I Lo Hre Tawh Em?

Philipa’n a pan laiin Ethiopia mi tilreh chuan eng ang lîrthei nge a chuan?

“TAWLAILIR” tiha New World Translation-in a lehlin a tîra ziak thu mal chuan lîrthei chi hrang hrang a kâwk thei a. (Tirh. 8:28, 29, 38) Chutih rualin, Ethiopia mi chuanna lîrthei chu indona tawlailîr leh intihsiakna tawlailîr aia lian a nih a rinawm. Chutianga kan sawi theih chhante chu i lo ngaihtuah ang u.

Ethiopia mi, thuneihna sâng tak chelhtu chu hla taka zin a ni. Ani chu “Ethiopia lalnu Kandaki hnuaia mi tilreh lal tak, a ro zawng zawng enkawltu” a ni a. (Tirh. 8:27) Hmân lai Ethiopia ram chuan tûn laia Sudan leh Egypt chhim lam a huam tel a ni. Ani chu a zin chhûngin lîrthei pakhatah chauh a chuang lo mai thei a; mahse, chu zin kawng thui tak atân bungruate a ken tel ngei a rinawm. C.E. kum zabi khatnaa zin mite hman ṭhin lîrthei zîngah chuan tawlailîr ke li nei a tel a. Acts—An Exegetical Commentary tih lehkhabu chuan: “Chutiang tawlailîrah chuan bungrua tam lehzual a phurh theihin, chuan nuam tak a ni a, chumi hmang chuan mite’n hmun hla tak tak an zin theih a rinawm,” tiin a sawi.

Philipa’n a pan laiin Ethiopia mi chuan lehkha a lo chhiar. Bible chuan: “Philipa chu mi tilreh hnênah chuan a va tlân a, zâwlnei Isaia lehkhabu a chhiar a hria a,” tiin a sawi. (Tirh. 8:30) Zinna tawlailîrte chu chak taka tlân tûra siam an ni lo va. Chutianga muangchânga an tlân avângin mi tilreh chuan lehkha a chhiar theih mai bâkah, Philipa pawhin tawlailîr chu kein a ûmpha thei a ni.

Ethiopia miin “a hnêna ṭhu chhuak tûrin Philipa chu a sâwm.” (Tirh. 8:31) Intihsiakna tawlailîrah chuan a khalhtu chu a ding ṭhîn a. Mahse, zinna tawlailîrah erawh chuan mi tilreh leh Philipa ṭhut nân hmun a awm thei thung.

Thâwk khuma ziak Tirhkohte bung 8-na leh kan hmuh theih hmân lai thilthleng chanchinte enin, tûn hnaia kan thu leh hla chhuahahte chuan Ethiopia mi tilreh chu indona tawlailîr leh intihsiakna tawlailîr aia lian zâwk tawlailîra chuang anga târ lan a ni ṭhîn a ni.