Bible Hriatthiam Nâna Ṭanpuitu
BIBLE hi lehkhabu danglam tak a ni a. A ziaktute hian Pathian thâwkkhuma ziak niin an inchhâl a, a chhûnga thu awmte chuan chu an inchhâlna dikzia fiahna tam tak a pe a ni. (2 Timothea 3:16) Chubâkah, kan lo awm ṭanna te kan lo pian chhan te leh hma lam hun awm zêl dân tûr pawh min hrilh bawk. Ni e, Bible chu kan ngaihtuah phu hliah hliah lehkhabu a ni!
Bible chu chhiar i han tum ṭhîn a; mahse, hriatthiam harsa i ti pawh a ni mai thei. I zawhna chhânnate chu hre tûrin a zawnna lai tûr i hre lo pawh a ni thei e. Chutiang ang mi i nih pawhin, nangmah chuah i ni lo ve. Nangmah ang bawk hi kum zabi pakhatnaah pawh mi a lo awm tawh asin. Chu pa chu Jerusalem aṭangin anmahni khua Ethiopia panin a tawlailîrin a zin a. Chu Ethiopia mi lal tak chuan kum 700 aia tam kaltaa ziah Bible-a hrilh lâwk thu Isaia bu chu a chhiar ri a ni.
Tichuan, thâwklehkhatah tawlailîr bul aṭang chuan mi pakhat hian a rawn be ta phut mai a. A hming chu Philipa, Isua zirtîr a ni a, ani chuan Ethiopia mi hnênah chuan: “I chhiar kha a awmzia i hria em?” a ti a. Ethiopia mi chuan: “Tuma mi hrilhfiah lohvin engtin nge ka hriat theih ang?” a ti a. Tichuan, Philipa chu a tawlailîra chuanga amah hrilhfiah tûrin a sâwm ta a ni. Tichuan, a thu lo chhiar lai mêk chu Philipa chuan a hrilhfiah ta a, a hnênah chuan “Isua thu a hrilh a.”—Tirhkohte 8:30-35.
Pathian Thu hrethiam tûra Philipa’n hmâna Ethiopia mi a ṭanpui ang khân, tûn laiah pawh Jehova Thuhretute chuan mite chu Bible hre thiam tûrin an ṭanpui a. Nangpawh ṭanpui che an châk hle a ni. A tlângpui thuin, Pathian Lehkha Thu zirtîrna bul aṭanga ṭan a, a tahtawl zêla zir chu a ṭha ber a. (Hebrai 6:1) Tichuan, hma i lo sâwn chhoh zêl chuan, tirhkoh Paula’n “chaw rum” a tih—thutak thu ril zâwk —chu i lo hre thiam thei dâwn a ni. (Hebrai 5:14) I zir chu Bible ni mah se, thu chhuah dangte—Bible zirna ṭanpuitu—chuan Bible thu chi hrang hrangte hre thiam thei tûr leh a awmna hmunte hmu chhuak thiam tûrin a ṭanpui thei che a ni.
Zirna chu i tâna a remchânna hmun leh hunah neih theih a ni a. Ṭhenkhat chuan telephone hmang hial pawhin an zir a ni. Zirna chu school kal anga room hrana neih a ni lo va; i mi mal dinhmun, i seilenna dinhmun leh thiamna ang zia zêla ruahman a ni. Pawisa i chawi a ngai hek lo. (Matthaia 10:8) Exam-te a awm lo va, nuam lo tihna i nei hauh lo vang. I zawhnate chu chhân a ni ang a, Pathian hnaih dân i zir dâwn a ni. A nih leh engvângin nge Bible chu i zir ang ni? Bible zirin i nun a tihlim zual theih chhan ṭhenkhatte hi han ngaihtuah teh. (w01 7/1)