A KAWM THU THIH HNU LAMA NUN—A AWM THEI EM?
Thih Hnuah Eng Thil Nge Thleng Ṭhîn?
“Thih hnu lama kal theihna tûr hmun pathum awm nia zirtîr ka ni a; chûng chu, vân, hremhmun, leh sual tênau kan faina purgatory te a ni. Vâna kal tûr khawpin ka fel lo va, hremhmuna tla tûr khawpin ka sual bawk lo tih ka hria. Purgatory chu eng nge a nih pawh ka hre lo. Chûng chu Bible-ah ka hmu ngai si lo. Mite sawi ka hriat mai a ni.”—Lionel-a.
“Mi zawng zawng an thih hian vânah an kal vek tih zirtîrna ka dawng a; mahse, chu chu ka pawm chiah lo. Ka ngaih dân chuan thihna chu thil engkim tâwpna a ni—mitthite tân hma lam hun beisei tûr a awm lo.”—Fernando-a.
‘Thih hnuah eng thil nge thleng ṭhîn? Kan hmangaih tak thi tawhte chuan khawi emaw laiah hrehawm an tuar em? Kan hmu leh ngai ang em? Engtin nge kan hriat chian theih?’ tiin i ngaihtuah ngai em? Khawngaihin, he mi chungchânga Bible zirtîrna chu ngaihtuah ang che. A hmasain, Bible-in thihna a sawi dân chu i lo bih chiang ang u. Chu mi hnuah, Pathian Thu, Bible-in beiseina min pêkte chu kan sawiho vang.
Mitthite dinhmun chu eng nge ni?
BIBLE CHHANNA CHU: “Mi nungdamte chuan an la thi dâwn tih an hre si a, mitthi erawh chuan engmah an hre lo va, lâwmman an nei tawh ngai lo va, hriat reng pawh an hlawh tawh hek lo. I kutin tih tûr a hmuh apiang chu theihtâwpin ti rawh; thlân i kalna tûrah chuan thiltih tûr emaw, remruat tûr emaw, hriatna emaw, finna emaw a awm si lo va.”a—Thuhriltu 9:5, 10.
A awlsam zâwnga sawi chuan, thlân tih chu mite an thih hnua an kalna hmun a ni a; hriatna leh thiltih awm tawh lohna entîr nei hmun, a nih loh leh dinhmun hi a ni. Mi rinawm Joba chuan thlân chu engtin nge a ngaih? A thil neih zawng zawngte leh a fate chu ni khat thilthu-ah a chân vek a, amah ngei pawh pânchhiain a bâwm khat vek a ni. Chuvângin, Pathian hnênah chuan: “Seolah [“meidîlah,” Catholic Douay Version] chuan mi thukru teh la,” tiin a ngên a ni. (Joba 1:13-19; 2:7; 14:13) Joba chuan Thlân chu hremhmun meidîl, a nih loh leh nasa leh zuala hrehawm tawrhna hmunnah a ngai lo tih a chiang hle. Chu ai mahin, hrehawm kianna hmunah a ngai zâwk a ni.
Mitthite dinhmun chungchâng zir theih dân kawng dang pawh a awm a. Chu chu Bible-a chhinchhiah thihna ata tho leh pariatte chanchin zir chianna hi a ni.—“Bible-a Târ Lan Thawhlehna Pariatte,” tih bâwm chu en ang che.
Chûng pariatte zînga tu mahin, hmun nuam tak a nih thu emaw, nghaisakna hmun a nih thu emaw an sawi lo. Tho lehte chu chutiang hmunah kal sela chuan, mite hnênah an sawi dâwn lâwm ni? Mi tinte’n an hriat theih nân thlarauva thâwk khum Bible-ah chhinchhiah a ni dâwn lâwm ni? Mahse, Bible-ah chuan chungtiang chhinchhiahna rêng a awm lo. Chûng mi pariatte chuan chutiang thil rêng sawi tûr an hre lo. Engvângin nge? Tui taka muhîl ang maia engmah an hriat loh vâng a ni. Bible chuan mitthite dinhmun chu muhîl nêna tehkhina hrilhfiah châng a nei a. Entîr nân, mi rinawm Davida leh Stephena te chu an ‘muhîl’ a ti a ni.—Tirhkohte 7:60; 13:36.
Chuti chu, mitthite tân eng beiseina nge awm? An muthilhna ata an tho leh thei ang em? (wp15-E 08/01)
a “Thlân” tih thu mal chu Hebrai thu mal “Sheol” tih leh Grik thu mal “Hades” tih aṭanga lâk a ni a. Bible lehlin ṭhenkhat chuan “meidîl” tih hmang mah se, mitthite meia nghaisak chu Pathian Thu nên a inmil lo.