Pathian Ramin Eng Nge A Hlen Chhuah Ang?

PATHIAN RAMIN A HLEN CHHUAH TAWHTE

Thuziak hmasaah khân, Isua pêk chhinchhiahnate chungchâng kan sawiho tawh a. Chu chhinchhiahna chuan Pathian Ram chu vânah din a ni tawh a, Isua Krista chu Lal a ni tawh tih finfiahna hmuh theih a pe a ni.

Bible chuan Isua’n Lalram thuneihna a chelh veleh Setana leh a ramhuaite chu vân aṭangin a paih thla tih a sawi a. An thiltihtheihna chu leiah chauh an lantîr theih tawh avângin, chu chu kum 1914 aṭanga suahsualna a tam êm êm chhan zînga pakhat a ni.—Thu Puan 12:7, 9.

Khawvêl dinhmunte a chhe zual zêl chung pawhin, Pathian Ram Lal Isua chuan khawvêl puma mite ṭanpui tûrin thil tam tak a ti a. Isua sawi lâwk khawvêl pum huap Bible zirtîrna avângin mi tam tak chuan Bible thu bulte zir a, an nunpui avângin kan lâwm tak meuh a ni. (Isaia 2:2-4) Mi maktaduai tam tak chuan hna chungchânga thlîr dân inbûk tâwk neih dân te, chhûngkaw nun tihmasâwn dân te, leh an nuna khawvêl lam thilte dah pawimawh ber loh dânte an zir a. Chûng mite chuan tûna an tâna ṭha tûrte chu an zir a, anni chu Pathianin a Lalram khua leh tui ni tûra a duh ang mite an rawn ni ta a ni.

PATHIAN RAMIN ENG NGE A LA HLEN CHHUAH ANG?

Isua chuan vân aṭangin rorêl tawh mah se, mihring sawrkârte chuan leiah hian ro an la rêl reng a. Mahse, Pathianin Isua hnênah: “Nangmah dotute zîngah ro rêl rawh,” tiin a hrilh a ni. (Sâm 110:2) Nakin lawkah, Isua chuan dodâltu zawng zawng chu a tiboral vek ang a, inhuam taka Pathian thuâwihtute chungah thlamuanna a thlen tawh ang.

Chutih hun chhûng chuan, Pathian Ramin hetiang hian hma a la ang:

• Sakhaw dik lo a nuai bo vang. Pathian chungchânga dâwt thu zirtîrtu leh mite nun tihrehawmtu sakhuate chu a bo tawh ang a. Bible chuan sakhaw dik lo chu nawhchizuar nên a khaikhin a. Tihborala a awm chu mi tam takin mak an ti ang.—Thu Puan 17:15, 16.

• Mihringte rorêlna a titâwp ang. Pathian Ramin mihringte rorêlna zawng zawng a ti tâwp ang.—Thu Puan 19:15, 17, 18.

• Mi suaksualte a tiboral ang. Thil sual tih tum tlattute leh Pathian thuâwih duh lotute chungchâng hi eng nge ni ve? “Mi suaksualte erawh chu leilung ata tihboral an ni ang.”—Thufingte 2:22.

• Setana leh a ramhuaite chu a tiboral ang. Setana leh a ramhuaite chuan ‘hnam tin an bum leh tawh’ ngai lo vang.—Thu Puan 20:3, 10.

Chûng zawng zawng chuan Pathian Ram pawmtute tân eng awmzia nge a neih?

PATHIAN RAMIN MIHRINGTE TANA A TIH TURTE

Vânah Lal nia rorêlin, Isua chuan mihring rorêltute tih theih ngai lo tûr thil tam tak a hlen chhuak ang a. Ani chuan a rorêlpuite atân mihring zîng ata thlan mi 1,44,000 pawh a nei ang. (Thu Puan 5:9, 10; 14:1, 3) Pathian duh zâwng chu he leia tih ni ngei tûrin hma a la bawk ang. A nih chuan, Pathian Ramin leia chêngte tân eng nge a tihsak ang?

• Natna leh thihna a nuai bo vang. Chumi khuaa awm chuan, “Ka dam lo ve,” a ti lo vang a, “thihna a awm leh thei tawh lo vang.”—Isaia 33:24; Thu Puan 21:4.

• Thlamuanna dik tak leh himna a awmtîr ang. “I fate thlamuanna chu nasa tak a ni ang,” tichuan, “mi tinte chu an grêp hrui hnuaiah leh an theipui kûng hnuaiah an ṭhu zâwk ang a; tuman an tihlau lo vang.”—Isaia 54:13; Mika 4:4.

• Hna awmze nei tak a awmtîr ang. “Ka mi thlante chu rei tak an thawh chhuah chungah chuan an lâwm dâwn a ni. A thlâwnin an thawk rim lo vang.”—Isaia 65:22, 23.

• Chhehvêl buainate chu a chingfel ang. “Thlalêr leh ram pilril chu a lâwm ang a; ram ro chu a hlimin phûl pangpâr angin a pâr ang.”—Isaia 35:1.

• Mite chu chatuan nun an neih theih nâna an mamawh zirtîr an ni ang. “Hei hi chatuana nunna a ni, nang Pathian tak chauh leh i tirh Isua Krista hriat hi.”—Johana 17:3.

Pathian chuan chûng malsâwmnate chu chên tûrin a duh che a ni. (Isaia 48:18) A dawta thuziak chuan chu hma lam hun ropui taka i tel theihna tûrin tûna i tih theihte a târ lang ang.