ZIR TUR THUZIAK 51
HLA 3 Kan Chakna, Kan Beisei, Kan Rinchhan
I Mittui Chu Jehova Tân A Hlu
“Ka mittuite hi i savun pengah chuan thun ang che; I lehkhabuah a chuang hlawm lâwm ni?”—SAM 56:8.
A TUM BER
Jehova’n kan rilru natnate a hriatthiam a, kan mamawh thlamuanna min pêk dân tûr.
1-2. Eng dinhmunte’n nge kan mittui titla thei?
KAN zavai hian mittui tlâk châng kan nei ṭhîn a. Lâwm avânga mittui tlâk châng a awm a. Entîr nân, i fa a lo pian hunah te, hun hlimawm tak i ngaihtuah lêt hunah te, a nih loh leh kum rei tak chhûng i hmuh tawh loh i ṭhian kawmngeih tak i hmuh leh hun ang chi hun hlimawm takahte hian a ni thei a ni.
2 Amaherawh chu, kan rilru a nat avânga kan mittui tlâkna chu a tam zâwk a. Entîr nân, tu emawin min tihlunghnual hunahte, natna khirh tak kan tawrh hunahte, a nih loh leh kan hmangaih tak tu emaw thihnaa kan chân hunahte kan mittui a tla ṭhîn a ni. Chutiang hunahte chuan, Babulon mite’n Jerusalem an tihchhiat laia Jeremia tawrh angin kan tuar ve thei a. Ani chuan: “Ka mit chu chhum lo chat lovin, hân chuang lovin a luang chhuak,” tiin a sawi a ni.—ṬH. 3:48, 49.
3. Jehova chu a chhiahhlawhte rilru hrehawm taka an awm a hmuh hian engtin nge a awm? (Isaia 63:9)
3 Dinhmun khirh takte avânga kan mittui tlâkna zawng zawng chu Jehova’n a hria a. A chhiahhlawhte hmachhawn dinhmun lungchhiatthlâk takte chu a hriatpuiin, a ṭanpui ngaia kan auh hunah a ngaithla tih Bible-in min tiam a ni. (Sâm 34:15) Mahse, Jehova chuan min hriatpuia min ngaihthlâksak mai aia tam a ti a. Hmangaihna nei tak nu leh pa angin, a fate lungchhiaa ṭap a hmuh hian, a rilru a khawihin ṭanpui a châk hle a ni.—Isaia 63:9 chhiar rawh.
4. Bible-a tute chanchin nge kan sawiho vang a, chuta ṭang chuan Jehova chungchâng eng nge kan zir ang?
4 Jehova chuan a Thu-ah, a chhiahhlawhte mittui a tlâk huna a ṭanpui dân chu a târ lang a. Chu chu Hani, Davida, leh Lal Hezekia chanchin aṭangin kan hre thei a ni. Engvângin nge an mittui a tlâk? Ṭanpui dîla an auhna chu engtin nge a chhân lêt? An thiltawnte chuan lungchhiatna avâng te, phatsanna avâng te leh, beidawnna avângtea kan mittui a tlâk hunah engtin nge min thlamuan theih?
LUNGCHHIAT AVANGA MITTUI TLAKNA
5. Hani chu a dinhmun tawn avângin engtin nge a awm?
5 Hani chuan a mittui tlâktîrtu harsatna chi hrang hrang a tâwk a. A pasal chuan amah lo nupui dang, Penini pawh a nei a. Ani chuan Hani chu a tirethei hle a ni. Chu bâkah, Hani chu a ching a. Penini erawh chuan fa tam tak a nei thung. (1 Sam. 1:1, 2) Chuvângin, Hani chu nasa takin a deusawh ṭhîn a ni. Chutiang dinhmun chu tâwk ve ta la, engtin nge i awm ang? Hani chu a lungchhiat êm avângin, “a ṭap a ṭap a, chaw pawh a ei lo va.” A rilru “a mangang êm êm” bawk a ni.—1 Sam. 1:6, 7, 10.
