Min Zirtîrtu Ropui Ber Hnên Aṭanga Nun Puma Inzirna

KA NU LEH PATE ENTAWN TUR SIAM

Kum 1950 tâwp lamah chuan, ka nu leh pate chu Italy aṭangin Canada ram, Saskatchewan-a Kindersley khuaah an pêm a. A hnu lawkah, thutak an zir a, chu chu kan nuna thil pawimawh ber a rawn ni ta a ni. Ka naupan laia chhûngkuaa ni lênga rawngbâwlnaa kan chhuahho ṭhin lai kha ka la hre reng; chuvângin, fiamthuin kum riat ka nih aṭangin “auxiliary pioneer” ka thawk tawh ka ti ṭhîn.

Ka nu leh pate chu rethei tak ni mah se, Jehova tâna inpêkna kawngah entawn tûr ṭha tak an siam a. Entîr nân, kum 1963 khân U.S.A., California, Pasadena khawpuia neih international inkhâwmpuia kan tel theih nân kan thil neih tam tak an hralh a ni. Tichuan, kum 1972 khân Italian rawngbâwlna bial thlâwp tûrin kilometer 1,000 (mêl 620) vêla hlaa awm Canada ram, British Columbia biala Trail-ah chuan kan insawn a. Ka pa chuan tihfai leh thawm ṭhat hna a thawk a. A hnaa kai sântîr an tum pawhin, thlarau lam thiltihnate a ngaihven tlat theih nân a lo hnâwl a ni.

Kan unau li tâna ka nu leh pate entawn tûr siam chu ka ngaihlu tak zet a. Chu chuan thlarau lama kan inchher chhohna atân bulṭhut nghet tak min siamsak a, chutah chuan nun puma inzirna a tel a ni: Lalram ka dah hmasak chuan, Jehova’n min enkawl ang tih chu.—Mt. 6:33.

HUNBI KIMA RAWNGBAWL ṬANNA

Kum 1980-ah thlarau lam thiltum nghet tak nei unaunu Debbie-i nên kan innei a. Hunbi kima rawngbâwl kan duh avângin, kan inneih aṭanga thla thumnaah Debbie chuan pioneer a thawk ṭan a. Kan inneih aṭanga kum khat hnuah, mamawh zualna hmuna kohhran têah kan insawn a; chutah chuan, Debbie-i rualin pioneer ka thawk ṭan ve a ni.

A hnuah chuan, lunghnualna kan neih avângin hmun danga insawn kan tum a. Mahse, bial kantu kan be hmasa phawt a. Ani chuan hmangaihna nei tak leh tlang takin: “In dinhmun a harsat chhanah hian in tel ve. A thim zâwng hlîrin in thlîr a nih hi! A êng zâwnga thlîr in tum chuan, a êng zâwnga thlîr chhan tûr in hmu mai ang,” tiin min hrilh a. Chu fuihna chu kan mamawh tak a ni. (Sâm 141:5) A fuihna chu kan zâwm nghâl a, a êng zâwnga thlîr chhan tûr tam tak kan hmu rêng a ni. Kohhranah chuan ṭhalaite leh ring lo mi kawppui nei ṭhenkhat pawh tiamin, mi ṭhahnem tak chuan tam lehzuala Jehova rawngbâwl an duh a. Chu chu kan tâna zir tûr pawimawh tak a ni. Thil a êng zâwnga thlîr tum dân leh dinhmun khirh tak anga langte Jehova rawn siam ṭhat hun tûr nghah dân kan zir a. (Mik. 7:7) Kan dinhmun chu rawn ṭha chho lehin hlimna pawh kan nei leh a ni.

Pioneer school kan kal hmasak bera min zirtîrtute chu ram danga rawng lo bâwl tawh ṭhîn an ni a. Thlalâkte min hmuha an harsatna tawhte leh malsâwmna dawnte min hrilh chuan, missionary nia rawngbâwl kan châkna chu tihtharin a awm a. Chuvângin, chu chu thiltumah kan nei ta a ni.

Chu thiltum hlen thei tûrin, kum 1984-ah British Columbia aṭanga kilometer 4,000 (mêl 2,485) aia hlaa awm French ṭawng hmangte awmna Quebec bialah chuan kan insawn a. Chutah chuan, hnam ze thar mila nun leh ṭawng thar kan zir a ngai a ni. Harsatna dang chu, sum kan nei tlêm hle ṭhîn. Ṭum khat chu, lova alu thar bâng ringawt chawah kan ring a. Debbie-i chuan tui taka alu siam dân chi hrang hrang a thiam phah a ni. Chutiang harsatnate kârah chuan hlimna neih reng kan tum tlat a. Chu bâkah, Pathianin min enkawl tih kan hmu bawk.—Sâm 64:10.

