Pathian Thuâwihte Tâna Malsâwmnate

Zâwlnei Mosia chuan Pathian thupêkte kan zawm chuan a malsâwmna kan dawng ang tih a sawi a. (Deuteronomy 10:13; 11:27) Pathian hrem hlauh avânga a thu âwih kan ni lo. Pathian kan hmangaih avâng leh amah tilungni lo thei thiltihte pumpelh kan duh avângin, a mize duhawm takte chuan a thu âwih tûrin min chêttîr a ni. “Pathian kan hmangaihna chu hei hi a ni, a thupêkte kan zawm hi.”—1 Johana 5:3.

A nih leh, Pathian thuâwihna chuan engtin nge a malsâwmna min thlen theih? Kawng hnih lo ngaihtuah ta ila.

1. PATHIAN THUAWIHNA CHUAN MIN TIFING ANG

“Kei hi LALPA in Pathian, in ṭhatna tûra nangmahni zirtîrtu, in kalna tûr kawnga hruaitu che u chu ka ni.”—ISAIA 48:17.

Siamtu Pathian chuan min hre chiangin kan mamawh kaihhruainate min pe a. Thu tlûkna fing siam tûra a zirtîrnate hlâwkpui kan duh chuan, Pathianin ti tûra min duhte chu Bible aṭanga zirin, chûng zirtîrnate chu kan nunpui tûr a ni.

2. THUAWIHNA CHUAN MIN TIHLIM ANG

“Pathian thu hriaa zâwmte hi mi hamṭha an ni zâwk e!”—LUKA 11:28.

Tûn laiah, Pathian thuâwihtu mi maktaduai tam tak chuan hlimna dik tak an nei a. Entîr nân, a nupui pawh tiamin, mi dangte râwng taka cheibâwl ṭhîntu Spain rama pa thinchhe tak chungchâng hi han ngaihtuah teh. Ni khat chu, zâwlnei Mosia thuziaka Jakoba fapa Josefa mize duhawm tak zaidamna chungchâng chu a chhiar a. Josefa chu sala hralh leh dik lo taka tân ina khung a ni chung pawhin, nunnêm tak, rilru dam tak, leh mite ngaihdam peih tak a ni reng a ni. (Genesis, bung 37-45) Chu pa chuan: “Josefa entawn tûr siam ka ngaihtuahnain zaidamna te, ngilneihna te, leh insûmtheihnate nei tûrin min chêttîr a. Tûnah chuan, nun hlimawm tak ka nei tawh a ni,” tiin a sawi.

Pathian Thu chuan mi dangte kan cheibâwl dân tûr chungchângah kaihhruaina tam tak min pe a. Chumi chungchâng chu a dawta thuziakah chipchiar lehzuala sawi a ni ang.