Lungawina Neih Theih A Ni Em?

“Lungawi[na] chuan mi rethei a tihausa a; lungawi lohna erawh chuan mi hausa pawh a tirethei ṭhîn.” —Benjamin Franklin.

HE THUFINGIN a sawi angin, mi tam tak chuan lungawina chu suma lei theih a ni lo tih an hria a. Chuvângin, thil neih belh zêl duhna te, hlawhtlin lehzual duhna te, a nih loh leh mi dangte dinhmun awhna te min neihtîrtu he khawvêlah hian lungawina—chhûngril taka lungnihna—chu neih harsa tak anga a lang pawh hi a mak lo ve! A hnuaia târ lan a engemaw ber hian i chungah nghawng a nei em?

• Lungawina chu thil dang pakhat lei belhna aṭanga neih theih mai nia thil thar fak mawitute thu thehdarh tam tak te.

• Hna thawhna emaw, school emawa inelna avânga mi dangte el phâk chauhva tiṭha nia inhriatna te.

• Mite’n an tâna i thil tihsak an hlut lohna te.

• Ṭhiante thil neih ang neih duhna te.

• Nun chungchânga zawhna pawimawh takte chhânna i hmuh lohna te.

Chûng harsatnate tâwk chung chuan lungawi tak zet theih a ni em? Tirhkoh Paula chuan “lungawi zêl . . . dân thurûk” chungchâng a sawi a. Ani chuan hnianghnâr taka awm châng leh tlachhama awm châng pawh a nei a. A ṭhiante’n amah an ngaihsân laiin mi dangte chuan an nuihzat ve bawk. Chuti chung pawhin, ani chuan ‘eng ang pawhin awm mah se, lungawi zêl a chîn,’ a nih loh leh a zir thu a sawi a ni.—Philippi 4:11, 12.

Lungawina chu neih tuma hma la ngai lote tân chuan thurûk a ni a; mahse, Paula sawi angin zir thiam theih a ni. Tûnah chuan, Pathian Thu, Bible-a târ lan lungawina neih theih dân thurûk pangate ngaihtuah tûrin kan sâwm a che. (w10-E 11/01)