Jehova Kut Chu A Tawi Ngai Lo

1. Aigupta ram aṭanga Israel mite a hruai chhuah khân Mosia’n Jehova a rinchhan tih engtin nge a lantîr?

HEBRAI bua rinna kawnga entawn tûr târ lante zîngah Mosia hi a chhinchhiah tlâk hle a. (Heb. 3:2-5; 11:23-25) Pharaoa leh a sipaite chu hlau lova rinna lantîrin Israelte chu Aigupta aṭangin a hruai chhuak a. Jehova rinchhan chungin mipuite chu Tuipui Sen kânpuiin thlalêrah a hruai a ni. (Heb. 11:27-29) A hnuah, Israel mi a tam zâwkte chuan Pathianin an mamawhte a pe thei tih chu an ring tawh lo va. Mahse, Mosia chuan Jehova a ring chhunzawm zêl a ni. Pathianin mipuite chu thlalêr ram rova mak taka chaw leh tui a pêk avângin Mosia rinna chu a thlâwn lo.a—Ex. 15:22-25; Sâm 78:23-25.

2. Engvângin nge Pathianin Mosia chu: “LALPA kut chu a tawi ta em ni?” tia a zawh? (Numbers 11:21-23)

² Mosia chuan rinna nghet tak nei mah se, mak taka Israel mite a hruai chhuah aṭanga kum khat hnu vêlah, Pathianin a mite chu sa a pe thei tih a ringhlel a. Chu thlalêra awm mipui maktaduai têlte hnêna Pathianin sa a pêk dân tûr chu a ngaihtuah thiam lo a ni. Chuvângin, Pathian Jehova chuan Mosia chu, “LALPA kut chu a tawi ta em ni?” tiin a zâwt a ni. (Numbers 11:21-23 chhiar rawh.) Heta, “LALPA kut” tih hi Pathian thlarau thianghlim, a nih loh leh a chakna che vêl sawina a ni a. Chuvângin, Jehova’n Mosia chu, “Ka sawi anga ka tih theih loh i ring em ni?” tia zâwt ang a ni.

3. Engvângin nge Mosia leh Israelte chanchin chu kan ngaihven ang?

³ Nangmah emaw, i chhûngte emaw tisa lam mamawhte chu Pathianin a pêk loh che i hlau ngai em? Chutiang hlauhna chu i nei emaw, nei lo emaw a nih pawhin, Pathianin an mamawhte a pe thei tih rinna tlachhama awm Mosia leh Israelte chanchin hi i lo bih chiang ang u. Jehova kut chu a tawi ngai lo tih kan rinna tinghet tûra min ṭanpuitu Bible thu bulte pawh kan enho bawk ang.

MOSIA LEH ISRAELTE HNEN AṬANGIN INZIR RAWH

4. Engvângin nge Israel mi tam tak chuan Jehova’n an tisa lam mamawhte a pe thei tih chu an rinhlelh ṭan?

⁴ Thil thlen dân chu lo ngaihtuah ta ila. Israelte leh hnam dang “mipui inpawlhsawp tam tak” chu Aigupta ram aṭanga Ram Tiam lam panin thlalêrah hun eng emawti chhûng an zin kual tawh a. (Ex. 12:38; Deut. 8:15) Chûng mipuite leh Israel mite chuan manna chu an hnê tawh a; chuvângin, an phunnawi ta a ni. (Num. 11:4-6) Aigupta ram ei leh inte chu an ngai ṭan a. Mipuite chu Mosia hmaa an phunnawi avângin, amah ngeiin an tâna sa ei tûr zawnsak ngai niin a inhria a ni.—Num. 11:13, 14.

5-6. Hnam dang mite’n Israel mi tam takte chunga nghawng an neih dân aṭangin eng nge kan zir theih?

⁵ An zînga hnam dang lo tel vete chuan Jehova thilpêkte chungah lâwmna an nei lo va, Israelte pawhin an rilru put hmang ang chu an rawn nei ve ṭan a ni. Keini pawh lâwm nachâng hre lote thununin kan awm thei a, chutiang a nih chuan Jehova thil min pêkte chungah kan lungawi lo ṭan thei a ni. Tûn hmaa kan thil neih ṭhinte kan thlâkhlelh hunah, a nih loh leh mi dangte chunga îtsîkna kan neih hunah chutiang chu a thleng thei a. Chutih rualin, eng dinhmunah pawh lungawi kan zir chuan kan hlim lehzual dâwn a ni.