Ni khat chu, beisei loh takin phone call kan dawng a. Canada Bethel-a rawngbâwl tûra sâwm kan ni. Gilead School kal tûra dîlna kan lo theh luh tawh avângin kan rilru a buai deuh va. Mahse, sâwmna chu kan pawm ta tho va. Bethel-a kan thlen chuan Branch Committee member Unau Kenneth Little-a hnênah, “Kan Gilead kal dîlna kha engtin nge ni ang?” tiin kan zâwt a. Ani chuan, “Sâwm in nih hunah kan ngaihtuah ang chu!” tiin min chhâng a ni.

Chawlhkâr khat hnu chuan, Debbie-i nên Gilead kal tûra sâwmna chu kan dawng a. Thu tlûkna kan siam a ngai ta a ni. Unau Little-a chuan: “Eng duh thlanna pawh siam ula, a hnuah rilru inthlâk châng a awm thei a. Duh thlan tûr ṭha zâwk a awm lo, a eng zâwk pawh Jehova’n mal a sâwm thei,” tiin min hrilh a. Gilead kal tûra sâwmna chu kan pawm a, a hnuah chuan Unau Little-a thurâwn min pêk dikzia kan hmu chho a ni. Chuvângin, chanvo chungchânga duh thlanna siam ngaite hnênah a thurâwn min pêk chu kan sawi chhâwng leh ṭhîn.

MISSIONARY NUN

Kum 1987, April thlaa Brooklyn, New York-a neih Gilead school vawi 83-naa kal zirlai 24-te zînga tel ve chu kan phûr hle a. Unau Ulysses Glass-a leh Jack Redford-a te chu min zirtîrtu ber an ni a. Thla nga hnu, kum 1987, September 6-ah chuan school chu kan zo va. John-a leh Marie Goode-i te rualin Haiti rama kal tûra tirh kan ni.

Kum 1962-a Haiti ram aṭanga missionary-te hnawh chhuah an nih hnuah Gilead missionary tirh luh an la awm leh lo va. School kan zawh aṭanga kâr thumnaah chuan, Haiti rama thuchhuahtu 35 awmna tlângram hmun hla taka kohhran têah chuan kan han thleng a. Kan kum a la nauvin tawnhriat kan neih loh bâkah, missionary inah chuan keimahni chauhvin kan awm a ni. A khaw mite chu rethei tê tê an nih bâkah, a tam zâwkin lehkha chhiar an thiam lo va. Chuta missionary nia rawng kan bâwl tirh lamah chuan tualchhûng buaina, sawrkâr ding lai paih thlâkna, kawng pinna kâng hluah hluah leh, cyclone te chu kan hmachhawn a ni.

Haiti rama kan unau chhel leh hlim takte hnên aṭangin kan inzir thei a. Harsatna tam tak tâwk mah se, Jehova leh rawngbâwlna chu an ngaina a. Kum upa unaunu pakhat chuan lehkha chhiar thiam lo mah se, Bible châng 150 vêl a by-heart a ni. Nî tina kan tawh dinhmunte chuan Pathian Ram chu mihringte harsatna chingfel theitu awm chhun a ni tih thuchah hrilh zawm zêl kan tumna chu a tinghet lehzual a. Kan Bible zirpui hmasa zînga ṭhenkhat regular pioneer, special pioneer leh, kohhran upa an rawn ni tih hriatna chuan min tihlim tak zet a ni.

Haiti-a kan awm lai chuan ṭhalai Mormon missionary Trevor-a nên kan intawng a, a chângin Bible kan sawiho ṭhîn a ni. Kum eng emaw zât hnuah, a hnên aṭangin lehkhathawn ka dawng hlauh va. Chutah chuan: “Inkhâwmpui lo awm tûrah hian baptisma ka chang dâwn asin! Haiti rama lêt leha Mormon missionary nia rawng ka lo bâwl ṭhinna hmuna special pioneer thawh ka duh,” tih hi a ziak a. A sawi ang chuan, an nupain chutah chuan kum tam tak chhûng rawng an bâwl ta a ni.

