Kan Zirpuite Thinlung Hneh Theih Dân
1. Engtin nge Isua zirtîrna chuan a thu ngaithlatute thinlung chu a nghawng?
1 Isua chuan a thu ngaithlatute thinlung chu a hneh a. A lo berah pawh ṭum khat chu, Pathian Lehkha Thu a hrilhfiah hnu chuan, a zirtîrte thinlung chu a “harh huai” a ni. (Lk. 24:32) Thinlung aṭanga Pathian thuâwih tûr kan nih avângin, engtin nge an nun dân thlâkthleng tûra chêttîr tûrin kan zirpuite thinlung chu kan chawhthawh theih ang?—Rom 6:17.
2. Mi thinlung hneh tûrin remhriatna leh hriatthiamna chuan eng hmun nge a chan?
2 Remhriatna leh Hriatthiamna Hmang Rawh: Thil dik leh dik lo hrilhna mai chuan, mi tam tak chu hma la tûrin a chêttîr lo vang. Bible châng tam tak hmanga an sakhaw thurinte kan va beih chuan min biak duh loh phah hial thei a ni. Mi rilru chêttîr thei tûr chuan, a thurin a rin nachhan leh thil a tih chhante kan hriatthiam phawt a ngai a. Remhriatna hmanga, ṭha taka thlan ngaih dân sawitîr thei zawhnate chuan chhûngrila a ngaihtuahna sawi chhuak tûrin a chawktho vang. (Thuf. 20:5) Chutianga kan tih chauhvin, a thinlung hneh thei tûr Bible Thute chu kan thlang thei ang. Chuvângin, mi mal ngaihsakna lantîrin, kan dawhthei tûr a ni. (Thuf. 25:15) Mi tinte thlarau lama hmasâwn dân chu a inang lo tih hre reng rawh. Jehova thlarau thianghlimin an ngaihtuahna leh an thiltihte a thunun hun chu nghâk ang che.—Mk. 4:26-29.
3. Engtin nge kan zirpuite chu mize ṭha nei chho tûra kan ṭanpui theih?
3 Mize Ṭhate Nei Tûrin Ṭanpui Rawh: Jehova ṭhatna leh hmangaihna a lanna Bible chângte chuan kan zirpuite chu mize ṭha nei tûrin a ṭanpui thei a. Pathianin min ngaihsak ṭheuh tih târ lan nân, Sâm 139:1-4, a nih loh leh Luka 12:6, 7 ang chite hi kan hmang thei a ni. Jehova khawngaihna avânga lâwmna dik tak an neih chhoh hian, Pathian an hmangaihna leh an ngaihsakna chu a pung chho vang. (Rom 5:6-8; 1 Joh. 4:19) An thiltihin Jehova chungah nghawng a nei tih an hriat hunah, amah tilâwm a, chawimawi tûr zâwnga nung tûra chêttîrin an awm thei ang.—Sâm 78:40, 41; Thuf. 23:15.
4. Rawngbâwlnaa mite kan zirtîr hunah, zalên taka duhthlan theihna an neih chu kan zah tih engtin nge kan lantîr theih?
4 Jehova chuan a thupêkte zâwm tûrin tumah a tilui lo va. Chu aiin, mite chu a thu âwih a finthlâk dân hmuhtîrin a lamah a hîp zâwk a ni. (Is. 48:17, 18) Kan Bible zirpuite chu anmahnia thu tlûkna siam thei tûr zâwnga kan zirtîr hian Jehova kan entawn tihna a ni a. An nun dân thlâkthleng a ngai tih an inhriat hian a rah chhuah chuan rei a daih a ni. (Rom 12:2) Chu chuan ‘thinlung fiahtu’ Jehova, a hnaihtîr lehzual ang.—Thuf. 17:3.