⁶ Israelte chuan Ram Tiam an thlen hunah an tisa lam mamawhte chu hnianghnâr takin an nei ang tia Pathian sawi kha hre reng tûr an ni a. Mahse, chu thutiam chu thlalêra an awm chhûng ni lovin, Ram Tiam an thlen hnu chauhva thleng famkim tûr a ni. Chutiang bawkin, keini pawh he khawvêla kan thil neih lohte ngaihven aiin, khawvêl thara Jehova thil min pêk tûrte chu kan ngaihven tlat zâwk tûr a ni a. A chunga rinna tinghet tûra min ṭanpuitu Bible chângte pawh kan chhût ngun thei bawk a ni.

7. Engvângin nge Jehova kut chu a tawi lo tih kan chian theih?

⁷ Chutih rualin, Pathianin Mosia hnêna: “LALPA kut chu a tawi ta em ni?” tia a zawh chhan chu hriat i châk mai thei a. Mosia chu thil a tihtheihzia bâkah, a thiltihtheihna chu khawiah pawh a hmang thei tih hre tûrin ṭanpui a duh pawh a ni thei. Israelte chu thlalêr hmun hla takah awm mah se, hnianghnâr takin sa a pe thei a ni. Pathian chuan ‘kut chak tak leh bân pharin’ a thiltihtheihna chu a lantîr a. (Deut. 7:19) Chuvângin, dinhmun harsa tak kan tawh hian Pathian Jehova’n min ṭanpui ṭheuh thei tih kan chiang thei a ni.—Sâm 138:6, 7.

8. Thlalêra mi tam tak thil tihsual ang chu engtin nge kan pumpelh theih? (Milem en bawk rawh.)

⁸ Pathian Jehova chuan a thutiam chu hlenin Israelte chu vahmîm ei tûr tam tak a pe a. Mahse, chu thil mak avâng chuan lâwmna aiin duhâmnain an lo khat ta zâwk a. Ni khat leh a chanve chhûng vahmîmte chu an chhar khâwm a ni. Chuvângin, Pathian chu chûng “tisa châkna neitute,” a nih loh leh mahni hmasial takte chungah chuan a thin a ur ta êm êm a, a hrem ta a ni. (Num. 11:31-34) Chu thilthleng aṭang chuan zir tûr kan nei a. Duhâmna nei lo tûrin kan fîmkhur tûr a ni. Kan hausa emaw, kan rethei emaw Pathian Jehova leh Isua nêna inlaichînna siama ‘vâna rote khâwl khâwm’ chu kan ngai pawimawh ber tûr a ni a. (Mt. 6:19, 20, NWT; Lk. 16:9) Chutianga kan tih chuan, Pathianin kan mamawhte min pe ang tih kan chiang thei a ni.

9. Pathian ṭanpuina chungchângah eng nge kan rin ngheh tlat theih?

⁹ Jehova chu tûn laia a mite ṭanpui tûr pawhin a inpeih reng a. Chutih rualin, chu chu sum leh pai lamah kan harsa ngai dâwn lo emaw, ei tûr tlachhamin kan awm ngai dâwn lo emaw tihna a ni lo.b Mahse, Jehova chuan engtikah mah min thlahthlam ngai lo vang. Harsatna eng pawh tâwk mah ila, kan mamawhte chu min pe dâwn a ni. Chumi dikzia chu kan tisa lam mamawhte min pe ang tih kan rinzia lantîr theihna dinhmun chi hnihte ngaihtuahin kan hre thei a, chûngte chu: (1) sum leh pai lama harsatna kan neih hun leh (2) hma lam hun atâna sum leh pai lama kan inruahman hun te a ni.

