Thihna Pumpelh Thei Kan Awm Lo

I NGAIHSAN tak rimawi tum thiam hmingthang tuemaw film i en angah han inchan teh. Chu film chu a naupan lai te, rimawi a zirna te, leh vawi tam tak a tum chhin dântein a inṭan a. A hnuah, ram hrang hranga concert a neih dânte, leh khawvêla mi lâr a rawn nih chhoh dânte chu i en zawm zêl a. Tichuan, rei vak lovah, a kum hman ṭhat bertea a thlalâkte chu i hmu a, a tâwpah, ani chu a thi a, film chu a zo ta.

Chu film chu phuahchawp mai ni lovin, mual liam ta, mi hmingthang pakhat chanchin dik tak a ni. Mi chu rimawi tum thiam, scientist, infiam mi, a nih loh leh mi lâr tak pawh ni se, an chanchin chu a inang tlângpui ṭhîn. Ani chuan thil hlenchhuah tam tak a nei a; mahse, tarna leh thihna sawhkhâwk râpthlâk tak chu awm lo se chuan, chu aia nasa lehzuala thil a hlenchhuah theih dân tûr chu i ngaihtuah ngai lo maw?

Lungchhiatthlâk hle mah se, tarna leh thihna chu kan hmachhawn vek dâwn a. (Thuhriltu 9:5) Eng ang khawpin ṭan la mah ila, tarna leh thihna sawhkhâwkte chu pumpelh theih a ni lo. Chu bâkah, chêtsualna te, a nih loh leh natna râwng takte avângin kan nun chu tihtâwiin a awm thei a. Bible-a târ lan angin, mihring chu chhûm “rei lo tê lo lang a, ral leh ta mai ṭhîn” ang hi kan ni.—Jak. 4:14.

Mi ṭhenkhat tân chuan, nun chu chiang lo leh awmze nei lo anga a lan avângin “i eiin i in ang u hmiang, naktûkah kan thi dâwn alâwm” tih nun kawng chu an zawh a ni. (1 Korinth 15:32) Mite chuan eng hunah pawh an thi thei tih an inhriat avâng leh hma lam hun beiseina an neih loh avângin chutiang chuan an nung a ni. A bîk takin, harsatna engemaw tak i hmachhawn hunah, ‘He dam chhûng chauh hi em ni kan awm dâwn?’ tiin i zâwt mai thei. Khawiah nge a chhânna kan hmuh theih?

Tûn laia mi tam tak chuan science lamah beiseina an nghat a. Science leh damdawi lama hmasâwnna chuan kan nun chu a tisei deuh thei a. Scientist ṭhenkhat phei chuan hei aia kan nun a sei lehzual theih nân hma an la mêk a ni. An thawhrimnate chu engpawh ni se, engvângin nge kan tar a, kan thih ṭhin? tih zawhna chu kan la hmachhawn tho a ni. Kan hmêlma thihna chu hnehin a awm ang tih beisei tûr chhan a awm em? A dawta thuziakahte chuan chûng thute chu bih chian a ni ang a, Nun hi heti zawng hi em ni? tih zawhna chu chhân a ni bawk ang.