Thutak Zawnna

Kum sâng tam tak chhûng chu, chu zawhna chhânna hria tu mah an awm lo. An hriat chhuah hma chu, chûng hri lêngte chuan mi maktaduai tam takte nunna a la a ni. A tâwpah chuan, scientist-te chuan a chhânna dik tak an hre ta a. Natna lo awm chhan chu becteria ang chi, mita hmuh tham loh thilnung tê tak tê tê—natna hrik vâng a ni tlângpui tih an hmu chhuak ta a. Chu thu dik pakhat hmuh chhuahna chuan mite chu natna tam tak laka invên dân leh inenkawl dân hre tûra a ṭanpui avângin, mi tlûklehdingâwn tam tak chu an dam reiin, an hrisêl lehzual a ni.

A nih leh, zawhna pawimawh dangte chungchâng hi eng nge ni ve? A hnuaia zawhnate chungchânga thu dik hriatnain engtin nge i nunah nghawng a neih i rin?

• Pathian chu tu nge ni?

• Isua Krista chu tu nge ni?

• Pathian Ram chu eng nge ni?

• Kan hma lam hun tûr chu eng nge ni?

Mi maktaduai tam tak chuan chûng zawhnate chhânna chu an hmuin, an nunah hmasâwnna an nei a. Nang pawhin chûng chhânnate chu i hlâwkpui ve thei a ni.

THU DIK I HMU CHHUAK THEI EM?

‘Thil engkim chungchânga thu dik hriat chu thil theih a ni dâwn em ni?’ tiin i ngaihtuah mai thei. Dik tak chuan, thil tam tak chungchânga thu dik hriat chu a harsa telh telh niin a lang. Engvângin nge?

Mi tam tak chuan sawrkâr te, sumdâwng mite, leh chanchin tichhuaktute’n thu dik an sawi an ring lo va. Ngaih dân te, thu dik chanve te, leh rinchhan tlâk tak anga sawi dâwt hulhualte aṭanga thu dik thliar hran chu harsa an ti hle. Rinhlelhna leh thu dik lo theh darhna khawvêlah hian, thu dik sawifiah dânah mai ni lovin, thu dik tak chu eng nge ni tih chungchânga mite ngaih dân pawh a inang lo a ni.

Chutiang harsatnate a awm chung pawhin, nuna zawhna pawimawh ber berte chhânna dik tak chu hmuh theih a ni. Engtin nge? Nî tin nuna i hman ṭhin thiamnate hmangin a ni.

THU DIK I ZAWNNA

Nî tin hian thu dik i zawng a tih theih a. Jessica-i dinhmun hi han ngaihtuah teh. “Ka fanu taksain badam (peanut) hi a ngeih lo hle a, badam-a awm protein chhe tê pawh hi a tân chuan thihpuina khawp a ni thei,” tiin a sawi. Jessica-i chuan ei tûr a leite chu a fanu tân a him tih a hriat a ngai a. “An bâwlhlo hmante ka hriat theih nân a kaihhruainate chu ngun takin ka chhiar hmasa a. Chumi hnuah thil dang hriat belh ngaite hriat chian ka tum a, ei tûr siam chhuaktute hnênah chuan badam chhe tê mah a tel lo tih chian tûrin ka zâwt ṭhîn a ni. Company-in ei tûr a siam dân ka hriat chian theih nân rinchhan tlâk thil dangte pawh ka zir bawk,” tiin a sawi belh a ni.

I nî tin nuna a chhânna hriat i duh zawhnate chu Jessica-i thil hriat duh tlukin a pawimawh lo pawh a ni thei; mahse, Jessica-i angin, hriat i duh zawhnate chhânna hmuh nân a hnuaia tih dânte hi i hmang thei a ni:

• Thu dik chu hriat tum rawh.

• Zir bingna neih belh rawh.

• I thu râwn chhiarte chu a rin tlâk tih chian rawh.

Hêng tih dânte hian nuna zawhna pawimawh takte chhânna dik hmu tûrin a ṭanpui thei che a ni. Engtin nge?

THUTAK INZIAHNA LEHKHABU DANGLAM TAK

Jessica-i chuan Bible thutak a zawnnaah, a fanu taksa ngeih loh zâwng ei tûrte hriat tuma a tih dân ang chu a hmang a. Ani chuan, “Ngun taka chhiar leh tih tak zeta zir bingna neihna chuan Bible-a thutak hmu tûrin min ṭanpui a ni,” tiin a sawi. Jessica-i ang bawkin, mi maktaduai tam tak chuan hêng zawhnate chungchânga Bible sawite hi an zir a ni:

• Engvângin nge leia kan awm?

• Kan thih hian eng nge thleng?

• Engvângin nge hrehawm tawrhna a awm?

• Hrehawm tawrhna zawng zawng titâwp tûrin Pathianin eng nge a tih?

• Engtin nge chhûngkaw nun hlim kan neih theih?

Bible chhiarin leh www.jw.org aṭanga zir bingna neih belhna hmangin, chûng zawhnate leh zawhna dangte chhânna dik tak chu i hmu thei a ni.