SUM LEH PAI LAMA HARSATNA KAN NEIH HUNAH

10. Sum leh pai lamah eng harsatnate nge kan tawh theih?

¹⁰ He khawvêl tâwpna kan hnaih zêl rual hian, sum leh pai dinhmunte chuan chhiat lam a pan zêl kan beisei thei a. Politics thila buaina, indona, leilung chhiatna leh, hripui thar lêngte avângin beisei loh taka kan insênso a ngai pawh a ni thei a; hna te, thil neihte leh, inte kan chân thei bawk a. Chhûngkaw châwm nân hna thar zawn emaw, chhûngkuaa hmun danga insawn emaw a ngai pawh a ni thei bawk a ni. Jehova kan rinchhan tih târ langtu thu tlûknate siam tûrin engin nge min ṭanpui thei?

11. Sum leh pai lama harsatnate chingfel tûrin engin nge ṭanpui thei che? (Luka 12:29-31)

¹¹ Jehova hnêna i rilru hahnate thlen chu thil pawimawh ber a ni a. (Thuf. 16:3) A hnênah thu tlûkna ṭhate siam thei tûra finna leh i dinhmun tawh avânga ‘lungkham lutuka’ awm lo tûrin rilrua thlamuanna dîl la. (Luka 12:29-31 chhiar rawh.) I mamawh i neihte chunga lungawina nei thei tûrin a ṭanpuina dîl bawk la. (1 Tim. 6:7, 8) Kan thu leh hla chhuahte aṭangin sum leh pai lama harsatna chinfel dân zir chianna nei bawk ang che. Mi tam takin sum leh pai lama harsatna chungchânga jw.org website-a thu leh hla chhuahte chu an hlâwkpui hle a ni.

12. Eng zawhnate’n nge Kristian tu emaw chu a chhûngkaw tâna thu tlûkna ṭha ber siam tûra ṭanpui thei?

¹² Mi ṭhenkhat chuan an chhûngte hlata awmin hna an thawk ṭhîn a; mahse, chu chu thu tlûkna âtthlâk tak a ni fo ṭhîn. Hna thar i thawh hmain sum i lâk luh zât tûr chauh ni lovin, thlarau lama i thil chân theihte chu ngaihtuah tel ang che. (Lk. 14:28) Chuvângin, heti hian inzâwt rawh: ‘Ka kawppui hlata awmna chuan kan inlaichînna chu engtin nge a nghawng theih? He thu tlûkna hian ka Kristian unaute nêna kan inlaichînna leh ka rawngbâwlna chu engtin nge a nghawng ang?’ tiin. Fate i neih chuan, he zawhna pawimawh tak hi i inzawh a ngai bawk a: ‘Ka fate bula ka awm loh chuan engtin nge “Lalpa thununnaah leh zilhnaah” ka enkawl chhoh theih ang?’ tiin. (Eph. 6:4) Bible thu bulte chunga zahna nei lotu i chhûngte, a nih loh leh i ṭhiante kaihhruaia awm aiin, Pathian ngaihtuahnate kaihhruaiin awm zâwk ang che.c Asia khaw thlang lama chêng Tony-a chuan ram danga thawh tûr hna ṭha tak tak a hmu a. Mahse, chumi chungchâng chu ṭawngṭaia a nupui nêna an sawi dun hnuah, chûng hnate chu hnâwla chhûngkaw sênso tihtlêm an tum ta zâwk a ni. A thlîr lêtin, Tony-a chuan: “Mi dangte chu Jehova hre tûra ṭanpui theihna hun remchâng ka nei a, kan fate pawh thutakah an phûr hle bawk a. Matthaia 6:33-a thute kan nunpui chhûng chuan Jehova’n min ngaihsak ang tih kan chhûngkuain kan zir a ni,” tiin a sawi.

HMA LAM HUN ATANA SUM LEH PAI LAMA KAN INRUAHMAN HUNAH

13. Kan upat hun atâna sum leh pai lama ruahmanna siam thei tûrin tûnah eng nge kan tih theih?

¹³ Jehova kut kan rinchhanna chu kan upat hun atâna ruahmannate kan siam hunah fiah a ni thei a. Bible chuan kan hma lam hun atâna inkhâwl thei tûra thawk rim tûrin min fuih a. (Thuf. 6:6-11) Kan dinhmunin a zir chuan chutianga tih theih chu thil ṭha tak a ni. Tangka sum chuan eng emaw chen himna min pe thei tih chu a dik ngei mai. (Thur. 7:12) Mahse, chu chu kan nuna dah pawimawh ber kan duh ngai lo vang.

