Ngaithla La, Zir Rawh
1. District inkhâwmpuinaa ngaithla a, zir tûrin engvângin nge beih nasat lehzual a ngaih mai theih?
1 Kum 2013 atâna district inkhâwmpui chu a hnai tawh hle a. Khawvêl pum rawngbâwlna atâna mamawhte târ langtu program buatsaih nân nasa taka hna thawh a ni. Tel kim vek tûrin ruahmanna i siam tawh em? Inkhâwmpui lianah chuan rilru lapêng thei thil a tam avângin, ngun taka ngaithla tûr chuan beih nasat lehzual a ngai dâwn a ni. Inkhâwmpui chu kohhran inkhâwm aia a rei deuh ṭhin avângin kan in thunun rei deuh a ngai dâwn a. Chubâkah, kan kal vêlna leh thil dang avângin kan chau deuh pawh a ni thei bawk. Kan ngaihthlâk a, kan zir theih nâna harhvâng reng tûrin engin nge min ṭanpui ang?—Deut. 31:12.
2. Engtin nge inkhâwmpui program atân kan thinlung kan buatsaih ang?
2 Inkhâwmpui Ṭan Hmain: Kan Web site, www.jw.org-ah inkhâwmpui program târ lan a ni a, thusawi thupui zawng zawng leh thusawitea Bible châng pawimawh zual pahnih khat a tel bawk a ni. Internet kan hmang thei a nih chuan, chuta thil awmte lo en lâwkna chuan inkhâwmpuia ngaihthlâk tûr thutea kan thinlung lo buatsaih tûrin min pui ang. (Ezr. 7:10) Chhûngkuaa Pathian Biakna in neih zânah inkhâwmpui nghahhlelhna in neih vek theih nân inkhâwmpui program chu in sawi ho thei ang em?
3. Engin nge ngun taka ngaithla tûrin min ṭanpui ang?
3 Inkhâwm Hun Chhûngin: A theih phawt chuan, ṭan hmain inthiarna hmun chu hmang fel vek rawh u. Inkhâwm chhûnga phone leh message-in a tihbuai loh nân che i phone off la. I off thei lo a nih chuan, phone i dawn huna mi dang i tihbuai loh nân a ri lovin i dah dâwn nia. Electronic tablet i hmang a nih chuan mi dangte tibuai lo tûrin hmang ang che. Inkhâwm lai chuan thil ei loh leh in loh tum rawh. (Thur. 3:1) Thusawitu chu en tlat la, Bible chhiar a nih laiin i lo en ve zêl dâwn nia. Tawi fel takin note la ang che.
4. Engtin nge nu leh pate chuan an fate chu ngaithla a, zir tûrin an ṭanpui theih?
4 Kan fate pawhin an ngaihthlâk a, an zir chu kan duh a. Thufingte 29:15 chuan: “Naupang thlahthlam chuan a nu zahna a thlen ṭhîn,” tih a sawi. Chuvângin, an fate chu an ṭawng a, message an thawn a, a nih loh leh an kal kual mai mai ai chuan ngun takin an ngaithla a ni tih nu leh pate’n an chian theih nân chhûngkuaa an ṭhut ho chu a ṭha a ni. Naupangte chu thusawite hre thiam vek tûra an la naupang lutuk a nih pawhin, muthlu lo leh ngawi renga ṭhu tûrin zirtîr theih an ni.
5. Engvângin nge inkhâwmpui hun duan ennawn chu a ṭangkai a, engtin nge kan tih theih ang?
5 Inkhâwm Bân Hunah: Inah haw thuai la. I mamawh ang tâwk i chawlh hahdam theih nân mu hma ang che. Inkhâwmnaa i thu ngaihthlâkte ennawnna chuan rei tak hre thei tûrin a ṭanpui ang che. Chuvângin, zâna chhûngkuaa minute rei lote in sawiho ṭhin chu a ṭangkai hle ang. Ṭhiante nên restaurant-ah in kal a nih chuan engvângin nge i note kengin, ṭha i tih zual lai pahnih khat chu i sawipui loh vang? Inkhâwmpui zawha in haw hun chuan in thu ngaihthlâkte chu Chhûngkuaa Pathian Biakna neih zânah chhûngkua anga in nunpui theih dân in sawiho thei ang a. Thu leh hla chhuah tharte ennawn nân kâr tinin hun in ruahman thei bawk ang.
6. Inkhâwmpuinaa tel ve ringawt chu a tâwk em? Sawifiah rawh.
6 Ruai ṭheh a nih pawhin ei leh pai ṭawih a nih chauh loh chuan awmzia a nei tlêm hle a. District inkhâwmpuia thlarau lam ruai buatsaih tûr chungchângah pawh chutiang tho chuan kan sawi thei a ni. A bul aṭanga a tâwp thlenga inkhâwmpuia tel a, ngun taka ngaithla a, kan thil zirte nunpuiin i hlâwkpui tak zet ang u.