Rawngbâwlnaah Thiamna Tihmasâwn Rawh​—⁠Bible Zirlaite Chu Inpumpêka Baptisma Chang Thei Tûra Ṭanpuiin

A PAWIMAWH CHHAN: Jehova duhsakna dawng tûr chuan, Bible zirlaite tân a hnênah an nun pumpêkin baptisma an chan a ngai a. (1 Pet. 3:21) An inpumpêkna mila an nun hian thlarau lam vênhimna an hmu a ni. (Sâm 91:1, 2) Kristan inpumpêkna chu Jehova hnênah a ni a, mi pakhat emaw, hna pakhat, a nih loh leh pâwl pakhat emaw hnênah a ni lo. Chuvângin, zirlai tân Pathian hmangaihna leh ngaihhlutna neih chhoh a ngai a ni.—Rom 14:7, 8.

A TIH DAN TUR:

• Zirna in neih hunah, in thu zirin Jehova chungchâng a târ lante chu sawipui la. Nî tina Bible chhiar leh Jehova hnêna ‘bâng lo va’ ṭawngṭai a ngaih thu sawi uar rawh.—1 Thes. 5:17; Jak. 4:8

• Inpumpêka baptisma chan chu thlarau lam thiltuma nei tûrin i Bible zirpui chu fuih rawh. Chu bâkah, inkhâwma chhânna pêk, a nih loh leh ṭhenawmte leh hnathawhpuite hnêna thu hrilh ang chi thitum tênau zâwkte hlen tûrin ṭanpui la. Mahse, Jehova chuan a rawngbâwl tûrin tumah a tilui lo tih hre reng ang che. Inpumpêkna chu mi mal thu tlûkna a ni.—Deut. 30:19, 20

• Zirlai chu Jehova tilâwm tûr leh baptisma chang thei tûra a ṭûl anga inthlâk danglam tûrin fuih rawh. (Thuf. 27:11) An mize ṭhenkhat leh an thil chîn ṭhan chuan nghet taka zung a kaih theih avângin, Bible zirlai chuan mihring hlui hlîp thla a, mihring thara inthuam tûrin ṭanpui reng a ngai thei a ni. (Eph. 4:22-24) Vênnainsâng-a “Bible-in Nun A Thlâk Danglam” tih thuziakte chu hmuh ang che.

• Jehova rawng i bâwlnaa i neih hlimna chu hrilh rawh.—Is. 48:17, 18