Bible Zirna Hmasâwn Tak Kaihhruaina—Zirlaite Inpuahchah Dân Zirtîr
1 Thu zir tûr lo chhiar lâwk a, a chhânna lo chhinchhiah a, a irawm chhuaka chhân dân tûr ngaihtuahtu zirlai chu thlarau lamah hma a sâwn chak ṭhîn a. Chuvângin, zirna chu mumal taka neih a nih veleh, inpuahchah dân i zirtîr theih nân zirlai pakhat chu inpuahchahpui ang che. Bung khat emaw, zirlai pakhat emaw a puma inpuahchahpui chu zirlai tam zâwkte’n an hlâwkpui ang.
2 A Hnuaia Rîn leh A Sîra Chhinchhiah: A bua zawhna chhut chhuahsate tlang taka chhânna zawn chhuah dân hrilhfiah rawh. A hnênah chuan i lehkhabua thu mal pawimawh lai emaw, thu hlâwm khat emaw chauh i chhinchhiahte chu entîr rawh. I zirpui lai hian i entawn tûr siam chu zuiin a lehkhabuah a chhânna hriatchhuahtîr thei tûrte chauh chhinchhiah chu a duh mai thei a ni. (Lk. 6:40) Tichuan, a mah chu zawt la a irâwm chhuak ngeiin chhântîr rawh. Hei hian zirlai thu a hriatthiam dân chiah chu a hriattîr ang che.
3 Bible châng târ lante ngun taka bih chian hi Bible zirna atâna zirlai inpuahchahna pawimawh tak a ni a. (Tirh. 17:11) Chûng chuan paragraph-a thu pawimawh tak a thlâwp dân hre thiam tûrin ṭanpui rawh. Zir lai mêk lehkhabu sîra tawi têa chhinchhiah dân kawhhmuh ang che. Bible chu a thil zirte innghahna bul ber a nihzia sawi uar ang che. Zirna neih lai hian Bible châng târ lante hmang hnem tûrin fuih rawh.
4 A Tlângpui Thlîrlâwkna leh Thlîrlêtna: Zirlaiin zir tûr ngun taka a inpuahchah hmain, a thu tlângpui thlîrlâwkna neih chu a ṭangkaipui ang. Zir tûr thupui te, a thupui tête, leh milemte en thuak thuakin, a tlângpui thlîrlâwkna a nei thei tih kawhhmuh rawh. A inpuahchahna a zawh hmain, zirlaia thu pawimawh laite chu lehkhabua ennawnna zawhna awmte emaw hmanga thlîrlêtna hun neih chu atân a finthlâk ang. Chutianga thlîrlêtna chuan a thu hriatte vawng zui tûrin a ṭanpui ang.
5 Zirlai chu ṭha taka inpuahchah tûra zirtîrna chuan kohhran inkhâwmnaa chhânna awmze nei tak pe tûrin a ṭanpui ang. Chu chuan Bible a zir zawh hnu hun rei tak pawha a ṭangkaipui tûr zir dân ṭha nei tûrin a ṭanpui bawk ang.