6. Hani’n thlamuanna hmu tûrin eng nge a tih?
6 Engtin nge Hani chuan thlamuanna a hmuh? Amah ṭanpuitu pakhat chu biakna dik hmunpui, biak bûka a kal ṭhinna a ni. Biak bûk hungchhûng luhna bulah chuan “LALPA hnênah a ṭawngṭai a, lungchhe takin a ṭap a.” Jehova hnênah chuan: ‘I bâwihnu tlâwmzia hi min hriatsak la, min hre reng ang che,’ tiin a ngên a. (1 Sam. 1:10b, 11) Ṭawngṭaiin Jehova hnênah a thinlung a leih bua a ni. A fanu duh tak mittui tla chuan Jehova rilru a va khawih dâwn êm!
7. Pathian Jehova hnêna thinlung leih buaa ṭawngṭaina chuan Hani chu engtin nge a thlamuan?
7 Jehova hnêna a thinlung a leih buaka Puithiam Lal Elia hnên aṭanga thlamuanna thu a dawn hnu chuan, Hani chu engtin nge a awm? Bible chuan: “Hmeichhia chu a kal ta a, chaw te a ei a, lungngai hmêl a pu ta lo va,” tiin a sawi a ni. (1 Sam. 1:17, 18) A dinhmun chu inthlâk danglam nghâl lo mah se, rilru hahdamna a nei a ni. A phurrit tak chu Jehova hnênah a nghat a. Pathian chuan a manganna chu a hmuhsak a. Mittui tla chunga a ṭawngṭaina chu ngaihthlâksakin, a hnuah fa neih theihna a pe a ni.—1 Sam. 1:19, 20; 2:21.
8-9. Hebrai 10:24, 25-a sawi angin, engvângin nge Kristian inkhâwmnatea tel tûra theih tâwp kan chhuah ang? (Milem en bawk rawh.)
8 Kan tâna zir tûr. Lungchhe taka mittui tlâktîrtu che harsatna i hmachhawn mêk em? I chhûngkaw zînga mi emaw, i ṭhian emaw i sûn pawh a ni thei a. Chutiang huna mahni chauhva awm duhna neih chu thil pângngai tak a ni a. Mahse, Hani’n biak bûka a kalna aṭanga thlamuanna leh fuihna a dawng angin, nang pawhin i peih vak loh hun pawha Kristian inkhâwmnaahte telin thlamuanna i dawng thei a ni. (Hebrai 10:24, 25 chhiar rawh.) Inkhâwmnaa thlamuanna thute kan ngaihthlâkna aṭangin Jehova chuan a thim zâwnga kan ngaihtuahna chu a êng zâwnga thlâk tûrin min ṭanpui thei a. Kan dinhmun chu a ṭha chho nghâl lo a nih pawhin, chu chuan kan rilru vei zâwngte thunun tûrin min ṭanpui thei a ni.
9 Kan inkhâwmnaahte chuan min lainattu kan unaute nên kan inkâwm thei a. Min hmangaihna leh ngaihsakna chuan min tichak thei a ni. (1 Thes. 5:11, 14) A nupui sûntu special pioneer unaupa pakhat chungchâng hi lo ngaihtuah ta ila. Ani chuan: “Ka mittui a la tla fo va. A châng chuan, kil khata ṭhuin ka ṭap leh ringawt ṭhîn a. Mahse, kan inkhâwmte chuan nasa takin min thlamuan a. Ka unaute ṭawngkam ngilnei takte chuan min hnêm tak zet bawk a. Eng ang khawpa lungngai pawhin inkhâwmnaah kal mah ila, ka thlen meuh chuan ka ziaawm leh sawt ṭhîn,” tiin a sawi a. Inkhâwmnaa kan tel hian Jehova chuan min ṭanpui tûrin kan unaute a hmang thei a ni.
