Hrilh Lâwkna 4. Pianpui Hmangaihna Neih Lohna
“Mite chuan . . . chhûngte hmangaihna pângngai an nei lo vang.”—2 TIMOTHEA 3:1-3, God’s Word Bible.
● Chris-a chu Wales ram bial Hmâr lama awm in chhûngkhura tharum thawhna tuarte ṭanpuitu pâwla thawk a ni a. Heti hian a sawi a ni: “Tunge a nih pawh hriat theih loh khawpa sawisak tuar ka lo hmêl hriat tawh nu pakhatin min rawn pan lai chu ka theihnghilh thei lo. Hmeichhe dangte chu hawi chhuak ngam lo khawpin an rilru a na bawk a ni,” tiin.
THU DIK CHUAN ENG NGE A TAR LAN? Africa ram pakhatah chuan hmeichhia 3 zêla 1 chu an naupan laiin mipat hmeichhiatna lama khawih chingpen an ni. Chu mi ram vêka ngaih dân lâk khâwmna pakhatah mipa 3 zêla 1 chuan nupuite chunga kutthlâk chu thil pawiah an ngai lo. Mahse, hmeichhiate chauh hi in chhûngkhura kut tuar an ni lo. Entîr nân, Canada ramah chuan mipa 10 zêla 3 vêl chuan an nupuite vuak emaw, kawng danga tihhrehawm emaw an tuar a ni.
HNIAL KALHNA TLANGPUI CHU ENG NGE NI? In chhûngkhura tharum thawhna te chu thil awm reng a ni a. Tûn hma zawng aiin ngaihsak a hlawh mai a ni.
CHU HNIALKALHNA CHU A PAWM TLAK EM? Tûn hnai kum sâwm bi-ahte khân in chhûngkhura tharum thawhna chu vei nasat chhoh a ni ngei mai. Mahse, chutianga veina chuan in chhûngkhura tharum thawhna chu a tihtlêm phah em? Thlêm phah lo. Tûn hma zawng aiin pianpui hmangaihna chu kan tlachham zual zâwk a ni.
ENG NGE I NGAIH DAN? A nih leh, 2 Timothea 3:1-3 hi a thleng famkim tawh em? Chhûngte chunga neih tûr pianpui hmangaihna chu mi tam takin an tlachham em?
Tûna thleng famkim mêk hrilh lâwkna pangana chu kan chênna leilung nên a inkûngkaih a. He mi chungchânga Bible sawi hi ngaihtuah ang che. (w11-E 05/01)
[Phêk 7-naa thu lâk chhuah]
“In chhûngkhura tharum thawhna chu dân bawhchhiatna zînga report tlêm ber a ni deuh reng a. A tlângpui thuin hmeichhiain police hnêna a report hmain vawi 35 lai sawisak a tuar tawh ṭhîn.”—WALES RAM BIAL ATANA IN CHHUNGKHURA THARUM THAWHNA ṬANPUITU PAWL THUSAWITU HMEICHHIA.