Thleng Famkim Tûr Thutiamte
Isua hrilh lâwk angin, Pathian Ram chanchin ṭha chu khawvêl zawng zawngah hrilhin a awm mêk a. (Matthaia 24:14) Bible-a Daniela lehkhabu chuan chu Ram chu Pathian sawrkâr a ni tih min hrilh a ni. Bung 2-naah chuan, hmân lai Babulon hun aṭanga tûn lai hun thlenga mihring sawrkâr langsâr zualte rawn dinchhuah dân târ langtu hrilh lâwkna a chuang a. Nakina thil lo awm tûr sawi lâwkin, châng 44-na chuan:
“Vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram zawng zawngte hi a tikeh sawmin a tiral zâwk ang a, kumkhuain a ding reng ang,” tiin a sawi.
He hrilh lâwkna leh Bible-a hrilh lâwkna dangte chuan Pathian Ramin mihringte rorêlna zawng zawng a rawn thlâk ang a, lei mihringte tân remna leh muanna a thlen ang, tih an sawi lâwk a. Chu Ram awpna hnuaia nun chu eng ang nge ni ang? Nakin lawka thleng famkim tûr thutiam ropui tak ṭhenkhat chu a hnuaiah hian târ lan a ni.
IN DO A AWM TAWH LO VANG
Sâm 46:9: “[Pathian] chuan indonate chu kâwlkil thlengin a tireh ṭhîn a; tawlailîrte chu meiah a rawh ral ṭhîn.”
Râlthuam siamnaa tûna hman mêk sum leh thiamna zawng zawngte chu mite thah nân ni tawh lovin, hlâwkpui nâna hman a nih huna khawvêl awm dân tûr chu han mitthla teh! Chu thutiam chu Pathian Ram hnuaiah a takin a lo thleng ang.
NATNA A AWM TAWH LO VANG
Isaia 33:24: Chu mi khuaa awm chuan “Ka dam lo ve,” a ti lo vang.
Lung natna, cancer, malaria, a nih loh leh natna dang rêng rêng awm tawh lohna khawvêl chu han ngaihtuah teh. Damdawi inte leh damdawite chu kan mamawh tawh lo vang. Hrisêlna ṭha famkim—chu chu leilunga chêngte neih hmabâk a ni.
ṬAM A AWM TAWH LO VANG
Sâm 72:16: “Leiah, tlâng chungahte hian, buh tam tak a awm ang a.”
Leilung chuan mi tinte tân ei tûr kham khawp a chhuah ang a, chu chu mi zawng zawngte tân a ni ang. Ṭâm leh ei tûr tlâkchhamna a awm tawh lo vang.
HREHAWM TAWRHNA, LUNGNGAIHNA, LEH THIHNA A AWM TAWH LO VANG
Thu Puan 21:4: “An mit ata mittui zawng zawng [Pathianin] a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta.”
Lei paradis-a nun chu tâwp nei lo nun ṭha famkim a ni ang tihna a ni! Chu chu hmangaihnaa khat Siamtu Pathian Jehova thutiam a ni.
“A HLAWHTLING BAWK ANG”
Chûng thil ṭha zawng zawng chu a thleng famkim tak tak ang em? Mi tam zâwkte chuan Bible-in a tiam leh a târ lan nunna chu duhawm tak a ni tih pawm mah se, chhan hrang hrang avângin chatuana nun tih ngaih dân chu hriat thiam harsa an ti a. Chu chu thil mak a ni lo, chu mi chungchâng min hrilh tûrin chatuana nung tumah an la awm si lo va.
Mihringte chuan sual leh thihna bawia awmin, natna leh hrehawm tawrhnate chu hun rei tak chhûng an lo tawng tawh a, chuvângin, mi tam takin chutianga hrehawm taka nun chu thil pângngai tak leh a nih dân tûr rêngah an ngai a ni. Mahse, chu chu min Siamtu Pathian Jehova’n mihringte tâna a thiltum a ni lo.
Pathian thutiam zawng zawng chu a thleng famkim ngei dâwn tih kan hriatthiam theih nân, ani chuan tlang takin heti hian a sawi a ni: “Engmah tih nei lovin ka hnênah a kîr leh lo vang a, ka duh ang chu a tizo zâwk ang a, thil ti tûra ka tirhnaah chuan a hlawhtling bawk ang,” tiin.—Isaia 55:11.
Bible chuan Jehova chu “dâwt sawi thei lo” Pathian tiin a sawi a. (Tita 1:2, NW) Ani chuan nakina lo thleng tûr chûng thil ropui tak takte min tiam avângin: Mihringte chu thutiam lei Paradis-ah chatuanin an nung thei tak tak ang em? Pathian thutiam aṭanga hlâwkna hmu tûrin eng nge kan tih ang? tia lo ngaihtuah chu a finthlâk ngei ang. A dawta thuziakah chuan chûng zawhnate chhângtu thu ṭha tak takte hmuh a ni ang.