangaih avânga in thawh rimna te, leh in chhelnate hi kan tân chuan ‘LALPA hnênah lâwm thu hril ula; ani chu a ṭha si a,” tihna tûr chhan ṭha tak a ni. (Sâm 106:1) In vaiin kan hmangaih tak zet che u a, chatuana a rawng in bâwl theih nân Pathian Jehova’n tichak che uin, chhawmdâwl che u sela, malsâwm zêl che u rawh se, tiin kan ṭawngṭai a ni.

In unaute,

Jehova Thuhretute Governing Body