“Pathianin A Zawm Tawh Chu . . . ”

Mosia Dân chuan mipain a nupui ṭhen a rilrûk chuan inmâkna lehkha ziak tûrin a phût a. Hei hian nupate chu awlsam taka inṭhen lo tûrin a vêng a ni. Mahse, Isua hun laia sakhaw hruaitute chuan inṭhen chu an tiawlsam hle a. Mipate chuan chhan ho tê têah an nupuite an ṭhen thei a ni. (Mk. 10:4, 11 ṭanchhan nwtsty study note) Isua’n inneihna chu Jehova ngeiin remti a, bul a lo ṭan a nih thu a sawi a.(Mk. 10:2-12) Nupate chu inzawmna nghet tak nei “tisa pumkhat” an ni tûr a ni. Bible-in inṭhen a phal chhan awmchhun chu, “tlangvâl ngaih vâng,” a nih loh leh nungchang bawlhhlawhna vâng chauh a ni tih, Matthaia pawhin a ziak a ni.—Mt. 19:9.

Tûn laia mi tam tak chuan inneihna chu Isua thlîr ang ni lovin, Pharisaite thlîr angin an thlîr zâwk a. Khawvêl mite chu buaina a lo chhuah hian an inṭhen mai ṭhîn. Kawng leh lamah, Kristian nupate chuan an inneihna thutiam chu an ngai pawimawh hle a, Bible thu bulte nunpuiin an harsatnate chu chinfel an tum a ni. Hmangaihna leh Zahna Chuan Chhûngkua A Inpumkhattîr tih video en hnuah a hnuaia zawhnate hi chhâng ang che:

• 

  Engtin nge i kawppui nêna in indâwrnaah Thufingte 15:1 chu i nunpui theih a, chu chu engvângin nge a pawimawh?

• Engtin nge Thufingte 19:11 nunpuina aṭangin buainate i pumpelh theih?

• In inneihna kehchhe dâwn anga a lan hunah, ‘Ka ṭhen mai dâwn em ni?’ tia ngaihtuah aiin, eng zawhnate nge i ngaihtuah ang?

• Engtin nge Matthaia 7:12 nunpuina aṭangin pasal ṭha zâwk emaw, nupui ṭha zâwk emaw i nih theih?