Indona Chungchângah Sakhuana I Ring Thei Em?

Alberto-a chu kum sâwm dâwn lai sipaiah a ṭang tawh a. “Kan puithiam chuan ‘Pathianin awmpui che u rawh se’ tiin mal min sâwm a. Mahse, ‘Mi that tûra kal chhuak tûr ka ni a, Bible erawh chuan “tual i that tûr a ni lo” a ti si a, tiin ka ngaihtuah a ni,’” tiin ani chuan a sawi.

Ray-a chu khawvêl indopui II-na lai vêl khân lawng sipaiah a ṭang a. Ṭumkhat chu, puithiam hnênah: “Lawnga rawn kalin, sipaiho tân leh hnehna kan chan theih nân i ṭawngṭai a. Hmêlmate pawhin chutiang tho chuan an ti ve a ni lâwm ni?” tiin a zâwt a. Chu puithiam chuan, Lalpa hna thawh dân chu mak tak a nih thu sawiin a chhâng a ni.

Chu chhânnaah chuan i lungawi tâwk lo a nih pawhin, chutiang chu nangmah chauh i ni lo.

BIBLE ZIRTIRNA CHU ENG NGE NI?

Isua chuan Pathian thupêk ropui ber zînga pakhat chu “nangmah i inhmangaih angin i vêngte pawh i hmangaih tûr a ni,” tih a nih thu a sawi a. (Marka 12:31) Isua chuan kan hmangaih tûr kan vêngte chu an chênna hmun emaw, an ram emaw azirin chin a siam em? Siam lo. A zirtîrte chu: “In inhmangaih chuan mi zawng zawngin ka zirtîrte in ni tih chu miah chuan an hria ang,” tiin a hrilh a ni. (Johana 13:34, 35) An inhmangaih tawnna chu a danglam dâwn êm avângin, chu chu anmahni chhinchhiahna tûr a ni ang. Mi dangte nunna lâksak ai chuan, mi dangte tân an nun an pe zâwk dâwn a ni.

Kristian hmasate chu Isua thusawi milin an nung a. The Encyclopedia of Religion chuan heti hian a sawi: “Kristiante chu mihring nunna la lo tûra khap beh an ni a, chu thu bul avâng chuan Rom sipaiah an ṭang lo tih Tertullian-a leh Origen-a bâkah tûn hmaa sakhaw hruaitute (church father-te) chuan an nemnghet a ni,” tiin.

JEHOVA THUHRETUTE CHU HE MI KAWNGAH ENG NGE AN AN?

Jehova Thuhretute chu ram tin deuh thawah an awm avângin, an zînga ṭhenkhat phei chu ram inngeih lo tak takahte pawh an awm a. Chuti chung chuan Kristiante chhinchhiahna ber hmangaihna chu vawng tlat tûrin theih tâwp an chhuah a ni.

Entîr nân, kum 1994-a Rwanda rama Hutu leh Tutsi hnam inkâra buaina a chhuah khân Jehova Thuhretute chu an tualdawih tlat a. Hnam pakhata Thuhretute chuan hnam danga Thuhretute chu an hum ṭhîn a, nun hial an thâp châng pawh a awm a ni. Tutsi unaute humtu Hutu Thuhretu pahnihte chu man an nih khân, sipai anga tualchhûng vênghimtu Hutu Interahamwe chuan, “Tutsi mite him theih nâna in ṭanpui avângin in thi ngei tûr a ni,” a ti a. Lungchhiatthlâk takin, Hutu Thuhretu pahnihte chu tihhlum an ni ta a ni.—Johana 15:13.

Eng nge i ngaih dân: Jehova Thuhretute thiltih chu mahni hmasial lo hmangaihna chungchânga Isua thusawi nên inmilin i hria em? (w13-E 07/01)