‘Chutianga Tih Chu I Ngaihin A Ṭha A Ni’

1. Isua chu ‘thlarau thianghlima lâwm êm êm’ tûrin engin nge chêttîr? (A thupui chunga milem chu en rawh.)

‘THLARAU thianghlima lâwm êm êm’ Isua hmêl lan dân tûr chu i mitthla thei em? I mitthlaah chuan nui hmêl leh lungâwi taka meng angin i hmu mai thei. Engin nge ani chu chêttîr? A zirtîr 70-te chu Lalram chanchin ṭha hril tûrin a tîr chhuak zo deuh chiah a. An hna an thawh dân tûr hriat chu an châk hle a ni. Chutih hun lai chuan, lehkha zir sâng tak leh fing tak lehkhaziaktute leh Pharisaite ang chanchin ṭha dodâltu hmêlma thiltithei tak an awm a. Anni chuan Isua chu thingrem siamtu ang chauh leh a zirtîrte pawh “lehkha thiam lo, mi mâwl tak,” anga ngainêp tûrin mi tam tak chu an thunun thei a ni. (Tirh. 4:13; Mk. 6:3) Chuti chung pawhin, zirtîrte chu phûr takin an rawn hâwng a. Anni chuan dodâlna kârah, ramhuaite dodâlna hial an tâwk chung pawhin thu an hril a ni. An hlim chhan leh huaisen chhan chu eng nge ni?—Luka 10:1, 17-21 chhiar rawh.

2. (a) Engtin nge Isua zirtîrte chu nausên ang an nih? (b) Krista hnungzuite chu thlarau lam thu ril pawimawh takte hre thiam tûrin engin nge ṭanpui?

² Jehova hnêna Isua thusawi hi lo chhinchhiah teh: “Aw ka Pa, lei leh vân Lalpa, nangin mi fing leh mi bengvârte hnênah hêng thu hi i zêp a, nausênte hnênah i puan avâng hian ka fak a che. A ni, ka Pa, chutiang tih chu i ngaihin a ṭha a ni,” tih hi. (Mt. 11:25, 26) Mahse, Isua’n a zirtîrte chu nausên tak tak an ni a tihna erawh a ni lo. Chu aimahin, anni chu mahni ngaiha intifing, lehkha zir sâng leh fing takte nêna khaikhin chuan nausên ang mai an ni tih a hria a ni. A pawimawh zâwk chu, Isua chuan a hnungzuitute chu nausên anga awmin, inngaitlâwm tak leh zirtîr theih ni tûra a zirtîr hi a ni. (Mt. 18:1-4) Engtin nge anni chuan inngaihtlâwmna chu an hlâwkpui? Pathian Jehova chuan a thlarau thianghlim hmangin anni chu thlarau lam thu ril pawimawh takte hre thiam tûrin a ṭanpui a; chutih lai chuan, anmahni hmusittu mi fing leh mi bengvârte chu Setana leh an chaponain an mit a tihdelsak tlat a ni.

3. He thuziakah hian eng nge kan sawiho vang?

³ Isua a lâwm viau pawh chu a mak lo ve! Mite lehkha zirna leh finna neih chu eng chen pawh ni se, Jehova’n thlarau lam thu rilte chu inngaitlâwm mi chi hrang hrangte hnêna a puan dân chuan Isua chu a tihlim hle a. Pathian ngaiha chutiang zirtîrna a ṭhat avângin a lâwm a ni. He mi kawngah hian Jehova chu a inthlâk danglam tawh em? Hetiang zirtîrna hi a ngaihah chuan a la ṭha zêl tih engtin nge a târ lan? A chhânnate kan bih chian hian Isua ang bawkin hlimna nasa tak kan nei ve ang.

