I Rilru Vêng Ṭha Rawh
1. Kum 2013 rawngbâwl kum atâna bial inkhâwmpui thupui chu eng nge ni a, chu chuan eng thil tum nge a neih?
1 Isua chuan a zirtîrte chu an thinlung, thlarau, leh rilru zawng zawnga Jehova hmangaih tûrin a zirtîr a. (Mt. 22:37, 38) Tûn kuma inkhâwmpuite chu kan chhûng lam nihna tichak tûra min ṭanpui nâna duan a ni. I la hriat mai theih angin, kan district inkhâwmpui thupui chu “I Thinlung Vêng Ṭha Rawh! tih a ni a. Kum 2013 rawngbâwl kum atâna special inkhâwmpui thupui chu “I Chhia leh Ṭha Hriatna Vêng Ṭha Rawh” tih a ni. Tin, thla leh aṭanga neih ṭan tûr bial inkhâwmpuite chuan Matthaia 22:37 thu aṭanga lâk chhuah “I Rilru Vêng Ṭha Rawh” tih thupui a ṭanchhan ang. He bial inkhâwmpui hi kan ngaihtuahnate Jehova lawm tlâk nih zualtîr tûra inbih chiang ṭheuh tûra min ṭanpui nâna duan a ni.
2. Inkhâwmpui chhûngin eng zawhnate chhânna nge hriat kan tum ang?
2 Kan Ngaihthlâk Tûr Thute: Bial inkhâwmpui thusawite kan ngaihthlâk laiin, a thu pawimawh laite târ langtu hêng zawhnate chhânna hi hriat kan tum tûr a ni:
• Engtin nge ‘mihring ngaihtuahnaa’ thil ngaihtuah chu kan pumpelh theih ang?
• Engtin nge ring lotute rilru tideltu khuhna chu hlîp tûra kan ṭanpui theih?
• Eng ang rilru put hmang nge neih kan duh?
• Ṭha taka chhût ngun hlâwknate chu eng nge ni?
• Engtin nge Jehova chu kan ngaihtuahna kan thununtîr theih?
• Engtin nge pasal te, nupui te, nu leh pa te, leh fate chuan chhûngkuaah hlimna an awmtîr theih?
• Engtin nge Jehova nî atân inpeiha kan awm theih?
• Rilru puan venga ngaihven tih awmzia chu eng nge ni?
• An thu zir nunpuitute chuan eng hlâwkna nge an dawn?
3. Engvângin nge inkhâwmpui a ni hniha kan tel a, thusawite ngun taka kan ngaihthlâk a, kan thil zirte nunpui chu thil pawimawh tak a nih?
3 Setana chuan kan rilru hi a bei rengin, tihkhawloh dân kawng a zawng reng a. (2 Kor. 11:3) Chuvângin, kan rilru chu kan vênghimin, kan ngaihtuahna chu kan thunun tlat tûr a ni. Krista rilru ang kan put chhunzawm zêl a, he dân pawisak lohna khawvêl thununna hi kan do zêl a ngai a ni. (1 Kor. 2:16) Chuvângin, bial inkhâwmpui ni hniha tel ngei tûrin ruahmanna siam la. Thusawite ngun takin ngaithla ang che. Thusawi pawimawh tak takte nunpuina chuan ṭhahnemngai taka Lalram rawngbâwlna atâna rilru puan venga ngeihven reng tûrin min ṭanpui ang.—1 Pet. 1:13.