Pathianin Min Ngaihsak Tak Zet Tih Kan Hriat Theih Dân

HE ZAWHNA: Pathian chu hmangaihna a nih si chuan, engvângin nge hrehawm tawrhna a tam êm êm? tih hi mite’n kum sâng tam tak chhûng an lo ngaihtuah tawh zawhna hlui tak; mahse, pawimawh tak si a ni. Mi tuemaw i hmangaih chuan, a hrehawm tawrh chu i duh lo vang a, buaina a tawh pawhin ṭanpui i tum ngei ang tih chu i pawm ngei a rinawm. Chutiang a nih avâng chuan, mi tam tak chuan khawvêlah hrehawm tawrhna a tam êm avângin, Pathianin min ngaihsak tak tak lo a ni ang tih ngaih dân an nei a. Chuvângin, Pathianin min hmangaih tak zetin, min ngaihsak tak zet a ni tih târ langtu thilte kan ngaihtuah hmasak chu a pawimawh a ni.

Thil Siamte’n Pathian Hmangaihna A Finfiah

Pathian Jehova chu “vân te, lei te, tuifinriat te, a chhûnga awmte zawng zawng Siamtu” a ni a. (Tirhkohte 4:24) A thil siamte kan ngaihtuah hian, min ngaihsak a ni tiin thu tâwp kan siam ngei ang. Entîr nân, i hlimpui tak leh nuam i tihzâwng tak thilte chu han ngaihtuah teh. Ei tûr tuihnai tak takte chu i ngaina em? Pathian Jehova chuan kan nunna châwm nân ei tûr chi khat lek min pêk theih laiin, tui kan tih tak ei tûr chi hrang hrang a siam zâwk a ni. Chutiang bawkin, Pathian Jehova chuan leilung hi kan hlimna tûr leh rilru la tak ni tûrin thingkûng chi hrang hrang te, pangpâr mawi tak tak te, leh ram mawi tak tak tein a thuam a ni.

Siam kan nih dân pawh hi han ngaihtuah teh. Kan fiamthu thawh theihna te, rimawi kan hlimpui theihna te, leh thil mawi kan hlut theihnate chu kan nunna châwm nân thil ṭûl a ni kher lo va—hêng zawng zawngte hi Pathian thilpêk kan nun tihausatu thilte a ni. Tin, mi dangte nêna kan inlaichînna pawh hi han ngaihtuah bawk teh. Ṭhian ṭhate nêna inkawmna emaw, kan hmangaih tak tuemaw kuah emaw chu tu nge nuam ti lo awm ang? Hmangaih theihna kan nei mai pawh hi hmangaihna Pathian hnên aṭanga thilpêk a ni tawh hrim hrim a ni! Pathian chuan mihringte chu hmangaih theihna neia a siam avângin, chu mizia chu Pathian mize zînga mi a ni ngei tûr a ni.

Bible-in Pathian Min Hmangaihzia A Nemnghet

Bible chuan Pathian chu hmangaihna a ni tih min hrilh a. (1 Johana 4:8) A hmangaihna chu a thil siamah chauh ni lovin, a Thu, Bible-ah pawh a lang a ni. Entîr nân, Bible chuan hrisêlna ṭha awmtîrtu kaihhruaina min pe a, thil engkimah a tâwk hre tûrin min fuih a, zu ruihna leh a lutuka ei leh in kawngah vaukhânna min pe bawk.—1 Korinth 6:9,10.

Bible chuan mihringte inlaichînna chungchângah zilhna fing tak min pe bawk a, inhmangaih tawn tûr te, mi dangte zahthiam a, zahawm tak, leh ngilnei taka cheibâwl tûr tein min fuih a. (Matthaia 7:12) Hrehawm tawrhna thlentu chîn dân leh rilru put hmang—duhâmna te, mi rêlna te, îtsîkna te, uirêna te, leh tualthahna te—chu a dem a ni. Mi tin hian Bible-a zilhna thu ṭha takte hi nunpui tum se chuan, khawvêl pumah hian hrehawm tawrhna a tlêm phah ngei ang.

Mahse, Pathian hmangaihna a lanna ropui ber chu mihringte tlan nâna a Fapa, Isua a pe hi a ni. Johana 3:16 chuan: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tiin a sawi a ni. Chutiang chuan Pathian Jehova chuan thihna leh hrehawm tawrhna zawng zawng titâwp hlen tûrin ruahmanna a siam dêr tawh a ni.—1 Johana 3:8.

Pathian Jehova’n min hmangaihzia finfiahna tam tak a awm ngei a ni. A nih chuan, kan hrehawm tawrhnate hmuh chu nuam a ti lo vang tih a chiang hle. Ani chuan hrehawm tawrhna titâwp tûrin thil a ti ang. Chu mi chungchânga ngaihdân kan lo siam chu a ngai lo va—Bible chuan Pathianin hrehawm tawrhna a tihboral dân tûr chiah chu min hrilh a ni. (w09-E 12/01)

[Phêk 4-naa milem]

Hmangaih theihna kan nei mai pawh hi hmangaihna Pathian thilpêk a ni tawh hrim hrim