Kawppui Ring Lotu Tuemaw Chu I Ṭanpui Thei Ang Em?
1. Engvângin nge sakhaw thuhmun vuan lo chhûngkuaa mite chu an kawppui ring lotute thutak pawm tûra ṭanpui duhtu awmchhun an nih loh?
1 In kohhrana thuchhuahtu ṭhenkhat chuan ringtu ni lo nupui pasal an nei em? An neih chuan, an kawppuite’n biakna dik an pawm ve chu an duh ngei ang. Mahse, chutianga duhtu chu anmahni chauh an ni lo. Kohhran chhûnga mi tinte chuan Pathian ang bawkin ‘mi zawng zawng chhandama awmah leh thutak hriaah an duh’ a ni. (1 Tim. 2:4) Engtin nge kan kohhrana thuchhuahtute kawppui ring lotute chu kan ṭanpui theih ang?
2. Engtin nge hriatthiamna chuan kawppui ring lotu ṭanpui tûrin min puih ang?
2 A hmasa berah chuan, ring lotute thil thlîr dân hmuh thiam chu kan tum phawt tûr a ni a. Ring lotu kawppui tam tak chuan an chhûngkua an hmangaihin, kawppui ṭha leh nu leh pa ṭha tak nih an tum a. Kan sakhaw thurin a inan lohna laite hriat chian an duh pawh a ni thei. Anni chuan min hre chiang lo leh min hawtu an ṭhiante thusawi tih chauh loh chu Jehova Thuhretute chungchâng an hre mang meuh lo thei a ni. Ṭhenkhat lungnih loh chhan chu an kawppuin tûn hmaa chhûngkaw tâna hun an hman ṭhinte kha Pathian biak nâna an hman tâk vâng pawh a ni. Hriatthiamna chuan ring lotu kawppui chu ngilnei tak leh zah thiam taka cheibâwl tûr leh an kianga zâm lutuka awm lo tûrin min ṭanpui ang.
3. Kawppui ring lotute hneh theih dân kawng ṭha ber chu eng nge ni?
3 Mi Mal Ngaihsakna Lantîr: Thutak pawm tûra kawppui ring lotu hneh theih dân kawng ṭha ber chu, a tîr lamah tal Bible thu sawipuina aṭang ni lovin, kan thiltih aṭangin a ni thei a. (1 Pet. 3:1, 2) He mi chungchângah hian mi mal ngaihsakna lantîr chu a pawimawh hle. Kohhrana unaunute chuan ring lotu nupui chu an ngaihsak thei a, chutiang bawkin unaupate pawhin ring lotu pasal chu an ngaihsak thei bawk a ni. Engtin nge an ngaihsak ang?
4. Engtin nge mi mal ngaihsakna kan lantîr ang?
4 Kawppui ring lotu chu i la hmu lo a nih chuan, a kawppui ringtu zâwkte nêna sawihona in neih hnua hmuh chu a ṭha thei ang. Ring lotu chuan a tîrah a chhâng let ṭha vak lo che a nih pawhin lunghnual mai suh ang che. Kan nêlawmna leh amah kan ngaihsakna chuan Jehova Thuhretute chungah thlîr dân ṭha zâwk a neihtîr thei ang. (Rom 12:20) Kristian puitling ṭhenkhat chuan inhmêlhriat ṭhat lehzual nân leh inhuatna awm thei eng pawh paih bo nân ringtu an kawppuite rualin ring lotute chu chawi ei-ah an sâwm a ni. Thlarau lam thil ngawr ngawr sawipui luih ai chuan, ring lotu ngaihven zâwng thute an sawipui a. A hnua nuam a tih hunah, Bible chungchâng chu sawihopui theih a ni ang. A nih loh leh, a nupui thil zirte a hriat theih nân inkhâwma sâwmna chu a pawm duh pawh a ni thei ang; a bîk takin kohhran chhûnga mi ṭhenkhat a lo hriat tawh avângin. Thutak bih chian la duh chiah lo mah se, ringtu a kawppui a thlâwpna avângin fakawm hle a ni.
5. Engtin nge upate chuan kawppui ring lotu chu an ṭanpui theih?
5 A bîk takin, upate chuan kawppui ring lotute chu an ṭanpuiin, thu hrilh theihna hun remchângte an hmang ṭangkai tûr a ni. Bible chungchâng sawipui theih loh kawppui ring lotu chuan damdawi ina a awm hunah emaw, natna khirh tak a tawrh hunah emaw Bible thua fuihna chu a ngaithla duh mai thei a. Sakhaw thuhmun vuan lo chhûngkuain chhiat tawh ang chi buaina lian tham a tâwk a nih chuan, upate chuan an chhûngkua an thlamuan hunah ring lotu pawh lo tel ve tûrin an sâwm thei a ni.
6. Kawppui ring lotute ṭanpui chhan tûr eng nge kan neih?
6 Kawppui ring lotu tuemawin thutak a pawm avânga kan kohhrana a nupui emaw, a pasal emawin hlimna a hmuh nasat dân tûr chu han ngaihtuah teh! Chu thilthleng hlimawm tak chuan Pathian Jehova te, vântirhkohte, leh kohhrana mi dangte pawh nasa takin a tilâwm bawk ang. (Lk. 15:7, 10) Amaherawhchu, kawppui ring lotu chuan atîrah a chhâng lêt ṭha lo a nih pawhin, kan thawhrimna chuan ‘tuma boral duh lova, mi zawng zawng lo sim duhtu,’ Jehova a tilâwm tih hriatna aṭangin hlimna kan nei thei tho tho a ni.—2 Pet. 3:9.
[Phêk 6-naa thu lâk chhuah]
Thutak pawm tûra kawppui ring lotu hneh theih dân kawng ṭha ber chu, a tîr lamah tal Bible thu sawipuina aṭang ni lovin, kan thiltih aṭangin a ni thei