Zâwlneite Chu Entawn Atân Hmang Rawh—Zephania
1. Eng dinhmunah nge Zephania chu zâwlnei anga rawng a bâwl a, engtin nge tûn laiah kan tâna entawn tûr ṭha a nih?
1 A hun chu B.C.E. kum zabi sarihna lai hâwl vêl a ni a, Judai ramah chuan Baala chu alang apauvin an bia a ni. A hma lawk khân Lal sual Amona chu tihhlum a ni a, Lal naupang tak Josia’n ro a rêl a ni. (2 Chro. 33:21–34:1) Chutih lai chuan, Jehova’n a rorêlna thuchah puang chhuak tûrin Zephania a ruat a. Zephania chu Juda lal ina awm a nih hmêl a; mahse, Jada hruaitute chunga Jehova thiam loh chantîrna thuchah chu a thup chuang lo a ni. (Zep. 1:1; 3:1-4) Chutiang bawkin, Zephania huaisenna chu entawn tum tlatin, chhûngkhatte chu Jehova kan biakna kan indîpdâltîr lo. (Mt. 10:34-37) Zephania chuan eng thuchah nge a puan chhuah a, eng nge a rah chhuah?
2. Jehova thinrimna nîa thuhrûka kan awm theih nân eng nge kan tih ang?
2 Jehova Zawng Rawh: Jehova chauhvin a thinrimna nîah chuan mite chu a chhanhim thei a. Chuvângin, Zephania chuan Juda mite chu hun a la awm chhûnga Jehova zawng tûr te, felna zawng tûr te, leh thuhnuairawlh tum tûrtein a fuih a ni. (Zep. 2:2, 3) Tûn laiah pawh chutiang bawk chu a ni a. Zephania angin, mi dangte chu Jehova zawng tûrin kan fuih a; mahse, keini pawh “LALPA hawisantute” nih loh tum tlat chunga thil kan tih a ngai a. (Zep. 1:6) A Thu ṭha taka zirna leh a kaihhruaina zawnga ṭawngṭaina hmangin Jehova chu kan zawng zâwk a ni. Nungchang thianghlim tak vawnna hmangin felna kan zawng a. Intukluhna rilru put hmang neihna leh Jehova inawpna pâwl kaihhruaina pêk zawm vatna hmangin thuhnuairawlh kan tum bawk a ni.
3. Engvângin nge rilru put hmang ṭha chu kan vawn reng ang?
3 Rah Chhuah Ṭhate: Zephania puan chhuah rorêlna thuchah chuan a lo berah pawh Juda mi ṭhenkhat chu chhâng lêt tûrin a chêttîr a, chûng zînga hriat hlawh tak chu a naupan lai aṭanga Jehova zawngtu Josia a ni ngei ang. A hnuah Josia chuan an rama milem biakna do kawngah beihpui nasa tak a thlâk a. (2 Chro. 34:2-5) Tûn laiah, Lalram chi ṭhenkhat chu kawng dungah te, pialtlêp hmunah te, leh hnim hlîngnei zîngahte a tla a, ṭhenkhat chu lei ṭha chunga tlain, rah a chhuah bawk a ni. (Mt. 13:18-23) Lalram chi thehdarhnaa kan buai hle lai hian Jehova chuan kan thawhrimna chu mal min sâwm zawm zêl dâwn tih kan ring tlat a ni.—Sâm 126:6.
4. Engvângin nge ‘Jehova kan nghah’ reng ang?
4 Judai rama mi ṭhenkat chuan Jehova’n thil a ti ngai dâwn lo niin an ngai a. Mahse, Jehova chuan a ni ropui a hnai tawh tih mi zawng zawng hnênah a tiam a ni. (Zep. 1:12, 14) Inhumhim nâna amah hmangtute chauh chhandam an ni ang. (Zep. 3:12, 17) ‘Jehova kan nghah’ reng lai hian, kan Pathian ropui betu kan unaute nên inlungrual taka rawngbâwlnaah hlimna i hmu ang u!—Zep. 3:8, 9.