Kan Kristian unaute hnên aṭangin thlamuanna kan dawng thei (Paragraph 8-9 na en rawh)
10. Rilru na taka kan awm hunah Hani chu engtin nge kan entawn theih?
10 Hani chuan Jehova hnêna ṭawngṭaia a thinlung a leih buakna aṭangin thlamuanna a hmu a. Nang pawhin i ṭawngṭaina a ngaihthlâksak ang che tih ring nghet tlat chungin, ‘i manganna zawng zawng Jehova chungah i nghat’ thei a ni. (1 Pet. 5:7) A pasal suamhmangte kuta a thih hnuah unaunu pakhat chuan: “Ka thinlung hi a kehsawm vekin, a dam leh theih ka ring tawh lo va. Mahse, ka Pa duh tak vâna mi Jehova hnêna ṭawngṭaina aṭangin thlamuanna ka hmu a. Sawi tûr ber ka hriat loh châng pawhin min hre thiam a ni. Chu bâkah, lungngai taka ka awm chângin, thlamuanna min pe tûrin ka ṭawngṭai a. Chu veleh, ka rilru leh thinlungah hahdamna ka rawn nei a. Tichuan, ka tih tûrte chu ka ti leh thei ṭhîn,” tiin a sawi. Jehova hnêna i mangannate i thlen hian i rilru natna chu hriatthiamsak chein, i lungngaihna mittui chuan a rilru a khawih tak zet a ni. I harsatna chu la awm reng mah se, Jehova chuan hnêm chein thlamuanna eng emaw chen nei tûrin a ṭanpui thei che a. (Sâm 94:19; Phil. 4:6, 7) I rinawmna leh chhelna avângin mal a sâwm dâwn che a ni.—Heb. 11:6.
PHATSANNA AVANGA MITTUI TLAKNA
11. Engtin nge dinhmun harsa tak a hmachhawnte chuan Davida chu a awmtîr?
11 Davida chuan a nunah a mittui tlâkna thlentu dinhmun harsa takte a hmachhawn a. Hawtu tam tak a neih bâkah, a mi rin takte pawhin an phatsan bawk a ni. (1 Sam. 19:10, 11; 2 Sam. 15:10-14, 30) “Ka rûmna lamah ka chau ta; zan tin ka mutna chu mittuiin a huh a; ka khum chu ka mittuiin ka tihuh ṭhîn,” tiin a sawi hial a ni. Engvângin nge Davida chu chutianga a awm? “Hmêlma avângin,” tiin a sawi a. (Sâm 6:6, 7) Mi dangte thiltih ṭha lo takte chuan a rilru a tihnat êm avângin, a mittuite chu dan zawh rual lohvin a tla a ni.
12. Sâm 56:8-a sawi angin, Davida chuan eng nge a rinngheh tlat?
12 Davida chuan harsatna tam tak tâwk mah se, Jehova’n a hmangaih tih a ring nghet tlat a. “LALPAN ka ṭap thâwm a hre tawh si a,” tiin a ziak a ni. (Sâm 6:8) Ṭum dangah chuan Sâm 56:8-a kan hmuh thu ngaihvenawm takte chu a ziak bawk a. (Chhiar rawh.) Chûng thu-ahte chuan Jehova ngaihsakna duhawm takte chu târ lan a ni. Davida chuan Pathianin a mittui chu savun pengah a khâwl khâwm, a nih loh leh lehkhabuah a chhinchhiah ang maiin a hria a. A Pa duh tak vâna mi chuan a thil tawhte bâkah, chûngte’n a chunga nghawng an neih dân chu a hriatpui tih a ring nghet tlat a ni.
