Pathian Thu Chu Zirtîrna Kawngah A Sâwt
1. Kum 2014 rawngbâwl kum atâna bial inkhâwmpui thupui tûr chu eng nge ni a, chu chuan eng zawhna nge a chhân ang?
1 Jehova chu lei leh vâna zirtîrtu ṭha ber a ni a. (Is. 30:20, 21) A nih chuan, engtin nge Jehova chuan min zirtîr? Ani chuan lehkhabu dang zawng aia ṭha chungchuang lehkhabu pakhat—thlarauva thâwk khum a Thu, Bible min pe a ni. Engtin nge Pathian zirtîrna chu taksa lam, rilru lam, ngaihtuahna lam leh thlarau lamah kan sâwtpui theih? He zawhna chhânna hi kum 2014 rawngbâwl kuma kan bial inkhâwmpuiah sawiho a ni ang. Inkhâwmpui thupui tûr chuan 2 Timothea 3:16 thu, “Pathian Thu Chu Zirtîrna Kawngah A Sâwt,” tih chu a ṭanchhan a ni.
2. Eng zawhnate chhânna aṭangin nge thu pawimawhte chu târ lan a nih ang?
2 Hêng Thu Pawimawhte Hi Hriat Tum Rawh: Inkhâwmpuia thu pawimawhte chu a hnuaia zawhnate chhânna aṭang hian târ lan a ni ang:
• Pathian zirtîrna chuan kan nunah eng nghawng nge a neih? (Is. 48:17, 18)
• Hunbi kima Jehova rawngbâwl tûra kan dinhmun mila insiamrem kan tum hian eng nge kan chian theih? (Mal. 3:10)
• “Zirtîrna mak tak” kan hmachhawn hunah engtin nge kan chhân lêt ang? (Heb. 13:9)
• Engtin nge Isua “thu zirtîr” dân chu kan entawn theih? (Mt. 7:28, 29)
• Engvângin nge kohhrana zirtîrtute chuan mahni an inzirtîr ang? (Rom 2:21)
• Pathian Thu chu eng atân nge a sâwt? (2 Tim. 3:16)
• Engtin nge hnamte ‘tihnghînna’ chuan mite a nghawng? (Hag. 2:6, 7)
• Jehova chuan kan lakah eng rin tlatna nge a neih? (Eph. 5:1)
• Jehova zirtîrnaa awm reng tûr chuan engvângin nge kan thawhrim ang? (Lk. 13:24)
3. Inkhâwmpuia thusawi zawng zawngte ngun taka ngaihtlâk vek chu engvângin nge a pawimawh?
3 He inkhâwmpui lo awm tûr thupuiin a ṭanchhan thute a ziah hma lawk khân, 2 Timothea bung 3 ṭantîr lamah Paula chuan hun hnuhnûng chhinchhiahna tûr hun khirh tak chungchâng a sawi a. “Mi sual leh tihdertute erawh chu mi bum leh buma awmin an sual zual deuh deuh ang,” tiin a ziak a ni. (2 Tim. 3:13) Chuvângin, buma kan awm loh nân Pathian zirtîrna ngaithlâk leh zawm chu a va pawimawh tak êm! A hun taka kan dawn he inkhâwmpuia thusawi zawng zawngte ngun taka ngaihthlâk vek chu i tum tlat ang u.