‘A Hun Apianga Chaw’
1. Engtin nge tûn hnaia neih special inkhâwmpui thusawite chuan nang leh mi dangte a ṭanpui?
1 Special inkhâwmpuia kan tel zawh chuan, “Kan mamawh tak chu a va ni êm!” tiin kan sawi fo ṭhîn. Bial kantu pakhat chuan, a biala mi ṭhenkhatin special inkhâwmpuia thusawi an ngaihthlâk hnuah rawngbâwlnaa inhman tam lehzual an duhzia an sawi tih a târ lang a. Khual zina rawngbâwltu upa pakhat chuan: “Thusawite chuan kan nuna kan duhthlanna siamte min ennawntîr a, tâwpna huna kan awm tawhzia ngun taka ngaihtuah tûrin min ṭanpui,” a ti a. A dang chuan, “Thuchhuahtu tam tak chuan thusawite chu thil pawimawh ber, rawngbâwlna ngai pawimawh ber tûra anmahni kai harhtu a nihzia an sawi,” a ti bawk. Engtin nge special inkhâwmpui chuan a ṭanpui che?
2. Rawngbâwl kum tharah eng thute nge kan ngaihthlâk ang?
2 Rawngbâwl kum lo awm tûra thusawi tûrte pawh chu kan mamawh tak a ni leh bawk ang. A thupui chu Sâm 118:8, 9 aṭanga lâk chhuah, ‘Jehova Chungah Rinna Nghat Rawh’ tih a ni. Thu sawi tûrte zînga ṭhenkhat chu: “Jehova Chu Mangan Laia Kulhbîng A Nih Dân,” “Jehova Thlazâr Hnuaia Inhumhimna Hmu Tûrin Mi Dangte Ṭanpui Rawh” “Inhumhimna Pêkna Kawngah Jehova Entawn Rawh” “Ṭhalaite U, Jehova Chu In Rinchhanah Siam Rawh U!” tih leh “Kan Thlarau Lam Paradis—Inhumhim Nâna Jehova Ruahmanna Siam Chu” tihte a ni ang.
3. Engtin nge inkhâwmpuinaa tel chu kan hlâwkpui tak zet theih?
3 Hlâwkpui Tûr Chuan: Inkhâwmpui nî tûr puan a nih ve leh, telve ngei tûrin ruahmanna siam la, i Bible zirpuite pawh rawn tel ve tûrin sâwm ang che. ‘Chhel taka rah’ thei tûr chuan kan thu ngaihthlâkte chu kan vawn reng a ngai a. (Lk. 8:15) Chuvângin, thusawite chu ṭha takin ngaithla la, i tân leh rawngbâwlnaa i hman duh tûr thu pawimawh zualte leh kaihhruainate chu tâwi fel takin ziak chhuak rawh. Inkhâwmpui zawh hnuah thusawite chu chhûngkuaa sawihovin, nangmah leh chhûngkuain in nunpui theih dân kawngte chu sawiho ang che u.
4. Engvângin nge special inkhâwmpui lo awm tûr chu kan nghahhlelh ang?
4 Chaw hlui tuihnai tak leh hrisêl tak ang maiin, kumin special inkhâwmpui chu hmangaihna leh ngaihtuah lâwkna nasa tak nêna buatsaih a ni a. Chuta lo tel ngei tûr leh Kristian rawngbâwltute thlarau lama châwmna ‘a hun apianga chaw’ chu hlâwkpui ngei tûra i inbuatsaihna chu Jehova’n malsâwm ngei rawh se.—Mt. 24:25.