Kan Ngaih Pawimawh Ber Chu
1. Engtin nge Isua’n rawngbâwlna a ngaih pawimawhzia a lantir?
1 Isua chuan rawngbâwlna a ngai pawimawh ber a. A theih ang tâwka tam mite hnêna thu a hrilh theihna tûrin mêl tam tak kea kalin Palestina ram a tlawh chhuak a, a thawk rim hle a ni. Rawngbâwlnaa a hun leh a ngaihtuahna a hman tam zâwk theihna tûrin a nun a dah samkhai hle. (Mt. 8:20) Dam lote tidam tûra mipuite’n chelh an tum lai khân, ani chuan: “Khaw dangahte pawh Pathian ram chanchin ṭha ka hril tûr a ni, chu mi avâng chuan tirh ka ni si a,” a ti a ni.—Lk. 4:43.
2. Engvângin nge Isua’n rawngbâwlna a ngaih pawimawh êm êm?
2 Engvângin nge Isua’n rawngbâwlna a ngaih pawimawh êm êm? Jehova hming tihthianghlim chu a thil ngaih pawimawh ber a ni a. (Mt. 6:9) Ani chuan a Pa vâna mi a hmangaih a, chuvângin A thupêkte zawm leh A duhzâwng tih famkim chu a duh a. (Joh. 14:31) Chu bâkah, mipuite chu tih tak zetin a ngaihsak a, anmahni ṭanpui chu a duh bawk a ni.—Mt. 9:36, 37.
3. Rawngbâwlna kan ngaih pawimawhzia engtin nge kan lantîr ang?
3 Isua Entawn Rawh: Khawvêlah hian kan hun tam tak ru bo thei leh kan rilru la pêng thei thil tam tak a awm avângin, Isua ang rilru put hmang neih chu a harsa hle thei. (Mt. 24:37-39; Lk. 21:34) Chuvângin, thil pawimawh zâwkte kan fiah a, thu hrilh rawngbâwlna atâna inbuatsaih nân leh chu mia tel ziah nân hun kan insiam tûr a ni a. (Phil. 1:10, 11) Nun tihsamkhai leh khawvêl hman lutuk loh chu kan tum tûr a ni.—1 Kor. 7:29, 31.
4. Engvângin nge tûna ngaih pawimawh tûr indawt dân dik siam chu thil pawimawh tak a nih?
4 Hun a tlêm hian mi fing chuan thil pawimawh ber chu a ti hmasa ṭhîn. Entîr nân, thlipui hlauhawm tak a tleh dâwn tih a hriat chuan, a chhûngte himna tûra ruahmanna siam tûr leh ṭhenawmte hriattîr tûrin a hun leh tha leh zung chu a hmang ang. Thiltih tûr pawimawh lo zâwkte chu nakina tih atân a khêk hrih ang. Armageddon thlipui lo tleh hun chu a hnai tawh hle a. (Zep. 1:14-16; 1 Kor. 7:29) Keimahni leh kan thu ngaithlatute chhandam tûr chuan, kohhran chhûngah a ni emaw, pâwnah a ni emaw, keimahniah leh kan zirtîrnaah kan fîmkhur tûr a ni. (1 Tim. 4:16) Ni e, kan dam khawchhuahna chu rawngbâwlna kan ngaih pawimawh dânah a innghat tlat a ni!