Pathianin Hrehawm Tawrhna Zawng Zawng A Titâwp Thuai Ang

“Aw LALPA, eng chen nge ka au vang a, min ngaihthlâk loh vang? Inpâwngnêkna thu i hnênah ka au chhuahpui a, nangin i chhanhim si lo va.” (Habakuka 1:2, 3) Hêng thute hi Pathian duhsakna dawngtu mi ṭha Habakuka sawi a ni a. Chutianga a ngenna chuan rinna a tlachham tih a târ lang em? Târ lang lo ve. Pathianin Habakuka chu hrehawm tawrhna tihtâwp hun a ruat thu a hrilh a ni.—Habakuka 2:2, 3.

Nangmah emaw, i hmêlhriat tuemawin hrehawm in tawrh hunah Pathianin hma a la har lutuk, rawn inrawlh tawh âwm tak a ni tia ngaih chu awlsam tak a ni a. Mahse, Bible chuan: “Mi ṭhenkhatin muanga an ruat angin Lalpa chu a thutiam kawngah chuan a muang lo ve; tuma boral duh lova, mi zawng zawng lo sim duhin, nangmahni lamah a dawhthei a ni zâwk e,” tiin min tiam a ni.—2 Petera 3:9.

ENGTIKAH NGE PATHIANIN HMA A LAK ANG?

A la thuai ang! Isua chuan chhuan khatin “khawvêl,” tâwp chhinchhiahna dinhmun danglam tak chu an hmu ang tih a sawi a. (Matthaia 24: 3-42) Tûn kan huna Isua hrilh lâwkte thlen famkimna chuan mihringte thilah Pathian a inrawlh thuai dâwn tih a târ lang a ni.a

A nih leh, engtin nge Pathianin hrehawm tawrhna zawng zawng a tih tâwp ang? Isua leia a awm laiin mihringte hrehawm tawrhna chhâwkzângkhai nân Pathian pêk thiltihtheihna chu a hmang a. Chûng entîrna ṭhenkhat chu i lo ngaihtuah ang u.

Leilung Chhiatna: Isua leh a tirhkohte chu Galili Tuipuia lawnga an chuan laiin thlipui na tak avângin an lawng chu a pil ṭhelh ṭhelh a. Mahse, Isua chuan amah leh a Pain leilung pianken thilte chu an thunun thei tih a târ lang a ni. (Kolossa 1:15, 16) Isua chuan: “Ngawi la, awm hle hle rawh!” tiin a sawi a. Engtin nge a awm tâk? “Thli chu a bang a, a lo reh ta ṭhup mai a.”—Marka 4:35-39.

Natna: Isua chu mitdel te, kebai te, phûngzâwl te, phâr te, leh natna tinrêng a tihdam theih avângin hriat hlawh tak a ni a. “Dam lo zawng zawngte chu a tidam bawk.”—Matthaia 4:23, 24; 8:16; 11:2-5.

Ṭâmte: Isua chuan ei tûr nei lo mipuite hrai nân a Pa pêk thiltihtheihna chu a hmang a. A rawngbâwl hun chhûngin mi sâng tam takte chu ṭum hnih zet a hrai tih chhinchhiah a ni.—Matthaia 14:14-21; 15: 32-38.

Thihna: Isua kaihthawh mitthi pathum chanchin chuan Pathian Jehova’n thihna a sût lêt thei tih chiang takin a târ lang a. A kaihthawhte zînga pakhat phei chu a thihna ni li lai a ni tawh a ni.—Marka 5:35-42; Luka 7:11-16; Johana 11:3-44.