Chhiartute Zawhna
Isua’n: “Rem lêntîr tûra lo kal emaw mi ti suh u,” tia a sawi khân, eng a sawi tumna nge?
Isua chuan remna thuchah a puang a. Mahse, ṭum khat chu a tirhkohte hnênah: “Rem lêntîr tûra lo kal emaw mi ti suh u; rem lêntîr tûra lo kal ka ni lo va, khandaih lêntîr tûra lo kal ka ni zâwk. Mi a pa dotîr tûrin, fanu a nu dotîr tûrin, mo a pi dotîr tûrin lo kal ka ni asin,” tiin a sawi a ni. (Mt. 10:34, 35) Isua sawi tum chu eng nge ni?
Isua’n chhûngkaw ṭhen hran chu a duh lo; mahse, a zirtîrna chuan chhûngkaw ṭhenkhat chungah inṭhen hranna a thlen dâwn tih a hria a. Chuvângin, Krista zirtîr nia baptisma chang duhte chuan an thu tlûkna siamte chu an chhûngte’n pawmpui loh châng an nei dâwn tih an hriat a ngai a ni. Ring lotu an kawppuite, a nih loh leh an chhûngkaw zînga mi dangte aṭanga dodâlna an hmachhawn a nih chuan, chu chuan Krista zirtîrnate chunga rinawm tlat chu a tiharsa thei a ni.
Bible chuan Kristiante chu ‘mi zawng zawng nên inrema awm’ tûrin a fuih a. (Rom 12:18) Chutih rualin, Isua zirtîrnate chuan chhûngkaw ṭhenkhat chungah “khandaih” angin nghawng a nei thei a ni. Chhûngkuaa mi ṭhenkhatin Isua zirtîrnate an pawm laia mi dangin an dodâl hian chutiang chu a thleng ṭhîn a. Chutiang dinhmunah chuan, an chênpui an chhûngte chu thutak zirtu tân hmêlmaah an insiam ta ṭhîn a ni.—Mt. 10:36.
Rinna thuhmun lo chhûngkuaa chêng Krista zirtîrte chuan Jehova leh Isua an hmangaihna fiahtu dinhmunte hmachhawn châng an nei a. Entîr nân, ring lotu an chhûngte chuan sakhaw kût nîte lâwm tûrin a tilui pawh a ni thei. Chutianga fiahna an hmachhawn hunah tu nge tihlâwm an thlan ang? Isua chuan: “Tu pawh a nu emaw, a pa emaw keimah aia hmangaih zâwk chu, ka mi ni tlâk a ni lo,” tiin a sawi a. (Mt. 10:37) Isua sawi awmzia chu, a zirtîrte ni tûr chuan kan chhûngte chu tûn hma ang tlukin kan hmangaih tûr a ni lo tihna a ni lo. Chu aiin, nuna thil pawimawh berte hre thiam tûra a zirtîrna zâwk a ni. Ring lotu kan chhûngte’n Jehova kan biakna an dodâl a nih chuan, anni chu la hmangaih reng mah ila, thil dang zawng aiin Pathian kan hmangaihna chu a pawimawh ber tih kan hre reng tûr a ni.
Chhûngte aṭanga dodâlna chu tawrh a harsa hle thei tih a chiang a. Mahse, Isua zirtîrte chuan a thusawi: “Tu pawh a kross [“nghaisakna ban,” NWT] pu-a mi zui lo chu ka mi ni tlâk a ni lo,” tih hi an hre reng tûr a ni. (Mt. 10:38) Thu danga sawi chuan, Kristiante chuan chhûngte dodâlna chu Krista zirtîrte’n inhuam taka an tawrh harsatnate zînga pakhat angin an thlîr tihna a ni. Chutih rualin, an nungchang ṭha chuan ring lotu an chhûngte chu an rilru thlâk tûr leh Bible thuchah zir duhna nei tûra a chêttîr an beisei tlat a ni.—1 Pet. 3:1, 2.