EUROPE—A HNUAH, AFRICA

Europe khawmuala Lalram rawngbâwlna kawng a inhawn ṭanna hmuna rawngbâwl tûra tirh kan ni a. Kum 1992-ah chuan Italy-a an pêm hmaa ka nu leh pate awmna ṭhin Slovenia ram khawpui, Ljubljana-ah kan thleng a. Tûn hmaa Yugoslavia ramin a huam chinahte chuan an la indo reng a ni. Austria ram khawpui Vienna-a branch leh, Zagreb, Croatia leh, Serbia ram khawpui Belgrade-a branch office-te chuan chuta rawngbâwlna chu an enkawl a. Chuta chin chu, chûng ram tinte chuan mahnia Bethel hmunte an neih a ngai ta a ni.

Ṭawng dang leh hnam ze thar mila nun kan zir a ngai leh a. Tualchhûng mite chuan, “Jezik je težek,” an ti ṭhîn a, a awmzia chu “Ṭawng har tak a ni,” tihna a ni a. A harsa rêng bawk a ni. Inawpna pâwl insiamremnate inhuam taka zâwmtu kan unaute rinawmna chu kan chhuang hle a, Jehova’n mal a sâwm dân pawh kan hmu a ni. Hmangaihna nei tak leh a hun taka Jehova’n dinhmunte a siam ṭhat dân pawh kan hmu leh a. Slovenia rama rawngbâwlna chuan tûn hmaa kan thil lo zir tawhte chu min beltîr bâkah, thil thar tam tak min zirtîr bawk a ni.

Mahse, inthlâk thlengna dangte’n min hmuak a. 2000 kum chuan West Africa-a Côte d’Ivoire rama tirh kan ni a. Tichuan, kum 2002, November thlaah tualchhûng buaina avângin Sierra Leone-ah kan insaseng ta a ni. Chuta kum 11 chhûng awh tualchhûng buaina chu a tâwp hlim a ni a. Chutih rualin, rang taka Côte d’Ivoire chhuahsan chu a awlsam lo va. Mahse, tûn hmaa thil kan lo zir tawhte chuan hlimna nei reng tûrin min ṭanpui a ni.

Chuta rawngbâwlna ṭhang duang tak leh kum tam tak chhûng indona tuar kan unau duh takte chu kan ngaihven tlat a. Anni chu rethei hle mah se, an neih ang ang mite hnêna pêk an duh a ni. Unaunu pakhat chuan Debbie-i chu thawmhnaw ṭhenkhat pêk a tum a. Debbie-i’n hnial a tum chuan, unaunu chuan: “Ram buai lai khân, ram danga unaute’n min ṭanpui a. Tûn hi kan ṭanpui ve hun a ni,” tiin a lo chhâng a. Anmahni entawn chu thiltumah kan nei ta a ni.

A hnuah, Côte d’Ivoire-ah kan lêt leh a; mahse, nasa taka buaina lo inmung tawh chu a chhuak leh a. Chuvângin, kum 2004, November thlaah chuan bag kg 10 (lb 22) chauhva rit ve ve kengin helicopter hmangin kan insaseng leh a ni. Chumi zân chuan French sipaite awmna hmuna chhuatah kan riak a, a tûkah Switzerland-ah kan thlâwk lût a ni. Zan laia a ram branch kan thlen chuan, Branch Committee leh Ministerial Training School zirtîrtute bâkah, an nupuite chuan min lo kuah a, chaw tui tak leh Swiss chocolate te pein lâwm takin min lo hmuak a. Kan rilru a khawih hle a ni.

Ghana rama rawngbâwl tûra tih lailâwk kan ni a; tichuan, tualchhûng buaina a zia deuh hnuah Côte d’Ivoire-a tirh kan ni leh a ni. Hêng insaseng ngai dinhmun manganthlâk takahte leh hun rei lo te chhûng rawngbâwl tûra tirh kan nihnaahte chhelna nei tûrin unaute ngilneihna chuan min ṭanpui a. Chutiang unau inhmangaihna chu Jehova inawpna pâwlah chuan thil pângngai tak ni mah se, Debbie-i nên chumi kan ngaihhlutna tihkiam loh chu kan tum tlat a. A nihna takah chuan, chûng dinhmun manganthlâk takte chu kan inchher chhoh zêlnaah thil pawimawh tak a rawn ni chho a ni.

