Isua Chu Ka Tân A Thi Tak Tak Em?

BIBLE chu “keimahni nungchang ang pu” mite’n thinlung taka an sawi, thuin a khat a. (Jak. 5:17) Entîr nân, Rom 7:21-24-a: “Thil ṭha tih ka duh laiin sualna ka hnênah a lo awm ṭhîn a ni . . . Mi rehtei ka va ni tehlul êm!” tia Paula’n tlang taka a sawi hi kan hriatthiampui nghâl thei a. Chutianga tlang taka sawi thute chuan kan ṭhat famkim lohnate kan do hunah min thlamuan tak zet a ni.

Paula chuan tlang taka thusawi dangte pawh a nei a. Galatia 2:20-ah, ani chuan Isua chu “[amah] hmangaiha [a] aia inpetu” a ni tih a rinnghehzia târ langin, ama mi mal tâna inpe angin a sawi a ni! Hei hi ‘keimahni nungchang ang pute’ thusawi a ni lâwm ni? Chutiang chuan kan ngai reng lo pawh a ni thei.

Tûn hmaa kan thiltih sualte avângin hlutna nei lo nia inhriatna kan neih chuan, Jehova hmangaihna leh ngaihdamna chu rinhlelh châng kan nei thei a, chu chuan tlanna inthawina chu kan tâna mi mal taka thilpêk anga thlîr a tiharsa thei a ni. Isua chuan tlanna chu chutianga thlîr tûrin min duh tak zet êm? Min duh a nih chuan, chutianga thlîr tûrin engin nge min ṭanpui thei? Chûng zawhna pahnihte chu i lo bih chiang ang u.

ISUA’N INTHAWINA A THLIR DAN

Ni e, Isua chuan a inthawina chu mi mal thilpêk anga thlîr tûrin min duh a. Engtin nge chu chu kan chian theih? Luka 23:39-43-a chhinchhiah thilthleng hi han mitthla teh. Mi pakhat chu Isua bulah nghaisakna bana khai kân a ni a. Tûn hmain, thil a tisual tih a sawi chhuak a. A thil sual tih mila chutianga râwng taka hrem a nih avângin, sual lian tak a ti a ni ngei ang. A hrehawm tawrh avânga a rilru a hah êm avangin, Isua hnênah: “Isu, i ram i thlen hunah mi hre reng ang che,” tiin a ngên a ni.

Engtin nge Isua’n a chhân lêt? Chu mi sualpa en tûra nâ ti tak chunga a lû a hawi lai chu han mitthla teh. Nâ ti hle mah se, nui hmêl put tum hrâm hrâmin, chu pa chu: “Tih tak meuhvin ka hrilh a che, vawiinah hian ka hnênah Paradis-ah i awm ve ang,” tiin a tiam a. Isua chuan chu pa hnênah ‘Mihring Fapa hi mi tam tak tlan nâna a nun pe tûr zâwka lo kal a ni,’ tiin a hriatnawntîr thei a. (Mt. 20:28) Mahse, Isua’n a inthawina chu mi mal tân anga a sawi uar dân chu i lo chhinchhiah em? Ani chuan “ka” tih leh “i” tih ṭawngkam hmangin nêlawm takin a sawi a ni. Isua’n lei paradis-a chatuana nun a beisei thei tih a sawi hmuh khân, mi mal thil angin a hrilh a ni.

Isua chuan inthawina a hlan chu mi mal thilpêk anga pawm tûrin a duh tih rinhlelh rual a ni lo. Pathian rawngbâwlna hun remchâng pawh nei lo, chu thil sual titu chu Isua’n chutianga a thlîr a nih chuan, Pathian rawngbâwl mêk baptisma chang tawh Kristian chu chutiang chuan a thlîr lehzual ngei ang. A nih leh, thil sual lo titawh ṭhîn mah ila, keini pawh Krista inthawina chu mi mal thilpêk anga thlîr ve tûrin engin nge min ṭanpui thei ang?

