Hrilh Lâwkna 5. Leilung Tihchhiatna

‘Pathianin lei tichhetute a tihchhiat ve thung hun chu a lo thleng ang.’—THU PUAN 11:18.

● Mr. Pirri-a chu Nigeria ram Kpor khuaa awm, palm thing aṭanga a zu lakhâwmtu a ni a. A eizawnna chu Niger Luiin tuipui a finna hmuna oil tam tak bua chuan a tichhe ta vek mai a. Ani chuan: “Kan sanghate a tihlum a, kan vunte a tichhia a, kan lui tuite a tibawlhhlawh vek a. . . . Inchâwmna tûr rêng ka nei tawh lo,” tiin a sawi.

THU DIK CHUAN ENG NGE A TAR LAN? Mi thiam ṭhenkhat chhût dân chuan, khawvêla tuifinriatahte hian kum tinin bawlhhlawh ton maktaduai 6.5 lai a luang lût a. Chûng bawlhhlawhte zâtve vêl chu a ṭawih chhiat hma kum za tam tak chhûng tuia lâng reng tûr plastic nia chhût a ni. Mihringte chuan leilung an tihbawlhhlawh bâkah, leilung hausakna pawh hlauhthâwn awm khawpin an hmang ral chak bawk a. Zir chianna chuan leilung hian kum khata mihringte hman ral leilung hausakna neih lêt nân kum khat leh thla nga a mamawh tih a târ lang a ni. “Tûn ang zêla mihring kan pun chak a, a hausakna kan hman ral zêl chuan, kum 2035-ah chuan kan Leilung ang tiat pahnih lai kan mamawh ngei ang,” tiin Australian chanchinbu Sydney Morning Herald chuan a sawi.

HNIAL KALHNA TLANGPUI CHU ENG NGE NI? Mihringte hi fing leh remhre tak kan ni a. Hêng buainate hi kan chingfel theiin, leilung hi kan humhim thei a ni.

CHU HNIALKALHNA CHU A PAWM TLAK EM? Hna thawk rim mi mal leh pâwl tam tak chuan kan chhehvêl boruak enkawl chungchâng an vei hle a. Mahse, leilung hi nasa taka tihbawlhhlawh zêl a ni.

ENG NGE I NGAIH DAN? Pathian tân lo inrawlh a, a thu lo tiam tawh ang ngeia leilung a chhiat loh nâna a vênhim a ngai em?

Kan ngaihtuah tâk hrilh lâwkna pangate bâkah, Bible chuan ni hnuhnûng atâna a ṭha lama hmasâwnna pawh a sawi tel bawk a ni. Hrilh lâwkna paruknaah entîrna pakhat i lo ngaihtuah ang u. (w11-E 05/01)

[Phêk 8-naa thu lâk chhuah]

“Paradise ka neihna ata bawlhhlawh paihna hmun nei ta angah ka inngai.”—KUM 2010-A GULF OF MEXICO-A OIL BUAIN A NGHAWNG DAN CHUNGCHANGA UNITED STATES, GULF COAST-A AWM ERIN TAMBER-I THUSAWI.

[Phêk 8-naa bâwm]

Pathian Chu Mawhphurtu A Ni Em?

Bible-in tûn laia kan hmuh dinhmun ṭha lo takte hi a lo sawi lâwk avângin, chu chuan Pathian chu chûng thila mawhphurtu a nihtîr em? Kan hrehawm tawrhte hi ama awmtîr a ni em? Hêng zawhnate chhânna lungawithlâk tak chu Jehova Thuhretute tihchhuah Bible Zirtîrna Dik Tak Chu Eng Nge Ni? tih lehkhabu bung 11-naah i hmu thei ang.

[Phêk 8-naa Milem Hawhtîrtu]

U.S. Coast Guard photo