13. Mi dangte’n min tihlunghnual hunah eng nge kan hriat reng ngai? (Milem en bawk rawh.)
13 Kan tâna zir tûr. I mi rin tak tu emawin a tilunghnual che, a nih loh leh a phatsan che avângin rilru hrehawmna nasa tak i nei em? I ngaihzâwng, a nih loh leh i kawppuiin rin loh taka a ṭhen vâng che emaw, i hmangaih tak tu emawin Jehova rawngbâwl a bânsan vâng emawin rilru na takin i awm pawh a ni thei a ni. A nupuiin a uirêsana a chhuahsan hnuah, unaupa pakhat chuan: “Min ṭhâwngin âwih harsa ka ti hle a. Tlâktlai lo nia inhriatna ka nei a. Ka lung a chhiain ka thinrim hle bawk a ni,” tiin a sawi. Phatsan, a nih loh leh tihlunghnuala i awm a nih chuan, Jehova’n a thlahthlam ngai lo vang che tih hriatna aṭangin thlamuanna nei ang che. Chu unaupa chuan: “Mihring inlaichînna chu a chhe thei tih ka hria a. Mahse, Jehova chu kan Lungpui a ni. Eng thil pawh thleng se, min ṭanpui tûrin a awm reng a. A mi rinawmte chu a kalsan ngai lo vang,” tiin a sawi. (Sâm 37:28) Chu bâkah, Jehova hmangaihna chuan mihringte hmangaihna a khûm tih hre reng bawk ang che. Phatsana awm chu a na dâwn hle nachungin, chu chuan Jehova’n a ngaihsaka a ngaihhlutna che chu a tinêp chuang lo. (Rom 8:38, 39) A awmzia chu: Mite’n eng ang pawhin cheibâwl che mah se, i Pa vâna mi chuan a hmangaih che a ni.
Sâm bu chuan thinlung keh chhiate chu Jehova’n a hnaih tih min tiam (Paragraph 13-na en rawh)
14. Sâm 34:18-ah chuan eng thlamuanna thute nge chuang?
14 Phatsana kan awm hian, Sâm 34:18-a Davida thusawite aṭangin thlamuanna kan hmu thei bawk a. (Chhiar rawh.) Hrilhfiahna pakhatin “thinlunga lungchhiate” tih chuan “beisei tûr nei lote” a kâwk thei tih a sawi a. Lunghnualna nasa tak an neih avânga rilru na taka awmte chu Jehova’n engtin nge a ṭanpui? A fa a mangan huna kuaha thlamuantu hmangaihna nei tak nu leh pa angin, Jehova chuan min “hnaih ṭhîn a.” Phatsan leh kalsana kan awm hunah min lainatin ṭanpui tûrin a inpeih reng a ni. Kan rilru na leh thinlung keh chhe tawh chu tihdam a châk hle a. Chu bâkah, kan harsatna tawh mêkte chhel taka tuar chhuak thei tûrin beisei tûr tam tak min pe bawk a ni.—Is. 65:17.
BEIDAWN AVANGA MITTUI TLAKNA
15. Hezekia chuan nasa taka ṭahtîrtu eng dinhmun nge a hmachhawn?
15 Juda Lal Hezekia chuan kum 39 mi a nihin, natna khirh tak a nei tih a inhria a. Chu natna chu a thihpui dâwn a ni tih Jehova hnên aṭanga thuchah chu zâwlnei Isaia chuan a rawn keng a ni. (2 Lal. 20:1) Hezekia tân beisei tûr awm lo angin a lang a. A thu hriat chuan a lung a tihchhiat êm avângin, nasa takin a ṭap a. Jehova hnênah tih tak zetin a ṭawngṭai ta a ni.—2 Lal. 20:2, 3.
16. Mittui tla chunga Hezekia ṭawngṭaina chu Jehova’n engtin nge a chhân lêt?
16 Mittui tla chunga Hezekia ṭawngṭaina chuan Jehova rilru a khawih êm avângin, a hnênah: ‘I ṭawngṭaina kha ka hria a, i mittui tla pawh ka hmu e: ngai teh, ka tidam ang che,’ tiin a hrilh a ni. Jehova chuan Isaia hmangin a nun a pawh seisak dâwn tih leh Jerusalem chu Assuria mite kut ata a chhanchhuak dâwn tih zahngaihna nei takin a tiam a ni.—2 Lal. 20:4-6.