THU RILTE CHU MI ZAWNG ZAWNG HRIAT TURA SIAM A NI

4. Eng kawngtein nge Vênnainsâng simplified edition chu thilpêk duhawm tak a nih?

⁴ Tûn hnai kumahte khân, Pathian inawpna pâwl pêk chhuah thlarau lam zirtîrnate chu tluangtlam zâwk leh fiah zâwka siam a ni tih a lang a. Entîr nân, thil pathumte hi han ngaihtuah teh. Pakhatna chu, Vênnainsâng simplified edition kan nei hi a ni a.a Hei hi ṭawng leh lehkha chhiar lama harsatna neite tân thilpêk duhawm tak a ni. Chhûngkaw lûte chuan thlarau lama kan inchâwmna ber he Vênnainsâng Zirnaah hian an fate chu an tel tam lehzual tawh tih an hmu a. Mi tam tak chuan an ngaihhlut tak zetzia lehkha an thawn a ni. Unaunu pakhat chuan tûn hmain Vênnainsâng Zirnaah chhânna a pêk loh thu heti hian a ziak a. “Ka tîm thei hle,” tiin. Tûnah chuan a tîm tawh lo! Simplified edition a hman hnuah, heti hian a ziak belh a ni: “Tûnah chuan vawi khat aia tam ka chhâng tawh a, ka hlau tawh lo! Jehova leh in chungah ka lâwm tak zet a ni,” tiin.

5. New World Translation of the Holy Scriptures siam ṭhat a hlâwkna ṭhenkhat chu engte nge ni?

⁵ A pahnihna chu, New World Translation of the Holy Scriptures siam ṭhat chu, Sâpṭawngin October 5, 2013-a neih annual meeting-a tlâng zarh hi a ni.b Tûnah Bible châng tam tak chu thu mal tlêm zâwka hman a ni a, a awmzia chu a kim zâwkin, a fiah zâwk hial a ni. Entîr nân, Joba 10:1 chu thu mal 27 aṭangin thu mal 19-a tihtlêm a ni a; Thufingte 8:6 chu thu mal 20 aṭanga thu mal 13-a tihtlêm a ni bawk. He Bible châng pahnihte hi a tharah hian a fiah zâwk a ni. Kum sâwmbi tam tak chhûng rinawm taka rawng lo bâwl tawh hriak thih unaupa pakhat chuan heti hian a sawi: “Bible thara Joba bu ka chhiar chuan a vawikhatna atâna hre thiam niin ka inhria!” tiin. Mi dang tam takin chutiang chuan an sawi ve bawk.

6. Matthaia 24:45-47 thu kan hriatthiamna siam ṭhat chungchâng hi engtin nge i ngaih?

⁶ A pathumnaah chuan, tûn hnai maia kan hriathiamna siam ṭhatte hi han ngaihtuah teh. Entîr nân, “bawih rinawm, fing tak,” chungchângah July 1, 2013, Vênnainsâng-a hrilhfiahna thar chuan min tiphûr a ni. (Mt. 24:45-47) Chuta hrilhfiahnaah chuan bâwih rinawm fing tak chu Governing Body a ni a, “a chhûngte” chu thlarau lama châwmna dawng hriak thihte leh ‘berâm dangte’ an ni. (Joh. 10:16) Chutiang thutak zir leh mi tharte hnêna zirtîr chu a va nuam tak êm! Jehova chuan tluangtlam tak leh fiah taka zirtîr chu a ngaihin a ṭha tih eng kawng dangin nge a târ lan belh?

BIBLE THUZIAKTE TLUANGTLAM ZAWK LEH FIAH ZAWKA HRILHFIAHNA

7, 8. Bible-a thlen famkimna ropui zâwk nei thilthleng ṭhenkhat chu engte nge ni?

