Rilru Inhawng Takin Zir Rawh

Inzirna nei tûra kan inbuatsaih hian, ‘Eng nge zir chhuah ka inbeisei?’ tiin kan inzâwt thei a. Mahse, Jehova’n min zirtîr a duhte aia zir chhuak tûra kan inbeiseite ngai pawimawh zâwk lo tûrin kan fîmkhur a ngai a ni. A nih chuan, engtin nge rilru inhawng taka inzirna kan neih theih ang?

Finna dîlin ṭawngṭai rawh. Jehova’n tûna zir tûr chea a duhte i hriatthiam theih nân a ṭanpuina dîl rawh. (Jak. 1:5) Tûn hmaa i thu hriat tawhteah chauh innghat lo vang che.—Thuf. 3:5, 6.

Bible thiltihtheihna danglam tak chungah zahna lantîr rawh. “Pathian thu hi a nung a.” (Heb. 4:12) Pathian “thu” nung chuan Bible kan chhiar apiangin kawng hrang hrangin min thunun thei a; mahse, kan chhiar ruala kan zir theihte leh hriat theihte atâna kan rilru kan hawn chauhvin chutiang chu a thleng thei a ni.

Jehova min buatsaihsak zawng zawngte chu ngaihlu rawh. Thlarau lam chaw min pêkte hi ‘thil thautea khat ruai’ ang a ni a. (Is. 25:6) Ngaina lo tûra i inngaih “ruai” ei loh chu pumpelh ang che. Chûngte chu i hlâwkpui mai bâkah, Pathian thil buatsaihsak che avâng chuan lâwmna nasa tak i nei ngei ang!