Leilung Chhiatna Tâwkte Ṭanpui Dân

Leilung chhiatna hi tûn hma zawng aiin a thleng nasa a. Leilung chhiatna a thlen hian chhiat tâwkte ṭanpui tûrin ṭha taka inrêlbâwl leh fel fai taka inruahman a ngai a. Chuvângin, Governing Body chuan branch office tinah Disaster Relief Department a din a ni.

Chu department-a awm unaute chuan leilung chhiatna a thleng tih an hriat veleh thuchhuahtute mamawh an hriat theih nân tualchhûng upate an be pawh nghâl a. Chhiatna thleng chu tualchhûng unaute chinfel theih loh khawpa nasa a nih chuan, branch-in chhawmdâwlna hna kaihruai tûrin unaupate a tîr ang. Chûng unaupate chuan tlâwmngaia inpe thei unaute an sâwm emaw, mamawh zualpuite thawh khâwm tûrin ṭanpuina an dîl emaw, a nih loh leh tualchhûnga unaute mamawh chu an leiin an sem emaw a ni thei.

Hetianga chhawmdâwlna kalpui a nihna hian ṭhatna tam tak a nei a. Hei hian unaute’n mahni remhriatnaa hma an lâk avânga thilthleng thei hah thlawnna te, thawh tûr ber hriat lohna te, leh sum leh pai leh thil neih khawhralnate chu min pumpelhtîr a ni.

Branch-in a tirh unaupate chuan chhawmdâwlna atâna sum leh pai mamawh zât leh tlâwmngaia inpe thei unaute mamawh zât chungchângah thu tlûkna an siam theih phah a. Kan chhawmdâwl hna chak lehzuala kal tûrin tualchhûng thuneitute chu an thawhpui thei bawk. Chuvângin, ti tûra kaihhruaina an dawn loh chuan mimal remhriatnaa thawhlâwm khawn te, chhawmdâwlna thil thawn te, a nih loh leh chhiat tawhna hmun tlawh ang chite chu tu man an ti tûr a ni lo.

Mahse, chhiatna a lo thlen hian ṭanpuina pêk kan duh a ni. (Heb. 13:16) Unaute chu kan hmangaih hle! A nih chuan, eng nge kan tihsak theih? Kan tihtheih pawimawh ber chu chhiat tâwkte leh chhawmdâwl hna thawktu unaute tâna ṭawngṭaisak hi a ni. Khawvêl pum huap rawngbâwlna atân thawhlâwm kan thawh thei bawk. Governing Body kaihhruaina hnuaiah chûng thawhlâwm tling khâwmte chu branch office-te chuan a ṭha thei ang bera hmanna hmun tûr an hria a. A mi mal taka ṭanpuina pêk kan inhuam a nih chuan, Local Design/Construction Volunteer Application (DC-50) form chu ziak khatin kan theh lût thei a ni.

BRAZIL RAMA TUI LIAN RAPTHLAK TAK TIH VIDEO EN HNUAH HE ZAWHNA HI CHHANG ANG CHE:

Jehova Thuhretute’n kum 2020-a Brazil rama tui lian tuarte chhawmdâwlna an pêk dânah engin nge i rilru khawih ber?