⁷ Kum tam tak chhûng Jehova rawng i lo bâwl tawh chuan, kan thu leh hla chhuaha Bible thuziak tam takte hrilhfiah dân zâwi zâwia thlâkthleng a ni tih chu i lo hre tawh mai thei a. Engtin nge a inthlâkthleng? Tûn hma chuan, kan thu leh hla chhuahahte hian Bible-a thilthlengte’n thlen famkimna ropui zâwk nei anga târ lan a ni fo va. A thilthleng chu entîr nei a ni a, a thlen famkimna chu a entîra nia ngaih a ni. Bible entîrnate chu thlen famkimna ropui zâwk a awm tih ṭan chhan tûr Bible-ah a awm em? Awm e. Entîr nân, Isua chuan “zâwlnei Jona chhinchhiahna,” chungchâng a sawi a ni. (Matthaia 12:39, 40 chhiar rawh.) Pathian Jehova chu inrawlh lo sela chuan nghapui kaw chhûng chu Jona thlânah a chang ngei ang. Chu thilthleng chuan thlâna amah zalh a nih hun tûr a entîr lâwk tih Isua’n a sawi a ni.

⁸ Bible-ah hian thlen famkimna ropui zâwk nei thilthleng dang pawh a awm a. Chûng zînga tam tak chu tirhkoh Paula chuan a sawi a ni. Entîr nân, Hagari leh Sari te nêna Abrahama inlaichînna chuan Israel hnamte leh Pathian inawpna pâwl vân lam pêng nêna Pathian Jehova inlaichînna a lo entîr lâwk a. (Gal. 4:22-26) Chutiang bawkin, biak bûk leh biak in, Inremna Nî, puithiam lal, leh Mosia Dân hmêlhmang dangahte chuan ‘thil ṭha, lo awm tûrte anpui tak nei lo’ a tel a ni. (Heb. 9:23-25; 10:1) Chutiang thlen famkimna ropui zâwk nei thilthlengte zir chu a phûrawmin, rinna a tichak thei a ni. Mahse, Bible-a chuang mite, thilthlengte, leh thilte hian lo thleng tûr thil emaw, mi tuemaw a entîr lâwk vek tiin thu tâwp kan siam thei em?

9. Bible-a Nabotha chanchin chu tûn hmain eng anga hrilhfiah nge a nih?

⁹ Tûn hma chuan, chutianga hrilhfiah dân chu kan zui fo va. Entîr nân, Nabotha chunga thilthleng hi han ngaihtuah teh. Lalnu suaksual Jezebeli chuan a pasal Ahaba’n Nabotha grêp huan a neihsak theih nân dik lo taka ruahmanna siamin Nabotha chu a that a ni. (1 Lal. 21:1-16) Kum 1932 lai chuan, chu mi chanchin chu entîr nei thilthleng anga hrilhfiah a ni a. Ahaba leh Jezebeli te chuan Setana leh a inawpna pâwl an entîr a, Nabotha chuan Isua a entîr bawk a, Nabotha thihna chuan Isua thihna a entîr nia sawi a lo ni tawh ṭhîn. Mahse, kum 1961-a Sâpṭawnga tihchhuah “I Hming Zahawm Rawh Se,” tih lehkhabu chuan Nabotha’n hriak thihte a entîr a, Jezebeli chuan Kristianna ram a entîr a. Chuvângin, Nabotha’n Jezebeli kut a tawrhna chu ni hnuhnûnga hriak thihte tihduhdahna entîrtu nia sawi a ni leh a ni. Hetiang kawnga Bible thute hrilhfiahna chuan Pathian mite chu kum tam tak chhûng a lo tichak tawh a ni. Chuti chu, engvângin nge thil hi a inthlâk danglam tâk?

10. (a) Bible thute hrilhfiahnaah finna chuan bâwih rinawm leh fingte chu fîmkhur lehzual tûrin engtin nge a ṭanpui? (b) Tûn laia kan thu leh hla chhuahte chuan eng lam nge a hawi tawh zâwk?