MIDDLE EAST-A RAWNGBAWLNA

Kum 2006-ah chuan world headquarters aṭangin Middle East-a rawngbâwl tûra tih kan nih thu lehkha kan dawng a. Thiltawn, chona, ṭawng leh, hnam ze tharte mila nun kan zir a ngai leh dâwn tihna a ni. Politics leh sakhuana lama buaina tam tak chhuah ṭhinna he hmunah hian thil tam tak zir tûr a awm a. Ṭawng chi hrang hrang hmanna kohhrantea awm chu nuam kan tiin, theocratic kaihhruaina zawmnain inpumkhatna a awmtîr dân chu kan hmu a ni. Unau tam takin an chhûngte, school kalpui te, hnathawhpui te leh, ṭhenawmte hnên aṭanga dodâlna kâra huaisen taka chhelna an lantîr chu kan chhuang hle.

Kum 2012-a Israel ram, Tel Aviv khawpuia neih special inkhâwmpui chu kan chhim a. Chu chu Pentikost C.E. 33 hnua he hmuna Jehova mite chutianga tama an inhmuh khâwm lehna a ni. Hun chhinchhiah tlâk tak a va ni êm!

Middle East-a kan awm chhûng chuan kan rawngbâwlna khuahkhirh a nihna ram pakhat tlawh tûra tih kan ni a. Kan thu leh hla chhuah ṭhenkhat kan keng a, rawngbâwlnaahte telin inkhâwmpui tête kan chhim bawk. Râlthuam keng sipaite leh checkpoint paltlang tûrte chu a tam hle a; mahse, thuchhuahtu ṭhenkhatte ruala fîmkhur taka kan kal avângin kan hlau lo.

AFRICA-AH KAN KIR LEH

Kum 2013-ah chuan chanvo danglam tak kan dawng a—ram leilung hausa êm êm chunga ram rethei leh indona a thlen fona, Congo-a Kinshasa branch-a rawngbâwl tûra tih kan ni. A tîr chuan, “Africa-a nun awm dân chu kan hria alâwm; kan inpeih reng e,” kan ti rilru a. Mahse, kawng ṭha awm mumal lohna hmuna zin pawh tiamin, thil tam tak zir tûr kan la nei. Sum leh pai lama harsatna kâra unaute chhelna leh hlimna te, rawngbâwlna an ngainatna te leh, inkhâwm leh inkhâwmpuitea tel tûra theih tâwp an chhuahnate pawh tiamin, thil a êng zâwnga thlîr chhan tûr tam tak kan nei a. Jehova ṭanpuina leh malsâwmna avâng chauhva Lalram hna a hlawhtlin dân pawh kan hmu bawk. Kum tam tak chhûng Congo rama hunbi kima rawngbâwlna aṭangin thil tam tak kan zir a, thlarau lam chhûngte pawh kan neih belh ṭeuh a ni.

Kum 2017 tâwp lamah chuan South Africa-a rawngbâwl tûra tih kan ni leh a. Hei hi kan bethel awm tawhna azawnga hmun lian ber a ni a, kan chanvo dawnte pawh a thar hlak a ni. Ṭum dang ang bawkin, zir tûr tam tak kan nei a; mahse, tûn hmaa kan thiltawnte chuan min ṭanpui a ni. Kum sâwmbi tam tak chhûng chhelna lantîrtu unaute chu kan hmangaih hle. Ram leh hnam ze hrang hrang aṭanga lo kal Bethel chhûngkuate inpumkhata hna an thawkho han hmuh chu a ropui khawp mai. A mite’n mihring thara inthuama Bible thu bulte nunpui an tumna chu Jehova’n mal a sâwm tih a chiang a ni.

Hêng kum chhûng zawng hian, Debbie-i nên chanvo phûrawm takte kan dawng a, hnam ze thar mila insiamremin ṭawng tharte kan zir a. Chutianga tih chu awlsam reng lo mah se, a inawpna pâwl leh unaute kaltlangin Jehova hmangaihna rinawm chu kan dawng reng a. (Sâm 144:2) Hunbi kima rawngbâwlnaa kan inchher chhohnate chuan a chhiahhlawh ṭha lehzual min nihtîr tih kan ring nghet tlat a ni.

Ka nu leh pate min enkawl chhoh dân, ka nupui duh tak Debbie-i min thlâwpna leh, khawvêl pumhuapa kan thlarau lam chhûngte entawn tûr siam ṭha tak te chu ka ngaihlu hle a. Hma lam kan pan zêl rualin, min Zirtîrtu Ropui Ber hnên aṭanga inzir chhunzawm zêl kan tum tlat a ni.