Pathian Thuin Thil A Ti Thei
1. Kum 2014 rawngbâwl kum atâna special inkhâwmpui thupui tûr chu eng nge ni?
1 Mihring ṭha famkim lote aṭanga chhuak ang lo takin, Bible chuan min thlâk danglam tûr leh Pathian duhzâwng mila kan ngaihtuahna leh nun kawngte siam tûrin thiltihtheihna a nei a ni. Pathian Thu chuan engtin nge thil a tih theih? Engtin nge kan nunah a thiltihtheihna chu kan hman ṭangkai takzet theih ang? Engtin nge chu chu mi dangte ṭanpui tûra kan hman ṭangkai lehzual theih? Kum 2014 rawngbâwl kum atâna buatsaih special inkhâwmpui chhûnga sawiho tûr thute chuan thlarau lamah hmasâwnna min neihtîr ṭheuh ang tih kan ring tlat a ni. A thupui chu Hebrai 4:12 aṭanga lâk chhuah “Pathian Thuin Thil A Ti Thei,” tih a ni.
2. Eng zawhnate chhânna nge hriat kan tum ang?
2 Hêng Zawhnate Chhânna Hi Hriat Tum Rawh: Inkhâwmpuia thu ngaihthlâk a nih hunah a hnuaia zawhnate chhânna hi lo chhinchhiah ang che.
• Engvângin nge Jehova Thu chu kan rin tlat ang? (Sâm 29:4)
• Engtin nge kan nunah Pathian Thu thiltihtheihna kan tawn theih? (Sâm 34:8)
• Engtin nge i rawngbâwlnaa Pathian Thu thiltihtheihna chu i lantîr theih? (2 Tim. 3:16, 17)
• Engtin nge Setana khawvêla tlulût tûra bumna chu kan pumpelh theih? (1 Joh. 5:19)
• Ṭhalai i nih angin engtin nge thlarau lama hlawhtlinna i neih theih? (Jer. 17:7)
• Engtin nge kan chak loh hunah pawh kan chak theih? (2 Kor. 12:10)
• Thil chîn ṭhan leh rilru put hmang ṭha lo takte chu lo nei nghet tawh mah ila, inthlâk danglam zêl thei tûra thil pawimawh ber chu eng nge ni? (Eph. 4:23)
3. Inkhâwmpui thusawite ngaihthlâk mai bâkah, eng kawng dangin nge special inkhâwmpui nî chu kan hlâwkpui theih?
3 Chu thu pawimawh tak hriattîrna ngaihthlâk chu kan va hlâwkpui dâwn êm! Chu bâkah, special inkhâwmpui chuan bial inkhâwmpui leh district inkhâwmpui ang bawkin kohhran dang aṭanga lo kal unaute laka inhawn lehzualna leh anmahni nêna hlim taka inkawmhona hun remchâng min pe ang. (Sâm 133:1-3; 2 Kor. 6:11-13) Chuvângin, ṭhian hluite tân bâkah ṭhian thar siam nân hun pe ang che. Special khâwmpui in neihah chuan khuallian thusawitu tûr atân district overseer emaw, Bethel aṭanga unaupa emaw chu ruat an nih chuan anmahni leh an nupuite lo lâwmna hun remchâng atân engvângin nge i hman loh vang? Special inkhâwmpui lo awm tûr chu nghahhlelh chhan tûr kan va ngah tak êm!