¹⁰ Kan beisei ang ngeiin, Pathian Jehova chuan ‘bâwih rinawm leh fing tak’ chu fing chho telh telh tûrin a ṭanpui a. Chhan ṭha tak leh chiang tak a awm loh chuan Bible thuziak chu thlen famkimna ropui zâwk nei tûr anga sawi nghâl mai lo tûrin finna chuan anni chu a ṭanpui a ni. Chu bâkah, thilthleng pakhatin thlen famkimna ropui zâwk nei anga tûn hmaa hrilhfiahnate chu mi tam tak tân hriatthiam a harsa tih hmuh chhuah a ni bawk. Chutiang zirtîrna zînga thil tel zawng zawng—tuin nge tu chu entîr a, engvângin nge tih ang chite—chuan fiah taka hriat te, hriat reng te, leh nunpuite a tiharsa a ni. Mahse, kan ngaih pawimawh zâwk chu Bible-a chuang thilthleng apiangin thlen famkimna ropui zâwk nei anga hrilhfiah kan tum lutukna lamah Bible-in nungchang lam leh a taka nunpui dân tûr min zirtîrte kan hmuh hmaih palh ang tih hi a ni. Chuvângin, tûn laia kan thu leh hla chhuahte chuan Bible thute aṭanga rinna te, chhelna te, Pathian ngaihsakna te, leh mize pawimawh dangte chungchânga zir tûr lam leh nunpui theih dân tûr lam a hawi tawh zâwk tih kan hmu a ni.c

11. (a) Engtin nge tûnah Nabotha chanchin chu kan hriatthiam a, engvângin nge a entîrna chuan kan zavai hnênah thu a sawi? (b) Engvângin nge tûn hnaia chhuak kan thu leh hlate chuan thilthleng pakhatin thlen famkimna ropui zâwk a nei anga a sawi ngai vak tawh loh?

¹¹ A nih leh, engtin nge tûnah Nabotha chungchâng chu kan hriatthiam tâk? Tluangtlam zâwk leh fiah zâwka hriatthiam a ni ta. Chu mi fel chu Isua emaw, hriak thihte emaw a entîr vâng ni lovin, rinawmna a vawn avâng zâwkin a thi a. Thu neihna dik lo taka hmanna kârah pawh Jehova Dân chu a zâwm tlat a ni. (Num. 36:7; 1 Lal. 21:3) Kan zînga tute pawhin thu neihna hman dik lohna avânga tihduhdahna kan tawh ve theih avângin a entîrna chuan kan hnênah thu a sawi a ni. (2 Timothea 3:12 chhiar rawh.) Chutiang rinna tichak thei tak zirtîrna chu mi tinte chuan awlsam taka hre thiamin, an hre reng thei a, an nunpui thei bawk a ni.

12. (a) Bible thuziakte chungchângah eng thu tâwp nge kan siam mai loh vang? (b) Engvângin nge Bible thu rilte pawh fiah taka hrilhfiahna kan neih theih? (Footnote en rawh.)

¹² Bible thuziakte chuan awmze dang nei lovin, a taka nunpui tûr chauh a ni tiin thu tâwp kan siam tûr a ni em? Ni lo. Tûn laia kan thu leh hla chhuahte chuan thil pakhatin thil dang min hriatnawntîr, a nih loh leh thil dang a hrilhfiah tih lam hawiin min zirtîr tawh zâwk a. Bible thuziakte chu entîr nei leh a entîra tih lam hawiin a hrilhfiah tawh lo a ni. Entîr nân, tihduhdahna kâra rinawm taka Nabotha thihna chuan mi rinawm Krista leh a hnungzui hriak thihte min hriatnawntîr kan ti thei a. Chu bâkah, Nabotha chanchin chuan Lalpa ‘berâm dangte’ zînga mi rinawm tam tak pawh min hriatnawntîr kan ti thei bawk. Chutianga fiah tak leh tluangtlam taka khaikhinna chu Pathian zirtîrna chhinchhiahna a ni.d

