‘Mipuite Ko Khâwm Rawh’
1. Israel mite’n Aigupta an chhuahsan hnu lawka koh khâwm an nihna hun pawimawh tak chuan regional inkhâwmpui leh international inkhâwmpuite nên eng inanna nge a neih?
1 Aigupta ram an chhuahsan hnu lawk khân, Jehova chuan Sinai Tlânga A thu ngaithla tûra ‘mipuite ko khâwm’ tûrin Mosia a hrilh a, chu chu Amah an ṭih a, an fate hnêna A kawngte an zirtîr theih nân a ni. (Deut. 4:10-13) Chu hun chu hriat reng tlâk leh mi tichak thei tak a va ni dâwn êm! Lo awm tûr thla engemaw zât chhûng hian Jehova mite chu a zirtîra awm tûrin regional inkhâwmpui leh international inkhâwmpuiahte chuan an kal khâwm dâwn a. A kima kan hlâwkpui theih nân eng nge kan tih ang?
2. Kan inkhâwmpui atâna “inpuahchah” nân eng nge kan tih ang?
2 “Inpuahchah Rawh”: Jehova chuan Israel mite chu Sinai Tlânga kal khâwmna hun pawimawh tak atân “inpuahchah” tûrin thu a pe a. (Ex. 19:10, 11) Chutiang bawkin, inkhâwmpuia chanvo neite chauh ni lo, a tel tûr zawng zawngte chuan ṭha taka an inpuahchah a ngai a ni. Entîr nân, mi tam tak chuan an hnathawhna aṭanga chawlh an lâk theih nân ruahmanna an siam a ngai ang a. I dinhmun chu Nehemia dinhmun nên a inang mai thei a ni. Ani chuan Jerusalema kal a, khawpui kulh sa ṭha tûrin Lal Artazerzia no hlântu anga a hnathawhna aṭang chawlh lâk a duh a; mahse, lal chuan a phal dâwn lo tih a hria a ni. Nehemia chu a ṭawngṭai a, tichuan a dîlna thu ngainatawm tak chu huaisen takin a sawi chhuak ta a ni. Lal chuan chawlh lâk a phalsak mai bâkah, sak ṭhat hna atân a ṭanpui hial a nih chu! (Neh. 2:1-9) I hnathawhna pu hnên aṭanga chawlh dîl bâkah, zinna tûr leh thlenna tûr atân ruahmanna i siam fel tawh em? Upate chuan ṭanpui ngai apiangte ṭanpui chu an châk ngei ang. Atîr aṭanga a tâwp thlenga i tel kim vek theih nân thleng hma ziah tûrin ruahmanna siam la, i ngaihthlâk tûr thute chu ‘ṭha hnemngai taka pawisa lehzual’ tûrin inpuahchah ang che.—Heb. 2:1.
3. Thusawi atâna kan thinlung buatsaih tûrin engin nge min ṭanpui ang?
3 Kan inpuahchah dân pawimawh tak dangah chuan kan ngaihthlâk a, kan zir theih nân kan thinlung buatsaih a tel a ni. (Ezr. 7:10) Inkhâwmpui program chu jw.org-ah târ lan lâwk a ni ang a, thusawi thupui zawng zawng leh thusawi tin atân Bible châng pawimawh zual pahnih khat a tel bawk ang. Hei hian kan telna tûra ruat inkhâwmpui chawlhkâr thlenga Chhûngkuaa Pathian Biakna neih zân atâna sawiho tûr thu ṭha tak tak min pe a ni. Thuchhuahtu ṭhenkhat chuan program chu print chhuakin, inkhâwmpui chhûnga note tawi fel tak lâk nân an hmang a ni.
4. Engtin nge nu leh pate chuan inkhâwmpui chu an fate zirtîr nâna an hman theih?
4 ‘I Fate Zirtîr Rawh’: Israel mite Sinai Tlânga koh khâwm an nih chhan pakhat chu nu leh pate’n “an fate zirtîr” tûrin a ni a. (Deut. 4:10) Inkhâwmpui chuan nu leh pate chu chutianga ti ve tûrin hun remchâng ṭha tak a pe a ni. Inkhâwm chhûngin nu leh pate chuan an bulah an fate an ṭhuttîrin, ṭha taka ngaithla tûrin an ṭanpui tûr a ni a. Chhûngkuate chuan inkhâwmpui neih chhûng tlai tin leh a hnua chhûngkuaa Pathian biakna an neih hunah an thu ngaihthlâkte chu an sawiho thei a ni.
5. Inkhâwmpui lo awm tûra telna chu engtin nge kan hlâwkpui ang?
5 Sinai Tlânga inkhâwmna pawimawh tak chuan Israel mite chu Pathian mite an nihna chanvo dang lam bîk tak hlut tûrin a ṭanpui a. (Deut. 4:7, 8) Kan inkhâwmpui lo awm tûr hi chutiang bawka kan hlâwkpui theih nâna duan a ni. Ni thum chhûng chu Setana khawvêl thlalêr hrehawm tak kalsanin, kan thlarau lam paradis-ah thlarau lama hahdamna leh inkawmna nuam tak kan nei thei ang. (Is. 35:7-9) Jehova nî kan hnaih telh telh lai hian, infuih tawn tûra inkhâwm theihna hun remchâng kan neih hi i bânsan lo vang u!—Heb. 10:24, 25.