PAULA ṬANPUITU

Paula rawngbâwlna chu Isua inthawina a thlîr dânin a thunun a. Engtin nge? Ani chuan: “Mi tichaktu Krista Isua kan Lalpa hnênah chuan lâwmthu ka sawi a ni, hmânah sawichhetu leh tiduhdahtu leh sawisatu ni mah ila, rinawma mi ngaiha, a rawngbâwltua mi ruat tâk avâng hian,” tiin a sawi a ni. (1 Tim. 1:12-14) Paula chanvo dawn chuan Isua’n mi mal takin a chungah zahngaihna, hmangaihna leh rinna a nei tih a nemnghet a. Isua’n keini pawh chanchin ṭha hrilh theihna chanvo min pe ṭheuh a ni. (Mt. 28:19, 20) Thu hril tûra kan chanvo neih chuan Isua chu kan tân pawh a thi tih hre thiam tûrin min ṭanpui ve thei em?

Kum 34 dâwn lai hnawhchhuah ni tawh, tûn hnai maia Jehova hnêna rawn kîr leh Albert-a chuan: “Ka sualte chu ka hmaah a awm reng a. Mahse, rawngbâwlnaa ka tel hian, tirhkoh Paula’n a rawngbâwlna chu Isua hnên aṭanga mi mal thilpêk anga a ngaih angin, ka ngai ve a. Chu chuan min tichakin, ka nun leh nakin hun chungchâng a ṭha zâwngin min thlîrtîr a ni,” tiin a sawi.—Sâm 51:3.

Thutak a hriat hmaa dân bawhchhiat hmang leh tharum thawh hmang Allan-a chuan: “Mi ka tihnat tawh zawng zawngte chu ka la hre reng a. Chu chuan rilru hrehawma min siam châng a awm. Mahse, Jehova’n mi dangte hnêna chanchin ṭha hril tûra kei ang mi sual min hmang hi ka lâwm hle. Mite’n chanchhin ṭha an chhân lêt dân ka hmuh hian, Jehova ṭhatzia leh hmangaihna a neihzia min hriat chhuahtîr a. Pathianin ka nun kawng hlui ang zawh ve mi dangte ṭanpui tûrin mi hmang ni hian ka hria,” tiin a sawi.

Rawngbâwlnaa kan tel hian thil ṭha kan tih bâkah, a ṭha zâwngin thil kan ngaihtuah a. Chu chuan Isua’n kan chungah zahngaihna te, hmangaihna te, leh rinnate a neihzia min hriat chiantîr a ni.

JEHOVA CHU KAN RILRU AIIN A ROPUI ZAWK

Setana khawvêl suaksual tihboral a nih hma chu, tûn hmaa kan thiltih sualte avângin rilruah inthiam lohna kan la nei zawm zêl thei a. Chutiang rilru put hmang hneh tûrin engin nge min ṭanpui ang?

A tleirâwl laia nun kawng chi hniha a nun avânga mahni inthiam lohna nei rengtu Jean-i chuan: “‘Pathian chu kan rilru aiin a ropui zâwk’ tih thu hi ṭha ka ti tak zet a ni,” tiin a sawi. (1 Joh. 3:19, 20) Jehova leh Isua’n sual dinhmunah kan awm tih mahni kan inhriat aiin an hre chiang zâwk tih hriain thlamuanna kan nei ve thei a ni. Anni chuan tlanna chu mihring ṭha famkim tân ni lovin, thil sual ti inlamlêtte tân, hmangaihna nei takin an pe tih hre reng ang che.—1 Tim. 1:15.

Isua’n mihring ṭha famkim lote a cheibâwl dân chungchâng ṭawngṭaia kan chhût ngun hunah leh chanvo min pêk rawngbâwlna chu theih tâwp chhuaha hlen kan tum hunah, chu thutak hlu tak chu kan inhriattîr tihna a ni. Chutianga kan tih chuan, Paula angin: Isua chu “mi hmangaiha ka aia inpetu” a ni tiin kan sawi ve thei ang.