ISUA SAWI TEHKHIN THUTE TLUANGTLAM ZAWKA HRILHFIAHNA

13. Isua sawi tehkhin thu ṭhenkhat chu tluang zâwk leh fiah zâwkin kan hrilhfiah tawh tih eng entîrnate’n nge târ lang?

¹³ Isua Krista chu he leia Zirtîrtu ropui ber a ni a. Zirtîr dân a ngainat tak pakhat chu tehkhin thu hman hi a ni. (Mt. 13:34) Tehkhin thute chuan thu sawi nung tak leh fiah tak nih tîrin mi rilru a chawk thovin, an thinlung a khawih a. Tûn hnaia kan thu leh hla chhuahte chuan Isua sawi tehkhin thute chu tluang zâwk leh fiah zâwkin a hrilhfiah em? Hrilhfiah e! Vênnainsâng July 1, 2008 chhuakah Isua sawi dawidim, anṭam chi, leh lêngkhang tehkhin thute hrilhfiahna chiang zâwk kan hmuh avângin kan phûr hle a ni lâwm ni? Chûng tehkhin thute chuan Pathian Ram hmasâwnna leh he suahsualna khawvêla Krista hnung zuitu dikte lâk khâwmna hlawhtling tak a entîr tih chiang takin kan hre thiam tawh a ni.

14. (a) Samari mi ṭha tehkhin thu chu tûn hmain engtin nge kan lo hrilhfiah ṭhin? (b) Engtin nge tûnah Isua sawi chu tehkhin thu chu kan hriatthiam tâk?

¹⁴ Mahse, Isua sawi tehkhin thu kimchang zâwkte chu engtin nge ni ang? Ṭhenkhat chu entîr nei leh thlen famkimna ropui zâwk nei an ni a, a dangte chu a taka nunpui theih tûr zir tûr petu an ni. Chuti chu, engtin nge kan thliar hran theih ang? Kumte a lo vei chhoh chuan a chhânna chu a fiah chho zêl a. Entîr nân, Isua sawi tehkhin thu-a Samari mi ṭha chungchâng kan hrilhfiah ṭhin dân hi han ngaihtuah teh. (Lk. 10:30-37) Kum 1924 chhuak Vênnainsâng chuan Samari mi ṭha chuan Isua a entîr a; Jerusalem aṭanga Jeriko chhuk thlâkna kawng chuan Eden huana helna avânga mihringte tlûk chhiatna chu a entîr a; kal kawnga suamhmang chuan dik lo taka sumdâwng miliante leh inbumna nêna ei zawng mite a entîr a; tichuan puithiam leh Levia mi chuan sakhaw hruaitute an entîr a ni. Tûn laiah chuan, kan thu leh hla chhuahte chuan chu tehkhin thu chu Kristian zawng zawngte tân ṭanpui ngaite, a bîk takin thlarau lama ṭanpui ngaite ṭanpuina kawngah duhsak bîk kan nei tûr a ni lo tih hriatnawntîr nân a hmang a ni. Jehova’n a zirtîrna chu kan hriatfiah theih tûr zâwnga min hrilhfiah avângin kan hlim hle a ni lâwm ni?

15. A dawta thuziakah eng nge kan sawiho vang?

¹⁵ A dawta thuziakah chuan Isua sawi tehkhin thu dang—nula thianghlim sâwmte chungchâng—kan sawiho vang a. (Mt. 25:1-13) Isua chuan ni hnuhnûnga a hnungzuitute’n chu tehkhin thu thiltithei tak chu eng anga hre thiam tûrin nge a duh? Thlen famkimna ropui zâwk nei angin, chuta mite, thilte, leh thilthleng zawng zawngte chuan entîr an nei vek em? Nge ni a, ni hnuhnûnga a hnungzuitute kaihruaitu, nunpui theih tûr zir tûr petu atân zâwk? I lo en ang u. (w15-E 03/15)