17. Hrisêlna lama harsatna khirh tak kan tawh hunah Jehova’n engtin nge min ṭanpui? (Sâm 41:3) (Milem en bawk rawh.)
17 Kan tâna zir tûr. Enkawl dam theih loh natna i nei a nih chuan eng nge i tih theih? Mittui tla chung pawhin Jehova hnênah ṭawngṭai ang che. Bible chuan, “khawngaihnate Pa leh thlamuanna zawng zawng Pathian” chuan kan hrehawmna zawng zawngah min thlamuan dâwn tih min tiam a. (2 Kor. 1:3, 4) Tûn laiah, kan harsatna zawng zawng min lâk bosak tûrin Jehova chu kan beisei thei lo ngei mai. Mahse, tuar chhuak tûra chakna min pe tûrin kan rinchhan thei a ni. (Sâm 41:3 chhiar rawh.) Kan harsatnate hmachhawn thei tûra kan mamawh chakna, finna leh, chhûngrila muanna chu a thlarau thianghlim hmangin min pe a. (Thuf. 18:14; Phil. 4:13) Chu bâkah, natna zawng zawng tihbova a awm hun tûr Bible thutiamte hmangin min thlamuan bawk a ni.—Is. 33:24.
Jehova chuan chakna, finna leh, chhûngrila muanna min pein, kan ṭawngṭaina min chhânsak ang (Paragraph 17-na en rawh)
18. Dinhmun khirh tak i hmachhawn laia thlamuantu che Bible châng a awm em? (“Kan Mittui Hru Hultu Thu Thlamuanthlâk Takte” tih bâwm chu en rawh)
18 Hezekia chuan Jehova thusawite aṭangin thlamuanna a hmu a. Keini pawhin Bible aṭangin thlamuanna kan hmu ve thei a. Dinhmun manganthlâk takte kan tawh huna min tichak theitu thu thlamuanthlâk takte chu Pathianin Bible-ah a chuantîr a ni. (Rom 15:4) West Africa-a awm unaunu pakhatin a cancer tih a hriat chuan lungchhe takin a ṭap ṭhîn a. Ani chuan: “Nasa taka min thlamuantu Bible châng pakhat chu Isaia 26:3 hi a ni a. Kan harsatna tawhte chu chingfel vek thei lo mah ila, Jehova’n chûngte kan chhân lêt dân thununtu chhûngrila muanna min pe ang tih, chu Bible châng chuan min hriat nawntîr a ni,” tiin a sawi. Chinfel theih loh tûr anga lang dinhmun khirh tak i tawh huna nasa taka thlamuantu che Bible châng a awm em?
19. Hma lam hunah eng beisei tûr nge kan neih?
19 Ni hnuhnûng tâwp lama kan awm avângin, kan mittui tlâkna thlen theitu thilte chu tam lehzualin a awm ang tih kan beisei thei a. Mahse, Hani, Davida leh, Lal Hezekia chanchin aṭanga kan hriat tawh angin Jehova chuan kan mittui tlate chu a hmu a, chûngte chuan nasa takin a rilru a khawih a ni. Kan mittuite chu a tân a hlu tak zet! Chuvângin, dinhmun khirh tak kan hmachhawn hunah, Jehova hnêna thinlung leih buaa ṭawngṭai chu a pawimawh a. Kohhrana kan unau duh takte lak aṭangin i inla hrang ngai lo vang u. Chu bâkah, Bible chhiarna hmangin Jehova hnên aṭanga thlamuanna hmuh i tum tlat bawk ang u. Rinawm taka kan awm tlat chuan, Jehova’n malsâwmna min pe ang tih kan chiang thei a ni. Chûng malsâwmnate zîngah chuan lungngaihna avâng te, phatsanna avâng te leh, beidawnna avângtea mittui tlâkna zawng zawng a ti bo vang tih thutiam thlamuanthlâk tak pawh a tel a. (Thup. 21:4) Chuvângin, nakinah chuan lâwmna mittui chauh a tla tawh ang.
HLA 4 “Jehova Mi Vêngtu A Ni”