Simplified English Edition Hmêlhriattîrna
TUN thla chhuak aṭanga inṭanin, kum khat chhûng chu enchhinna atân Vênnainsâng simplified English edition chu a pângngai rualin kan tichhuak dâwn tih lâwm takin kan puang a ni. Chutah chuan zir tûr thuziakte leh hmun awm dân azirin thuziak dang thlan chhuah ṭhenkhat pawh a chuang ang. Hei hian Jehova Thuhretu tam takte thlarau lam mamawh a phuhrûk ngei kan ring a ni. Engvângin nge?
Fiji te, Ghana te, Kenya te, Liberia te, Nigeria te, Papua New Guinea te, leh Solomon Island te-a awm kan unaute ṭawng hman ber chu Sâpṭawng a ni a. Hêng rama awm kan unaute’n tualchhûng ṭawngte chu hmang ve mah se, kohhran inkhâwmnaah leh thlawhhma rawngbâwlnaah Sâpṭawng an hmang fo a ni. Amaherawhchu, an Sâpṭawng hman hi kan thu leh hla chhuaha kan hman ai chuan a mâwlmang zâwk a. Tin, Jehova mite zînga ṭhenkhat chu Sâpṭawng thiam lutuk lo chung pawha hman a ngaihna ramahte an insawn a ngai a ni. Chu bâkah, an pianpui ṭawnga kaihhruai inkhâwmnaahte an tel thei lo bawk.
Chawlhkâr tin Vênnainsâng Zirnaa kan zir thuziakte hi a hun taka thlarau lam chaw kan hmuhna ber a ni a. Chuvângin, hêng thuziakte aṭanga inkhâwm zawng zawngte’n hlâwkna an hmuh theih nân, simplified English edition chuan thu mal tlêm zâwk, grammar leh ṭawng hman dân mâwlmang zâwk a hmang a ni. He edition thar kâwm hi hriat hran theih nân a danglam bîk ang a. A thupui tê te, paragraph te, ennawnna zawhna te, leh milemte chu a chhuak pângngai ang chiah a ni ang. Chuvângin, Vênnainsâng Zirnaah hman theih ve ve a ni ang a, chhânna pawh pêk theih a ni ang. Hêng edition pahnihte inan lohna hriat theih nân, a hnuaia târ lan tûn ṭum chhuak zir tûr thuziak hmasa bera paragraph 2-na hi en ang che.
He thil thar hi Jehova hnêna: “I thupêkte chu ka zir theih nân hriat thiamna mi pe ang che,” titu mi tam takte ṭawngṭaina chhânna a nih kan beisei. (Sâm 119:73) Sâpṭawng thiam vak lote leh Sâpṭawng hmang naupangte chu chawlhkâr tina Vênnainsâng Zirna atân an inbuatsaih ṭha thei zâwk ang tih kan ring tlat a. “Unauhote . . . hmangaih” avânga thlarau lam chaw hnianghnâr taka min pe tûra “bawi rinawm, fing tak,” hmangtu Pathian Jehova hnênah chuan lâwmthu kan sawi a ni.—1 Pet. 2:17; Mt. 24:45.
Jehova Thuhretute Governing Body
(w11-E 07/15)