INHUATNA THLENG LEH ṬHIN TIHTAWP DAN

1 | Duhsak Bîk Nei Suh

Bible Zirtîrna:

“Pathianin mi duhsak bîk a nei lo, . . . nimahsela, hnam [mi] tin zîngah tu pawh amah ṭiha fel taka ti apiang a lâwm zâwng mi an ni ṭhîn.”—TIRHKOHTE 10:34, 35.

A Awmzia:

Pathian Jehovaa chuan kan hnam te, vun rawng te, leh hnam dânte enin kan chungah ro a rêl lo va. Chu aiin, kan chhûng lam nihna chu a ngaihven zâwk a ni. Dik tak chuan, “mihring chuan pâwn lama lan dân an en ṭhîn a, LALPA erawh chuan thinlung lam a en zâwk ṭhîn.”—1 Samuela 16:7.

I Tih Theihte:

Mite thinlung hre thei lo mah ila, Pathian entawnin mi dangte chu duhsak bîk nei lova thlîr kan tum tlat thei a ni. Mite chu a huho ang ni lovin a mi mal anga hmuh tum rawh. Mi dangte—hnam dang mite—chungah a thim zâwnga thlîrna i nei nia i inhriat chuan Pathian hnênah ṭawngṭai la, chutiang rilru put hmang chu paih bo thei tûrin a ṭanpuina dîl ang che. (Sâm 139:23, 24) Duhsak bîk nei lo tûra Jehova hnêna tih tak zeta i dîl chuan, i ṭawngṭainate chu a ngaithlain, a ṭanpui ngei ang che tih i ring tlat thei a ni.—1 Petera 3:12.

a Jehova chu Pathian hming bil a ni.—Sâm 83:18.

“Tûn hma chuan, mi ngote nên inrem takin kan la ṭhu dûn ngai lo . . . Tûnah chuan, khawvêl pum huapa inunauna dik tak neitute zînga mi ka ni ta.”—TITUS-A

Nuna Thiltawn—TITUS-A

Inhuatna Thleng Leh Ṭhîn Chu A Hneh

Titus-a chu hnam inthliarna rawngkai, hleih nei taka dân siamte avângin a thinrim hle a; chuvângin, a ngaih dân ang nei mi sual pâwl pakhat chu a zawm a. Ani chuan: “Mi dumte thlen phal lohna hmun hotel leh bar-ahte buaina siam tûr ringawtin kan vâk kual ṭhîn,” tiin a sawi. Titus-a chu huatna rilrua a khah tlat avângin a thinchhe hle tih a inhria a: “Mite nêna kan inhnial hian mipa an ni emaw, hmeichhia an ni emaw pawh ni se, kûtthlâk hmasatu ka ni ziah,” tiin a sawi belh a ni.

Titus-a chu Jehova Thuhretute nêna Bible an zir ṭan chuan a inthlâk danglam ṭan a. Bible a han chhiar chuan, a thu chhiarte chuan a chungah nasa takin nghawng a nei a ni. A bîk takin, “thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang,” tih sawina khawvêl thar chungchânga Pathian thutiam chuan a rilru a hneh hle a ni.—Thu Puan 21:3, 4.

A tîrin, Titus-a chuan a thinlunga huatna a neih chu paih bo harsa a ti hle a. “Ka ngaihtuah dân leh thiltih dânte thlâk danglam chu harsa tak a ni,” tiin a sawi. Mahse, Pathianin mi duhsak bîk a nei lo tih târ lanna Tirhkohte 10:34, 35 aṭanga a thu zirte chuan inthlâk danglam tûrin a ṭanpui a ni.

Eng nge a rah chhuah? Titus-a chuan: “Jehova Thuhretute chu an hnam leh an vun rawngte inang lo mah se, an zîngah hmangaihna a awm tih ka hmuh aṭangin an sakhaw vawn hi a dik tih ka ring tlat a ni. Thuhretu pakhat nia baptisma ka chan hma pawhin, kohhrana mi ngo unau pakhatin a ina chaw ei tûrin min sâwm a. Ka mumang ang mai ni hian ka hria. Tûn hma chuan, mi ngote nên inrem takin kan la ṭhu dûn ngai lo; mah se, tûnah chuan a inah chaw kan ei dûn ta reng mai. Tûnah chuan, khawvêl pum huapa inunauna dik tak neitute zînga mi ka ni ta,” tiin a sawi.