14. Hma lam hun atâna sum leh pai lama ruahmanna kan siam hunah, engvângin nge Hebrai 13:5 chu kan ngaihtuah ang?

¹⁴ Isua chuan ‘Pathian lama hausa si lo va,’ sum leh pai lama inkhâwl khâwm chu thil âtthlâk a nihzia a sawi a. (Lk. 12:16-21, NWT) A tûka thleng tûr tu mahin kan hre lâwk thei lo. (Thuf. 23:4, 5; Jak. 4:13-15) Chu bâkah, Isua chuan a hnungzui ni tûr chuan kan thil neihte chu “kalsan” kan inhuam tûr a ni tih a sawi a ni. (Lk. 14:33, NWT) Kum zabi khatnaa Judai rama Kristiante chuan an thil neihte chu inhuam takin an kalsan a. (Heb. 10:34) Tûn laiah pawh, kan unau tam takte chuan politics lama an inhnamhnawih duh loh avângin, sum leh pai lama chânna nasa tak an nei a ni. (Thup. 13:16, 17) Chutianga tih inhuam tûrin anni chu engin nge ṭanpui? “Engtikah mah ka thlahthlam tawp lo vang chia, kal pawh ka kalsan tawp lo vang che,” tia Jehova thutiam chu an rin ngheh tlat vâng a ni. (Hebrai 13:5 chhiar rawh.) Theih tâwp chhuaha hma lam hun atâna ruahmannate kan siam hunah, beisei loh thilte kan chungah a lo thleng a nih pawhin, Jehova ṭanpuina kan rinchhan tlat a ni.

15. Kristian nu leh pate’n an fate lakah eng thlîr dân inbûk tâwk tak nge an neih ngai? (Milem en bawk rawh.)

¹⁵ Hnam dân ṭhenkhatah chuan nu leh pate’n an upat huna anmahni enkawla sum leh pai lama châwm tûrin fanaute an nei ṭhîn a. Dik tak chuan, Bible chuan nu leh pate chu an fate enkawl tûrin a ti zâwk a ni. (2 Kor. 12:14) Ni e, nu leh pate chuan an upat hunah enkawl an mamawh thei ngei mai. An fate pawhin chutianga tih chu an inhuam a ni. (1 Tim. 5:4) Mahse, Kristian nu leh pate hlim nachhan ber chu sum leh pai lama anmahni ṭanpui thei tûra an fate an enkawl vâng ni lovin, Jehova rawngbâwltu rawn ni thei tûra an ṭanpui vâng zâwk a ni.—3 Joh. 4.

16. Engtin nge nu leh pate chuan an fate chu mahni kêa ding thei tûra an buatsaih theih? (Ephesi 4:28)

¹⁶ I fate chu mahni kêa ding thei tûra i zirtîr rualin, i entawn tûr siam hmangin Jehova rinchhan tûrin zirtîr ang che. An naupan têt aṭangin thawh rim hlutna hre thiam tûrin zirtîr la. (Thuf. 29:21; Ephesi 4:28 chhiar rawh.) An rawn upat chhoh chuan, an school zirnaa theih tâwp chhuah tûrin ṭanpui ang che. Kristian nu leh pate chuan Bible thu bulte chu zir chianga nunpuiin, an fate’n an zir chhuahte chu fing taka an hman ṭangkai theih nân an ṭanpui thei a. Chu chuan an fate chu mahni kêa ding tûr leh rawngbâwlnaa tam lehzuala inhmang thei tûrin a ṭanpui ang.

17. Eng nge kan rin ngheh tlat theih?

¹⁷ Jehova chhiahhlawh rinawmte chuan Jehova’n sum leh pai lama kan mamawhte min phuhrûksak thei tih leh min phuhrûksak a duh tih chu an ring thei a. He kalhmang tâwpna kan hnaih zêl rual hian Jehova chunga kan rinnghehna chu fiah a ni thei a. Eng thil pawh lo thleng se, Jehova’n sum leh pai lama kan mamawhte min pe dâwn tih chu rin ngheh i tum tlat ang u. Min ṭanpui tûrin Jehova kut chak tak chu engtikah mah a tawi ngai lo vang tih kan ring nghet tlat thei a ni.