Zawhna Bâwm

◼ Eng kawng ṭangkai takin nge pioneer-te kan ṭanpui theih?

Kum 2009 rawngbâwl kum khân, khawvêl puma unau 8,00,000 dâwn laite chuan regular leh special pioneer angin rawng an bâwl a. Hêng hunbi kima rawngbâwltute hian an hun, tha leh zung, leh thil neih hmasa berte chu Lalram chanchin ṭha thehdarh nân an hmang a ni. (Thuf. 3:9) Pathian Jehova chu an ṭan lâkna avângin a va lâwm dâwn êm! Eng kawngin nge Pathian Jehova thlîr dân lantîrin, an rawngbâwlnaa hlimna leh chhelna nei tûrin anni chu kan ṭanpui theih?

Ṭawngkam ṭha kan hmante chuan pioneer anga rawngbâwl chhun zawm zêl tûrin anni chu a tiphûr ngei ang. (Thuf. 25:11) Rawngbâwlnaa kan thawhpui theih nân chawlhkâr tina kan hun duan chu kan siam rem thei ang em? Kan thawhpui hunah chuan an lîrthei aia kan ta hmang zâwk tûrin kan rawt thei ang. Tin, an lirthei kan hmang a nih chuan a sênso kan tumpui thei bawk ang. (1 Kor. 13:5; Phil. 2:4) Chu bâkah, khualchhawn thiamna lantîrin leh a chânga chaw eia sâwmin anni chu kan ṭanpui thei bawk.—1 Pet. 4:8, 9.

Pathian Thu chuan a Ram zawng hmasatute chu Pathian Jehova’n an mamawh a pe ang tih a tiam a. (Sâm 37:25; Mt. 6:33) A pêk dân kawng khat chu kan Kristian unaute kal tlangin a ni. (1 Joh. 3:16-18) Mahse, pioneer-te chuan sum leh pai lama an mamawh phuhru tûrin mi dangte chu an beisei lo va. Ṭanpui an ngaih hunah pawh mi dangte an hrilh mai ngai lo bawk. Amaherawhchu, bengvâr tak leh hmangchâng hre tak nihna hmangin, pioneer rinawmte ‘tlâkchham chu kan phuhrûksak’ thei a ni.—2 Kor. 8:14, 15.

Kum zabi khatnaa Kenkriai Kohhrana rawngbâwltu ṭhahnemngai tak Phoibi Rom khuaa a zin khân, Paula chuan Rom khuaa unaute chu heti hian a fuih a ni: “Lalpa hminga mi thianghlimte ang bawka in lo lawmna tûr leh, in puih a ngaihna apianga pui tûrin . . . ka duh a ni,” tiin. (Rom 16:1, 2) Keini pawhin kan kohhrana regular leh special pioneer anga bâng lova chanchin ṭha hriltute ṭanpui ve theihna hun remchâng kan nei a ni.—Tirh. 5:42.